ഹെന്റി നൊവാക്ക് കൊലക്കേസ്; പ്രതിയ്ക്ക് നല്കിയിരിക്കുന്ന ശിക്ഷ കുറഞ്ഞുപോയെന്ന്- അപ്പീല് കോടതിയിലേക്ക് റഫര് ചെയ്തു
യുകെയില് 18 കാരനായ ഹെന്റി നൊവാക്കിനെ കുത്തി കൊലപ്പെടുത്തിയ കേസില് പ്രതി വിക്രം ഡിഗ്വയ്ക്ക് വിധിച്ച ശിക്ഷ കുറഞ്ഞുപോയെന്ന രീതിയില് പുന: പരിശോധിക്കാനായി കേസ് അപ്പീല് കോടതിയിലേക്ക് റഫര് ചെയ്തു. 23 കാരനായ ഡിഗ്വയ്ക്ക് ജീവപര്യന്തം തടവാണ് വിധിച്ചത്. 21 വര്ഷം ജയിലില് കഴിയണമെന്നതാണ് ശിക്ഷ.
കുത്തി കൊലപ്പെടുത്താനുപയോഗിച്ച കത്തി തന്റെ സിഖ് മതാചാരത്തിന്റെ ഭാഗമായി കൈവശം വച്ചതെന്ന് പ്രതി പറഞ്ഞു.
ഹെന്റി നൊവാക്കിന്റെ കൊലപാതകം യുകെ മുഴുവന് ചര്ച്ചയായ സംഭവമാണ്. ഇതിന് കുറവായ ശിക്ഷ നല്കുന്നത് തെറ്റാണെന്ന് സോളിസിറ്റര് ജനറല് എല്ലി റീവ്സ് പറഞ്ഞു. കൊലപാതകത്തിന് ശേഷം ഡിഗ്വ, ഹെന്റി നൊവാക്ക് തനിക്കെതിരെ വംശീയ ആക്രമണം നടത്തിയെന്ന് വ്യാജ ആരോപണം ഉന്നയിച്ചിരുന്നു. ഇതേ തുടര്ന്ന് ഗുരുതരമായി പരിക്കേറ്റ് മരണക്കിടക്കയില് കിടന്നിരുന്ന ഹെന്റിയെ പൊലീസ് കൈവിലങ്ങ് അണിയിച്ചതും വലിയ വിവാദമായി.
കേസിന്റെ പശ്ചാത്തലത്തില് പൊലീസിനെതിരെ ശക്തമായ വിമര്ശനങ്ങളും പ്രതിഷേധങ്ങളും ഉയര്ന്നിരുന്നു. ഹെന്റി നൊവാക്കിന്റെ മൊഴി പൊലീസ് വിശ്വസിച്ചില്ലെന്നും, അദ്ദേഹം വെള്ളക്കാരനായതിനാലാണ് ഇത്തരമൊരു സമീപനം ഉണ്ടായതെന്നുമുള്ള ആരോപണങ്ങളും ഉയര്ന്നു.
അപ്പീല് കോടതി കേസ് പരിശോധിച്ച് നിലവിലെ ശിക്ഷ വര്ധിപ്പിക്കേണ്ടതുണ്ടോ എന്ന കാര്യത്തില് അന്തിമ തീരുമാനം എടുക്കും.
