പുരാവസ്തു തട്ടിപ്പുകാരന് മോന്സണ് മാവുങ്കലുമായുള്ള ബന്ധത്തിന്റെ പേരില് നടന് മോഹന്ലാലിനെ ചോദ്യംചെയ്യുന്നതു നീളും. കേസന്വേഷിക്കുന്ന രണ്ട് ഉദ്യോഗസ്ഥരെ അടിയന്തരമായി ഡല്ഹിയ്ക്കു വിളിപ്പിച്ച സാഹചര്യത്തിലാണിത്. ഈയാഴ്ച ചോദ്യംചെയ്യലിനു ഹാജരാകാന് ഇ.ഡി കഴിഞ്ഞാഴ്ച മോഹന്ലാലിനു നോട്ടീസ് അയച്ചിരുന്നു. കൊച്ചിയിലെ ഇ.ഡി. മേഖലാ ഓഫീസില് നേരിട്ട് എത്തണമെന്നായിരുന്നു നിര്ദേശം.
അതേസമയം മോഹന്ലാല് നേരിട്ടു ഹാജരാകാന് സാധ്യതയില്ലെന്നും അഭിഭാഷകന് ഹാജരായി വിശദീകരണം നല്കുമെന്നാണ് വിവരം. അഭിഭാഷകന്റെ വിശദീകരണം തൃപ്തികരമല്ലെങ്കിലേ മോഹന്ലാല് നേരിട്ടു ഹാജരാകേണ്ടി വരൂവെന്നാണു വിലയിരുത്തല്. മോന്സണ് കേസിനു പുറമേ കള്ളപ്പണം വെളുപ്പിക്കലുമായി ബന്ധപ്പെട്ടു മറ്റൊരു കേസില്ക്കൂടി മോഹന്ലാലിന്റെ മൊഴിയെടുക്കേണ്ടതു അനിവാര്യമാണെന്നാണ് ഇ.ഡി. വൃത്തങ്ങള് നല്കുന്ന സൂചന.
മോന്സണ് മാവുങ്കലിന്റെ കലൂരിലെ വീട്ടില് മോഹന്ലാല് എത്തിയിട്ടുണ്ടെന്ന് ഇ.ഡിക്കു മൊഴി ലഭിച്ചിരുന്നു. മോന്സണുമായി അടുത്തബന്ധം സൂക്ഷിച്ചിരുന്ന നടന് ബാലയാണ് മോഹന്ലാലിനെ ഇവിടെ കൊണ്ടുവന്നതെന്നാണു മൊഴിയില് പറഞ്ഞിരുന്നത്.