എബോള രോഗവ്യാപനത്തിന്റെ പശ്ചാത്തലത്തില്‍ ഇന്ത്യ പ്രതിരോധ നടപടികള്‍ ശക്തമാക്കി. ഇതിന്റെ ഭാഗമായി, വിദേശരാജ്യങ്ങളില്‍ നിന്ന് ഇന്ത്യയിലേക്ക് എത്തുന്ന എല്ലാ അന്താരാഷ്ട്ര യാത്രക്കാരും വിമാനത്തില്‍ കയറുന്നതിന് മുമ്പ് 'എയര്‍ സുവിധ 2.0' പോര്‍ട്ടലില്‍ ഓണ്‍ലൈന്‍ ആരോഗ്യ പ്രഖ്യാപന ഫോം നിര്‍ബന്ധമായും പൂരിപ്പിക്കണമെന്ന് കേന്ദ്ര സര്‍ക്കാര്‍ നിര്‍ദേശിച്ചു.
കോവിഡ് കാലത്ത് ഉപയോഗിച്ചിരുന്ന എയര്‍ സുവിധ സംവിധാനം കൂടുതല്‍ നവീകരിച്ചാണ് 'എയര്‍ സുവിധ 2.0' വീണ്ടും പ്രവര്‍ത്തനക്ഷമമാക്കിയത്. വിമാനത്താവളങ്ങളിലെ പേപ്പര്‍ ഫോമുകള്‍ ഒഴിവാക്കി യാത്രക്കാരുടെ വിവരങ്ങള്‍ ഡിജിറ്റലായി ശേഖരിക്കാനാണ് പുതിയ സംവിധാനത്തിന്റെ ലക്ഷ്യം.
യാത്രക്കാര്‍ ചെയ്യേണ്ടത്
ഇന്ത്യയിലേക്ക് യാത്ര തിരിക്കുന്നതിന് 24 മണിക്കൂര്‍ മുമ്പ് വരെ ഫോം സമര്‍പ്പിക്കാം.
വിമാനത്തില്‍ കയറുന്നതിന് മുമ്പോ വെബ് ചെക്ക്-ഇന്‍ സമയത്തോ ഫോം പൂരിപ്പിക്കണം.
കഴിഞ്ഞ 21 ദിവസത്തെ യാത്രാ ചരിത്രം, എബോള ബാധിത രാജ്യങ്ങള്‍ സന്ദര്‍ശിച്ചിട്ടുണ്ടോ, രോഗലക്ഷണങ്ങള്‍ ഉണ്ടോ തുടങ്ങിയ വിവരങ്ങള്‍ രേഖപ്പെടുത്തണം.
ഫോം സമര്‍പ്പിച്ച ശേഷം ലഭിക്കുന്ന ഡിജിറ്റല്‍ കോപ്പി മൊബൈല്‍ ഫോണില്‍ സൂക്ഷിച്ചാല്‍ മതി.
ഇന്ത്യയിലെ വിമാനത്താവളത്തില്‍ എത്തിയാല്‍ ഇന്റര്‍നാഷണല്‍ ട്രാവല്‍ ഹെല്‍ത്ത് ഡെസ്‌കിലോ ഇമിഗ്രേഷന്‍ കൗണ്ടറിലോ ഡിജിറ്റല്‍ കോപ്പി കാണിച്ചാല്‍ മതിയാകും. പേപ്പര്‍ ഫോം പൂരിപ്പിക്കേണ്ടതില്ല.
പുതിയ സംവിധാനത്തിലൂടെ എബോള ബാധിത പ്രദേശങ്ങളില്‍ നിന്ന് വരുന്ന യാത്രക്കാരെ വേഗത്തില്‍ തിരിച്ചറിയാനും ആരോഗ്യ നിരീക്ഷണം കാര്യക്ഷമമാക്കാനും വിമാനത്താവളങ്ങളിലെ തിരക്ക് കുറയ്ക്കാനും സാധിക്കുമെന്ന് കേന്ദ്ര ആരോഗ്യ മന്ത്രാലയം അറിയിച്ചു.
