യുവതലമുറ ദേഹമാസകലം ടാറ്റൂ ചെയ്യുന്നത് ട്രെന്റ് ആയി കാണുമ്പോള്‍ അതിനു പിന്നില്‍ ഒളിഞ്ഞിരിക്കുന്ന അപകടം വളരെ വലുതാണെന്ന് പഠന റിപ്പോര്‍ട്ട്. ശരീരത്തില്‍ ടാറ്റൂ ചെയ്യുന്നത് കാന്‍സര്‍ വരാനുള്ള സാധ്യത മൂന്നിരട്ടി വര്‍ധിപ്പിക്കുമെന്നാണ് പഠന റിപ്പോര്‍ട്ട് പറയുന്നത്. രണ്ടായിരത്തിലധികം ഇരട്ടകളില്‍ നടത്തിയ പഠനത്തിലാണ് ഡാനിഷ്, ഫിന്നിഷ് ശാസ്ത്രജ്ഞര്‍ പുതിയ കണ്ടെത്തല്‍ നടത്തിയത്. ടാറ്റൂ ചെയ്തവരും ടാറ്റൂ ചെയ്യാത്തവരും തമ്മിലുള്ള കാന്‍സര്‍ നിരക്കുകള്‍ താരതമ്യം ചെയ്യുമ്പോള്‍, ടാറ്റൂ ചെയ്ത വ്യക്തികള്‍ക്ക് സ്‌കിന്‍ കാന്‍സര്‍ വരാനുള്ള സാധ്യത 62% വരെ കൂടുതലാണെന്ന് ഗവേഷകര്‍ കണ്ടെത്തി.
കൈപ്പത്തിയെക്കാള്‍ വലിപ്പത്തില്‍ ടാറ്റൂ ചെയ്യുന്നവരില്‍ സ്‌കിന്‍ കാന്‍സറിനുള്ള സാധ്യത 137% കൂടുതലാണെന്നും, രക്ത കാന്‍സറായ ലിംഫോമയുടെ സാധ്യത 173% കൂടുതലാണെന്നും പഠനത്തില്‍ കണ്ടെത്തി. യൂറോപ്പിലെ യുവതലമുറയില്‍ ടാറ്റൂകളുടെ പ്രചാരം വര്‍ദ്ധിച്ചുവരുന്ന സാഹചര്യത്തില്‍, ഗവേഷകര്‍ ഈ കണ്ടെത്തലുകളില്‍ ആശങ്ക പ്രകടിപ്പിച്ചു. നിലവിലെ സര്‍വേകള്‍ അനുസരിച്ച് യുകെയില്‍ നാലില്‍ ഒരാള്‍ക്ക് ഒരു ടാറ്റൂ എങ്കിലും ഉണ്ട്. ടാറ്റൂ മഷി രക്തപ്രവാഹത്തില്‍ പ്രവേശിച്ച് ലിംഫ് നോഡുകളില്‍ അടിഞ്ഞു കൂടുന്നത് വിട്ടുമാറാത്ത വീക്കം, അസാധാരണമായ കോശ വളര്‍ച്ച എന്നിവയ്ക്ക് കാരണമാകുമെന്ന് ഗവേഷകര്‍ പറയുന്നു.
ടാറ്റൂ ചെയുന്നത് വഴി ലിംഫ് നോഡുകളില്‍ മഷി കണികകള്‍ അടിഞ്ഞുകൂടുകയും, തുടര്‍ച്ചയായ രോഗപ്രതിരോധ പ്രതികരണത്തിന് കാരണമാവുകയും ചെയ്യുമെന്ന് സതേണ്‍ ഡെന്‍മാര്‍ക്ക് സര്‍വകലാശാലയിലെ പ്രൊഫസര്‍ ഹെന്റിക് ഫ്രെഡറിക്സെന്‍ പറയുന്നു. ഈ സമ്മര്‍ദ്ദം ലിംഫ് നോഡ് പ്രവര്‍ത്തനത്തെ ദുര്‍ബലപ്പെടുത്തുമോ അതോ മറ്റ് ആരോഗ്യ പ്രശ്നങ്ങള്‍ക്ക് കാരണമാകുമോ എന്ന് ഗവേഷകര്‍ ഇപ്പോഴും കണ്ടെത്തിയിട്ടില്ല. ടാറ്റൂകള്‍ നേരിട്ട് കാന്‍സറിന് കാരണമാകുന്നില്ലെങ്കിലും രോഗം നേരത്തെ തിരിച്ചറിയാന്‍ സാധിക്കാതെ വരുന്ന നിരവധി കേസുകള്‍ റിപ്പോര്‍ട്ട് ചെയ്തിട്ടുണ്ട്.
ഏതായാലും ആളുകളുടെ ടാറ്റൂ പ്രേമം ആരോഗ്യത്തിനു ഹാനികരമാണെന്ന കണ്ടെത്തല്‍ ഗൗരവകരമായി എടുക്കണമെന്നാണ് ആരോഗ്യ വിദഗ്ധരും പറയുന്നത്.
