തൊഴില്‍ ചെയ്യാന്‍ പിന്തുണയ്ക്കായി ക്ഷേമ ആനുകൂല്യങ്ങളില്‍ വലിയ മാറ്റങ്ങള്‍ക്ക് ഒരുങ്ങി ബ്രിട്ടീഷ് സര്‍ക്കാര്‍. ഇതിന്റെ ഭാഗമായി 25 വയസിന് താഴെയുള്ളവര്‍ക്ക് ലഭിക്കുന്ന പ്രധാന വൈകല്യ ആനുകൂല്യങ്ങളില്‍ ഒന്നായ പേഴ്‌സണല്‍ ഇന്‍ഡിപെന്‍ഡന്‍സ് പേയ്മെന്റ് (പിഐപി )ഒഴിവാക്കി, പകരം തൊഴില്‍ മേഖലയിലേക്ക് പ്രവേശിക്കാന്‍ സഹായിക്കുന്ന കോടിക്കണക്കിന് പൗണ്ടിന്റെ പുതിയ പദ്ധതിയുമായി മുന്നോട്ടുപോകാനാണ് നീക്കം.
കൂടുതല്‍ ആനുകൂല്യ ഗുണഭോക്താക്കളെ തൊഴില്‍ മേഖലയിലേക്ക് തിരിച്ചെത്തിക്കുകയാണ് പദ്ധതിയുടെ പ്രധാന ലക്ഷ്യം.
എന്നാല്‍ നീക്കം രാഷ്ട്രീയമായി വലിയ വെല്ലുവിളികള്‍ക്ക് വഴിവെച്ചേക്കാം. കഴിഞ്ഞ വര്‍ഷം ക്ഷേമ ആനുകൂല്യങ്ങളില്‍ മാറ്റം വരുത്താനുള്ള സര്‍ക്കാരിന്റെ നീക്കത്തിനെതിരെ ലേബര്‍ എംപിമാര്‍ക്കിടയില്‍ ശക്തമായ എതിര്‍പ്പ് ഉയര്‍ന്നിരുന്നു.
രോഗികള്‍ക്കും വൈകല്യമുള്ളവര്‍ക്കും അധിക പിന്തുണാ ചെലവുകള്‍ക്കായി നല്‍കുന്ന, വരുമാനപരിധി അടിസ്ഥാനമാക്കിയല്ലാത്ത ആനുകൂല്യമാണ് പേഴ്‌സണല്‍ ഇന്‍ഡിപെന്‍ഡന്‍സ് പേയ്മെന്റ് പുതിയ പരിഷ്‌കരണങ്ങളില്‍ ഇതിന്റെ ഘടനയിലും അര്‍ഹതാ മാനദണ്ഡങ്ങളിലും മാറ്റങ്ങള്‍ വരുത്തുമോ എന്നതും അന്തിമ റിപ്പോര്‍ട്ടുകള്‍ക്ക് ശേഷം വ്യക്തമാകും.
