ഹാരി രാജകുമാരനും, മെഗാന്‍ മാര്‍ക്കിളുമായി ഓണ്‍ലൈന്‍ സ്ട്രീമിംഗ് വമ്പനായ നെറ്റ്ഫ്‌ളിക്‌സ് കരാര്‍ ഒപ്പുവെച്ചിരിക്കുന്നത് 100 മില്ല്യണ്‍ ഡോളറിനാണ്. ഇതിന്റെ ഭാഗമായി ഇവരുടെ ജീവിതരീതി പകര്‍ത്താന്‍ വീട്ടിലും നെറ്റ്ഫ്‌ളിക്‌സ് ക്യാമറ ഘടിപ്പിച്ചിരിക്കുകയാണെന്നാണ്‌ റിപ്പോര്‍ട്ട്.
വീട്ടില്‍ നിന്നുള്ള ദൃശ്യങ്ങള്‍ ഡോക്യുസീരിസായി പ്രദര്‍ശിപ്പിക്കുകയാണ് ഉദ്ദേശം. ഇതോടെ ഹാരിയുടെയും, മെഗാന്റെയും ബംഗ്ലാവ് ഒരു റിയാലിറ്റി ഷോയില്‍ പങ്കെടുക്കുന്ന അവസ്ഥയിലാണെന്ന് സ്രോതസുകള്‍ പറയുന്നു. എന്നാല്‍ കുടുംബത്തിനകത്ത് പറയുന്ന കാര്യങ്ങളില്‍ രാജകുടുംബവുമായി ബന്ധപ്പെട്ട വിഷയങ്ങള്‍ ഉള്‍പ്പെട്ടാല്‍ അത് വിവാദമാകും.
ഏതാനും മാസങ്ങളായി ഡ്യൂക്ക്, ഡച്ചസ് സ്റ്റൈല്‍ ഷോയ്ക്കായി സസെക്‌സ് ദമ്പതികളുടെ വീട്ടില്‍ പ്രൊഡക്ഷന്‍ ടീം നിലയുറപ്പിച്ചതായി പേജ് സിക്‌സ് റിപ്പോര്‍ട്ട് ചെയ്യുന്നത്. ഹാരി രാജകുമാരന്റെ ഓര്‍മ്മക്കുറിപ്പുകള്‍ പുസ്തക രൂപത്തില്‍ ഇറങ്ങുന്ന വര്‍ഷാവസാനത്തില്‍ തന്നെ ഈ പരിപാടി റിലീസ് ചെയ്യാമെന്നാണ് നെറ്റ്ഫ്‌ളിക്‌സ് പ്രതീക്ഷിക്കുന്നത്.
ദമ്പതികളുടെ ഡോക്യുസീരീസില്‍ ബക്കിംഗ്ഹാം കൊട്ടാരത്തിന് ആശങ്കയുണ്ട്. രാജകുടുംബത്തെ ക്യാമറകള്‍ക്ക് മുന്നില്‍ ഏത് വിധത്തിലാകും അവതരിപ്പിക്കുകയെന്ന ചോദ്യമുണ്ട്. കഴിഞ്ഞ വര്‍ഷം ന്യൂയോര്‍ക്കിലേക്ക് യാത്ര ചെയ്തപ്പോഴും ക്യാമറകള്‍ ഇവരുടെ പിന്നാലെയുണ്ടായിരുന്നു.
