2026ലെ ലോകത്തിലെ ഏറ്റവും ശക്തമായ പാസ്പോര്ട്ടുകളുടെ പട്ടിക ഹെന്ലി പാസ്പോര്ട്ട് ഇന്ഡെക്സ് പുറത്തുവിട്ടു. ബ്രക്സിറ്റിന് ശേഷം പാസ്പോര്ട്ടിന്റെ കരുത്ത് കുറയുന്നുവെന്ന സൂചനകളുമായി യുകെ 182 രാജ്യങ്ങളിലേക്കുള്ള വിസരഹിത പ്രവേശനത്തോടെ ഏഴാം സ്ഥാനത്താണ്. ഇന്ത്യ ടോപ് 10 പട്ടികയില് ഇടംനേടിയില്ല. അന്താരാഷ്ട്ര എയര് ട്രാന്സ്പോര്ട്ട് അസോസിയേഷന് (ഐഎടിഎ)യുടെ വിവരങ്ങളെ അടിസ്ഥാനമാക്കി 199 രാജ്യങ്ങളിലെ പാസ്പോര്ട്ടുകളും 227 യാത്രാ ലക്ഷ്യസ്ഥാനങ്ങളും വിലയിരുത്തിയാണ് റാങ്കിങ് തയാറാക്കിയിരിക്കുന്നത്.
തുടര്ച്ചയായ മൂന്നാം വര്ഷവും സിംഗപ്പൂര് ലോകത്തിലെ ഏറ്റവും ശക്തമായ പാസ്പോര്ട്ടായി ഒന്നാം സ്ഥാനം നിലനിര്ത്തി. 192 രാജ്യങ്ങളിലേക്കാണ് സിംഗപ്പൂര് പാസ്പോര്ട്ടിന് വിസയില്ലാതെ പ്രവേശനം സാധ്യമാകുന്നത്. ജപ്പാനും ദക്ഷിണ കൊറിയയും 188 രാജ്യങ്ങളിലേക്കുള്ള പ്രവേശനത്തോടെ രണ്ടാം സ്ഥാനം പങ്കിട്ടു. ഡെന്മാര്ക്ക്, ലക്സംബര്ഗ്, സ്പെയിന്, സ്വീഡന്, സ്വിറ്റ്സര്ലാന്ഡ് എന്നിവ 186 രാജ്യങ്ങളുമായി മൂന്നാം സ്ഥാനത്താണ്.
ഓസ്ട്രിയ, ബെല്ജിയം, ഫിന്ലന്ഡ്, ഫ്രാന്സ്, ജര്മനി, ഗ്രീസ്, അയര്ലന്ഡ്, ഇറ്റലി, നെതര്ലന്ഡ്സ്, നോര്വേ എന്നിവ നാലാം സ്ഥാനവും ഹംഗറി, പോര്ച്ചുഗല്, സ്ലോവാക്യ, സ്ലോവീനിയ, യുഎഇ എന്നിവ അഞ്ചാം സ്ഥാനവും നേടി. അമേരിക്കന് പാസ്പോര്ട്ട് പട്ടികയില് വീണ്ടും പിന്നോട്ട് പോയി പത്താം സ്ഥാനത്തായി.
അമേരിക്കന് പാസ്പോര്ട്ടിന് 179 രാജ്യങ്ങളിലേക്കാണ് വിസരഹിത യാത്ര സാധ്യമാകുന്നത്. മുന്വര്ഷങ്ങളെ അപേക്ഷിച്ച് യുഎസിനും യുകെയ്ക്കും ഇത് ശ്രദ്ധേയമായ ഇടിവാണെന്ന് റിപ്പോര്ട്ട് വിലയിരുത്തുന്നു.
