ദോഹ: ഫുട്ബാള് ലോകകപ്പില് ചരിത്രത്തിലാദ്യമായി മലയാളി താരം. കഴിഞ്ഞ ദിവസം പ്രഖ്യാപിച്ച 26 അംഗ ഖത്തര് ടീമില് കണ്ണൂര് സ്വദേശിയായ തഹ്സിന് മുഹമ്മദ് ജംഷീദ് എന്ന 19കാരനുമുണ്ട്.
കാലിക്കറ്റ് യൂണിവേഴ്സിറ്റി മുന് ഫുട്ബാള് താരമായിരുന്ന ജംഷീദിന്റെയും വളപട്ടണം സ്വദേശി ഷൈമയുടെയും രണ്ടാമത്തെ മകനാണ് തഹ്സിന്. 1996ല് ഖത്തറിലേക്ക് കുടിയേറിയ ജംഷീദ് നിലവില് ചീഫ് അക്കൗണ്ടന്റാണ്. ഖത്തറിലാണ് തഹ്സിന് ജനിച്ചതും വളര്ന്നതും. പിതാവിനൊപ്പം പന്തുതട്ടിത്തുടങ്ങിയ തഹ്സിന് ആസ്പെയര് അക്കാഡമിയിലൂടെയാണ് സ്ട്രൈക്കറായി പയറ്റിത്തെളിഞ്ഞത്.
ഖത്തറിന്റെ ജൂനിയര്, യൂത്ത് ടീമുകളില് മികവുകാട്ടി 17-ാം വയസില് അല് ദുഹൈല് ക്ളബിലെത്തി. ഖത്തര് സ്റ്റാര്സ് ലീഗില് കളിച്ച ആദ്യ ഇന്ത്യക്കാരനെന്ന ഖ്യാതിയും സ്വന്തമാക്കി. ഖത്തര് ദേശീയ ടീമിനായി അണ്ടര് 16, അണ്ടര് 17, അണ്ടര് 19 വിഭാഗങ്ങളിലും കളിച്ചിട്ടുണ്ട്. 2024 ജൂണില് ലോകകപ്പ് യോഗ്യതാറൗണ്ടില് അഫ്ഗാനിസ്ഥാനെതിരായ മത്സരത്തിലാണ് തഹ്സിന് ഖത്തറിന്റെ സീനിയര് കുപ്പായത്തില് അരങ്ങേറിയത്.
വളപട്ടണത്തെ പുരാതന തറവാടായ ചങ്ങളാംചാലിപ്പുറത്ത് (കൊട്ടക്കാന്റെവീട്) കുടുംബത്തിലെ കണ്ണിയാണ് തഹ്സിന്. പിതാവ് ജംഷീദിനും മാതാവ് ഷൈമയ്ക്കുമൊപ്പം അവധിക്ക് നാട്ടിലെത്തുമ്പോള് ബന്ധുക്കളെയും സുഹൃത്തുക്കളെയും കാണാനും പന്തുതട്ടാനും തഹ്സിന് മറക്കാറില്ല. നാലുവര്ഷം മുമ്പ് അമ്മൂമ്മ റംലത്ത് മരിച്ചപ്പോഴാണ് ഒടുവില് നാട്ടിലെത്തിയത്.
പരിക്കുകാരണം കരിയര് പൂര്ത്തിയാക്കാനാകാതെ പോയ ജംഷീദിന്റെ സ്വപ്നങ്ങളാണ് മകനിലൂടെ പൂവണിയുന്നത്. മുന് കേരള യൂത്ത് താരവും കാലിക്കറ്റ് സര്വകലാശാല ടീമിന്റെ ഉപനായകനുമായിരുന്നു ജംഷീദ്. കണ്ണൂര് എസ്.എന് കോളേജില് പഠിക്കവേയാണ് കാലിക്കറ്റ് യൂണിവേഴ്സിറ്റി ടീമില് കളിച്ചത്.
