നാട്ടുവാര്‍ത്തകള്‍

സിപിഎമ്മിലെ ചങ്കും കരളും വഴി പിരിയുമ്പോള്‍ .... ജയരാജനു കടിഞ്ഞാണിട്ടത് പിണറായി!


അടിമുടി പിണറായി ശൈലി, കണ്ണൂര്‍ രാഷ്ട്രീയത്തിലെ സിംഹം. പിണറായിക്കു ശേഷം പാര്‍ട്ടിയെ കൈപ്പിടിയിലൊതുക്കാനുള്ള സാമര്‍ഥ്യം....കോടിയേരിയെപ്പോലെ അനുസരണയുണ്ടാവില്ല... ഇതൊക്കെയാണ് പി ജയരാജന് വിനയായത്.. ലോക്കല്‍ സമ്മേളനത്തിനിടെ ജയരാജന് കടിഞ്ഞാണിട്ടത് പിണറായി വിജയനെന്ന ഇരട്ടച്ചങ്കന്റെ ബുദ്ധിയാണെന്ന നിഗമനത്തിലാണ് രാഷ്ട്രീയ കേരളം. പിണറായി സിപിഎമ്മിന്റെ ചങ്കാണെങ്കില്‍ കണ്ണൂര്‍ സിപിഎമ്മിന് ജയരാജന്‍ കരളാണ്. കേസുകളും എതിരാളികളുടെ വെല്ലുവിളികളും ചെറുത്ത് അനുദിനം കരുത്തനാവുന്ന നേതാവ്. ആരാധകബാഹുല്യം കൊണ്ടും നേതൃഗുണം കൊണ്ടും കടിഞ്ഞാണില്ലാത്ത കുതിരയായി പായുകയായിരുന്നു ജയരാജന്‍ . ആ ജയരാജനാണ് ഒരു കുരുക്ക് ഇട്ടിരിക്കുന്നത്. കണ്ണൂര്‍ ലോബി നിയന്ത്രിക്കുന്ന സിപിഎമ്മില്‍ കണ്ണൂരുകാരനായ സംസ്ഥാന സമിതി അംഗവും ജിലാ സെക്രട്ടറിയുമായ ജയരാജനെ വെട്ടിയൊതുക്കാന്‍ ശ്രമം നടന്നെങ്കില്‍ അതിനു പിണറായി വിജയന്റെ മൗനാനുവാദമോ ഇടപെടലോ ഉണ്ടെന്നു ഉറപ്പിക്കാം.


ഏറെ സ്വാധീനമുള്ള നേതാവായിട്ടും അഴിമതിയുടെ കറ പുരളാഞ്ഞിട്ടും . പാര്‍ട്ടിയുടെ ഔദാര്യമൊന്നും പറ്റാഞ്ഞിട്ടും ജയരാജനെ പാര്‍ട്ടി മൂക്കുകയറിട്ടു നിറുത്തുന്നതിനു കാരണം തിരയുമ്പോള്‍ ചെന്നെത്തുക ജയരാജന്‍ നാള്‍ക്കുനാള്‍ പാര്‍ട്ടിയില്‍ കരുത്തനും ശക്തനുമാവുന്നു എന്നതു തന്നെയാണ്. 2018 ഏപ്രിലില്‍ ഹൈദരാബാദിലാണ് ഇരുപത്തിരണ്ടാം പാര്‍ട്ടി കോണ്‍ഗ്രസ്. ഇപ്പോഴത്തെ നിലയിലും കരുത്തിലും പോയാല്‍ പാര്‍ട്ടിയില്‍ ശക്തരായ നേതാക്കളുടെ ഗണത്തില്‍ ജയരാജന്‍ മുന്നില്‍ വരും. സംസ്ഥാന സെക്രട്ടറിയാവാം. അതു പല നേതാക്കളുടെയും ഭാവിയിലേക്കുള്ള വളര്‍ച്ചയില്‍ വിലങ്ങുതടിയായി വരാം. ഇതെല്ലാം മുന്നില്‍ക്കണ്ടാണ് ജരാജനെ വെട്ടുന്നതെന്നാണ് സൂചന. ഇപ്പോള്‍ സംസ്ഥാന സെക്രട്ടറി കോടിയേരി ആണെങ്കിലും ഭരണത്തിലും പാര്‍ട്ടിയിലും പിടി പിണറായിക്കു തന്നെ. ജയരാജനായാല്‍ അങ്ങനെയാവില്ല സ്ഥിതി. രണ്ടു അധികാര കേന്ദ്രങ്ങളുണ്ടാവും. മുഖ്യമന്ത്രിക്ക് നിയന്ത്രണങ്ങള്‍ ഉണ്ടാകാം. ഇതെല്ലാം മുന്നില്‍ക്കണ്ട് ജയരാജനെ നേരത്തേ വെട്ടിയൊതുക്കുന്നുവെന്നാണ് വിലയിരുത്തല്‍ .



ജയരാജന്‍ അഴിമതിക്കു കൂട്ടുനില്ക്കുകയോ ചെയ്യുകയോ ഇല്ലെന്നതുപോലെ തന്നെ അദ്ദേഹത്തെ സ്വാധീനിച്ച് ഒതുക്കുകയും പ്രയാസമാണ്. അതുകൊണ്ടുതന്നെ നാളെ പാര്‍ട്ടി സെക്രട്ടറിയുടെ റോളിലേക്കു എത്തിപ്പെട്ടാല്‍ പലര്‍ക്കും അതു ബുദ്ധിമുട്ടുണ്ടാക്കും. കണ്ണൂരില്‍ ഏതു മുതിര്‍ന്ന നേതാക്കള്‍ പങ്കെടുക്കുന്ന ചടങ്ങിലും ഏറ്റവുമധികം കൈയടി ജയരാജനാണ്. പിണറായി പങ്കെടുക്കുന്ന പരിപാടിയില്‍പ്പോലും താരം ജയരാജന്‍ തന്നെ. ഇതൊക്കെ അദ്ദേഹത്തിനു വിനയായി വന്നിട്ടുണ്ട്.


ജയരാജനെ പ്രകീര്‍ത്തിച്ചുകൊണ്ടുള്ള ഡോക്യുമെന്ററിയും സംഗീത ആല്‍ബവും അദ്ദേഹം പാര്‍ട്ടിക്ക് അതീതനായി വളരുന്നുവെന്ന ധാരണ പരത്തിയെന്നാണ് സംസ്ഥാന കമ്മിറ്റി ആരോപിക്കുന്നത്. സംസ്ഥാന കമ്മിറ്റിയില്‍ തനിക്കെതിരായി വിമര്‍ശനം ഉണ്ടായിരുന്നുവെന്നും വിമര്‍ശനവും സ്വയം വിമര്‍ശനവുമില്ലെങ്കില്‍ കമ്യൂണിസ്റ്റ് പാര്‍ട്ടിയില്ലെന്നുമാണ് ജയരാജന്‍ പ്രതികരിച്ചത്.


എന്നെ വളര്‍ത്തിയത് പാര്‍ട്ടിയാണ്. ആ പാര്‍ട്ടിക്ക് എന്നെ വിമര്‍ശിക്കാനും അധികാരമുണ്ട്. വിമര്‍ശനത്തില്‍ ഉള്‍ക്കൊള്ളേണ്ടവ ഉള്‍ക്കൊണ്ട് മുന്നോട്ടു പോകും. സിപിഎം സംസ്ഥാനസമിതി യോഗത്തില്‍നിന്ന് ഇറങ്ങിപ്പോയെന്ന വാര്‍ത്ത ശരിയല്ല. ആല്‍ബം തയാറാക്കിയത് തന്നോട് ആലോചിച്ചിട്ടല്ല. കണ്ണൂര്‍ ജില്ലാഘടകത്തില്‍ നടക്കുന്നത് പാര്‍ട്ടി തീരുമാനിച്ച കാര്യങ്ങളാണ്. കണ്ണൂരിനു മാത്രമായി പ്രത്യേകതയൊന്നുമില്ലെന്നും ജയരാജന്‍ പറഞ്ഞു.


ജയരാജന്‍ ജില്ലാ സെക്രട്ടറിയായതില്‍ പിന്നെ സിപിഎമ്മിലേക്ക് മുസ്ലിം ലീഗില്‍ നിന്നും ബിജെപിയില്‍ നിന്നും പ്രവര്‍ത്തകര്‍ ഒഴുകിയെത്തിരുന്നു. ഇതിനു പിന്നില്‍ ജയരാജന്റെ കരുത്തുറ്റ സംഘടനാ പാടവം ഉണ്ടായിരുന്നു. പാര്‍ട്ടിലെ എല്ലാ ഘടകങ്ങളും മികച്ച പ്രവര്‍ത്തനമാണ് നടത്തുന്നതും.

തന്നെ വളര്‍ത്തിയ പാര്‍ട്ടിക്കു വിമര്‍ശിക്കാനും അധികാരമുണ്ടെന്നും പാര്‍ട്ടിയുടെ വിമര്‍ശനം ഉള്‍ക്കൊണ്ട് പ്രവര്‍ത്തിക്കുമെന്നും ജയരാജന്‍ പറയുമ്പോഴും അദ്ദേഹത്തെ പാര്‍ട്ടി വെട്ടിയൊതുക്കാന്‍ നടത്തുന്ന ശ്രമത്തില്‍ അമ്പരന്നിരിക്കുകയാണ് പ്രവര്‍ത്തകര്‍.

ഒരു നേതാവും പാര്‍ട്ടിക്ക് അതീതനല്ലെന്ന ശക്തമായ സന്ദേശമാണ് ഇതിലൂടെ പാര്‍ട്ടി നല്കുന്നതെന്ന് എന്നാണു പാര്‍ട്ടിക്കു വിധേയരായി പ്രവര്‍ത്തിക്കുന്ന നേതാക്കളുടെ ന്യായീകരണം.

  • തല്‍ക്കാലം ഒരു മുന്നണിയിലേക്കുമില്ലെന്ന് മാണി; സിപിഐ ശവക്കുഴിയില്‍ കിടക്കുന്ന പാര്‍ട്ടി
  • സുനന്ദ പുഷ്‌ക്കറിന്റെ മരണം: ശശി തരൂരിനെ ഫോറന്‍സിക് സൈക്കോളജിക്കല്‍ പരിശോധനയ്ക്ക് വിധേയമാക്കി
  • അമ്മയെ സ്വഭാവദൂഷ്യമുള്ളവളാക്കുന്നത് വേദനിപ്പിക്കുന്നെന്ന് ജിത്തുവിന്റെ സഹോദരി
  • നഷ്ടം തിട്ടപ്പെടുത്താനും സഭയുടെ ഭൂമി ഇടപാട് അന്വേഷിക്കാനും അഞ്ചംഗ സമിതി
  • ജിത്തുവിന്റെ കൊലപാതകം: ജയമോളുടെ മൊഴി കളവെന്ന് ജിത്തുവിന്റെ മുത്തച്ഛനും മുത്തശ്ശിയും
  • കുറ്റം ഏറ്റു പറഞ്ഞു ജയമോള്‍ കോടതിയില്‍ കുഴഞ്ഞു വീണു
  • ദിലീപിന് തിരിച്ചടി; കുറ്റപത്രം ചോര്‍ന്നെന്ന പരാതിയില്‍ അന്വേഷണമില്ല
  • ശ്രീജിത്തിന്റെ ഐതിഹാസിക സമരം ലക്ഷ്യത്തിലേക്ക്; ശ്രീജീവിന്റെ മരണം സിബിഐ അന്വേഷിക്കും
  • സ്വന്തം വിവാഹ മോചനത്തെക്കുറിച്ചു പ്രതിഭാ ഹരി
  • വൈദികനാവാന്‍ കൊതിച്ച ജിത്തുവിന് മാതാവ് കരുതിവച്ചതു ക്രൂരമായ മരണം; കൂസലില്ലാതെ പൊലീസിന് മുന്നില്‍ കൊലപ്പെടുത്തിയവിധം കാണിച്ച് ജയമോള്‍
  •  
        © 2012 ukmalayalamnews.com All rights reserved. Powered by Phoenix Infoway