ഇന്റര്‍വ്യൂ

പാതിമനസ്സോടെ സിനിമ ചെയ്താല്‍ ശരിയാകില്ല- മീരാ ജാസ്മിന്‍

മീരാ ജാസ്മിന്റെ സിനിമാ ജീവിതത്തിനു 15 വയസ്. ഉയര്‍ന്നും താഴ്ന്നും നീങ്ങിയ കരിയര്‍ . എങ്കിലും വിവാഹശേഷവും അഭിനയജീവിതം ഉപേക്ഷിക്കാത്ത ചുരുക്കം നായികമാരില്‍ ഒരാളായി മീര മാറി. കാലം മാറുമ്പോള്‍ സിനിമയ്ക്കും കലാകാരന്മാര്‍ക്കും മാത്രമല്ല, സമൂഹത്തിനും മാറ്റം വേണമെന്നു മീര പറയുന്നു.
കാലത്തിനൊത്തു സമൂഹത്തിന്റെ കാഴ്ചപ്പാടിലും മാറ്റം വന്നാല്‍മാത്രമേ സ്ത്രീ കഥാപാത്രങ്ങള്‍ക്കു കൂടുതല്‍ പ്രാധാന്യമുള്ള സിനിമകള്‍ ഉണ്ടാകൂ. അതില്ലാത്തിടത്തോളം സിനിമ പഴകിയ പ്രമേയങ്ങളില്‍ ചുറ്റിത്തിരിഞ്ഞുകൊണ്ടേയിരിക്കും എന്നാണ് മീരയുടെ അഭിപ്രായം.


നായികാ പ്രാധാന്യമുള്ള ചിത്രങ്ങളില്‍ മാത്രമാണോ ഇപ്പോള്‍ അഭിനയിക്കുന്നത്?

അങ്ങനെ പറയുന്നതു ശരിയല്ല. ഈ സിനിമയില്‍ (പത്തു കല്പനകള്‍ ) എല്ലാ കഥാപാത്രങ്ങള്‍ക്കും പ്രാധാന്യമുണ്ട്. കുറ്റാന്വേഷണ– സൈക്കളോജിക്കല്‍ ത്രില്ലര്‍ വിഭാഗത്തില്‍പ്പെടുത്താവുന്ന മൂവിയാണ്. ഞാന്‍ അവതരിപ്പിക്കുന്ന ഷാസിയ അക്ബര്‍ എന്ന പൊലീസ് ഓഫിസര്‍ ഒരു ഇന്‍ഡിപെന്‍ഡന്റ് ക്യാരക്ടറാണ്. ആരുടെയും ജോഡിയല്ല. ഈയൊരു ട്രീറ്റ്മെന്റ് തന്നെ പുതിയ കാലത്തു സിനിമയില്‍ വന്നിട്ടുള്ള നല്ല മാറ്റങ്ങളില്‍ ഒന്നാണ്. അനൂപ് മേനോനും കനിഹയും തമ്പി ആന്റണിയുമെല്ലാം ചിത്രത്തില്‍ പ്രധാന വേഷങ്ങളിലുണ്ട്.


കരിയറിന്റെ ആദ്യകാലത്തു വലിയ സംവിധാകന്മാരുടെ സിനിമകളില്‍ സ്ഥിരം സാന്നിധ്യമായിരുന്നു മീര. ഇപ്പോള്‍ അധികവും പുതിയ സംവിധായകരുടെ കൂടെ...?

പുതിയ ആളുകള്‍ എല്ലാം നല്ല ടാലന്റഡ് ആണ്. അവര്‍ മലയാള സിനിമയിലേക്കു പുതിയ കണ്‍സപ്റ്റുകള്‍ കൊണ്ടുവരുന്നു. എല്ലാവരും ടെക്നിക്കലി ക്വാളിഫൈഡുമാണ്. 'പത്തു കല്‍പനകളു'ടെ ഡയറക്ടര്‍ ഡോണ്‍ മാക്സും അങ്ങനെ ഒരാളാണ്. എപ്പോഴും പറയുന്നതു പോലെയല്ല, തികച്ചും വ്യത്യസ്തമായ തീം ആണ് പത്തു കല്‍പനകളുടേത്. ഇത്തരം നല്ല സിനിമകളുടെ ഭാഗമാകാന്‍ സാധിക്കുന്നതു വലിയ കാര്യമായി കാണുന്നു.ഇത് എന്റെ ആദ്യ പൊലീസ് വേഷമാണ്. അതിന്റെ ഒരു ത്രില്‍ ഉണ്ട്. യൂണിഫോമില്‍ വരുന്ന സീക്വന്‍സുകള്‍ വളരെ കുറവാണ്. ഷര്‍ട്ടും ജാക്കറ്റുമാണു ഇതിലെ ഷാസിയ മിക്കപ്പോഴും ധരിക്കുന്നത്. എങ്കിലും ബോഡി ലാംഗ്വേജില്‍ ഒരു പൊലീസ് ലുക്ക് ഉണ്ട്.


വിവാദങ്ങള്‍ ഏതെങ്കിലും തരത്തില്‍ കരിയറിനെ ബാധിച്ചിട്ടുണ്ടോ?

ഒരിക്കലുമില്ല. ഞാന്‍ എപ്പോഴും എന്റേതായ ഒരു ലോകം സ്വന്തമായി സൃഷ്ടിച്ചിട്ടുണ്ട്. ഞാനും എന്റെ കൊച്ചുസന്തോഷങ്ങളും മാത്രമുള്ള ലോകം. അതിനുള്ളില്‍ ഞാന്‍ തൃപ്തയാണ്. അതിനകത്തേക്കു ഞാന്‍ ആരെയും പ്രവേശിപ്പിക്കില്ല. അതുകൊണ്ടു വിവാദങ്ങളൊന്നും എന്നെ ബാധിക്കുകയേയില്ല. ഇതൊക്കെ സിനിമാ ഇന്‍ഡസ്ട്രിയുടെ ഭാഗം മാത്രമാണ്. വിവാദങ്ങള്‍ കരിയര്‍ നശിപ്പിക്കുമെങ്കില്‍ ഇന്നു ലോകസിനിമയിലെ മികച്ച കലാകാരന്മാരില്‍ പലരും അവിടെ ഉണ്ടാകുമായിരുന്നില്ലല്ലോ.


ഇത്രയും വര്‍ഷത്തെ സിനിമാ പരിചയം പുതിയ സിനിമകളുടെ തിരഞ്ഞെടുപ്പിനുള്ള മാനദണ്ഡങ്ങളില്‍ എന്തെങ്കിലും മാറ്റം?

തീര്‍ച്ചയായും. പണ്ടത്തെപോലെ സിനിമകള്‍ ചെയ്യാന്‍ നമുക്ക് ഇന്ന് എന്തായാലും സാധിക്കില്ല. 10 വര്‍ഷം മുന്‍പു തീരുമാനങ്ങള്‍ എടുത്തിരുന്നതുപോലെ ഇന്ന് എടുക്കാനും കഴിയില്ല. സിനിമ മാറുന്നതിനൊപ്പം മാനദണ്ഡങ്ങളും മാറിയിട്ടുണ്ട്. എന്തെങ്കിലും തരത്തില്‍ എക്സൈറ്റ് ചെയ്യിക്കുന്ന എലമെന്റ് സ്ക്രിപ്റ്റിലോ ക്യാരക്ടറിലോ ഉണ്ടെങ്കില്‍ ഞാന്‍ ആ സിനിമയുടെ ഭാഗമായിരിക്കും. അതു നിശ്ചയിക്കുന്നതിന് എന്റേതായ ചില മാനദണ്ഡങ്ങള്‍ ഉണ്ട്.


കരിയര്‍ എങ്ങനെയാണു മുന്നോട്ടു കൊണ്ടുപോകുന്നത്? വ്യക്തമായ പ്ലാനിങ്ങുണ്ടോ, അതോ വരുന്നതില്‍ നല്ലതു സ്വീകരിക്കുന്നു എന്ന രീതിയാണോ?

ഓരോ വര്‍ഷവും ഇത്ര സിനിമ ചെയ്യണം, ഇന്ന ക്യാരക്ടര്‍ ചെയ്യണം എന്നൊന്നും ഇതുവരെ പ്ലാന്‍ ചെയ്തിട്ടില്ല. ഇനി കൂടുതല്‍ സിലക്ടീവാകണമെന്നു കരുതി ബോധപൂര്‍വം സിനിമകള്‍ കുറച്ച ഒരു കാലഘട്ടം ഉണ്ടായിട്ടുണ്ട്. പക്ഷേ, പിന്നീട് എനിക്കു തോന്നി, ചെയ്യുന്നതെന്തായാലും സന്തോഷത്തോടെ ചെയ്യുകയെന്നതാണു വേണ്ടതെന്ന്. പാതിമനസ്സോടെ സിനിമ ചെയ്താല്‍ ശരിയാകില്ല. അങ്ങനെ കൂടുതല്‍ സിനിമകള്‍ കാണാന്‍ തുടങ്ങി. സിനിമകള്‍ തിരഞ്ഞെടുക്കാനുള്ള ആത്മവിശ്വാസവും വര്‍ധിച്ചു.


വിവാഹം കഴിയുമ്പോള്‍ നടിമാരില്‍ മിക്കവരും സിനിമയോടു വിട പറയുന്നതെന്തുകൊണ്ടാവാം?

സ്ത്രീകളോടുള്ള സമൂഹത്തിന്റെ മനോഭാവം തന്നെയാണു പ്രധാന കാരണം. വെറും കാഴ്ചവസ്തു എന്ന നിലയിലാണു സിനിമയിലും അവളുടെ സ്ഥാനം. നായകനെ മരംചുറ്റി പ്രണയിക്കുക, നൃത്തമാടുക എന്നതിനപ്പുറത്തേക്കു സ്ത്രീ കഥാപാത്രങ്ങള്‍ വളരുന്നില്ല. പ്രായമേറുന്നതും വിവാഹം കഴിച്ചു കുട്ടികളുണ്ടാകുന്നതുമൊന്നും നായകന്മാരുടെ കരിയറിനെ ബാധിക്കുന്നില്ല. എന്നാല്‍, നടിമാര്‍ തങ്ങളുടെ സൗന്ദര്യം പോയി, വിവാഹം കഴിഞ്ഞു തുടങ്ങിയ കാരണങ്ങള്‍ നിരത്തി സിനിമയില്‍നിന്നു വിട്ടുനില്‍ക്കുകയാണ്. കുടുംബത്തില്‍നിന്നു പിന്തുണയില്ലാത്തതും കാരണമാകാം. പക്ഷേ, എനിക്കു നല്ല സപ്പോര്‍ട്ട് ഉണ്ട്.

(കടപ്പാട് - മനോരമ)

  • ഞാന്‍ ഇപ്പോഴും മനസ്സുകൊണ്ട് സി.പി.എം. ആണ്- സിന്ധുജോയി
  • ഞാന്‍ ശബരിനാഥന്‍ എന്ന വ്യക്തിയെയാണ് ഇഷ്ടപ്പെടുന്നത്- ദിവ്യ എസ്. അയ്യര്‍
  • 'റോളിന് വേണ്ടി കിടക്ക പങ്കിടാന്‍ ആവശ്യപ്പെട്ടു'; മുതിര്‍ന്ന ആളുകളില്‍ നിന്നാണ് ഈ അനുഭവം - പാര്‍വതി
  • സമരക്കാരുടെ ആവശ്യം ലോ അക്കാഡമിയെ ലൗ അക്കാഡമിയാക്കാന്‍ - ലക്ഷ്‌മി നായര്‍
  • ലൈക്കുകളും കമന്റുകളും മാത്രം പോരാ, നമ്മളെല്ലാം പ്രതിരോധവും പ്രതിഷേധവും തീര്‍ക്കണം- അലന്‍സിയര്‍
  • ഞാന്‍ നല്ല തീരുമാനങ്ങള്‍ക്കൊപ്പം കുറച്ച് തെറ്റായ തീരുമാനങ്ങളും എടുത്തിരുന്നു- മീര ജാസ്മിന്‍
  • വിവാദം അത്ഭുതപ്പെടുത്തി; കേരളത്തിനായി മാന്ത്രികവിദ്യകളൊന്നും കാണിക്കാനില്ല - പ്രൊഫ. ഗീതാ ഗോപിനാഥ്
  • സോഷ്യല്‍ മീഡിയയിലെ ശല്യക്കാരെ നമ്മള്‍ വിചാരിച്ചാല്‍ നന്നാക്കാന്‍ പറ്റില്ല- ഷാലു കുര്യന്‍
  • സ്ത്രീ കള്ളുവാങ്ങുന്നതോ കുടിക്കുന്നതോ നിയമവിരുദ്ധമല്ല- ദേവി അജിത്ത്
  • സ്‌റ്റാറായി നിലകൊള്ളാനുള്ള കാര്യങ്ങളൊന്നും ഞാന്‍ ചെയ്‌തിട്ടില്ല- വിനീത്
  •  
        © 2012 ukmalayalamnews.com All rights reserved. Powered by Phoenix Infoway