ലണ്ടന്‍ നഗരത്തില്‍ സ്ത്രീകള്‍ മാത്രമല്ല പുരുഷന്മാരും സുരക്ഷിതരല്ല. നൈറ്റ് ഔട്ട് കഴിഞ്ഞ് മടങ്ങിയ ഒരു യുവാവ് വടക്കന്‍ ലണ്ടനില്‍ ബലാത്സംഗത്തിന് ഇരയായി എന്നതാണ് പുതിയ വാര്‍ത്ത. ഇതുമായി ബന്ധപ്പെട്ട് സംശയിക്കപ്പെടുന്ന പ്രതിയുടെ ചിത്രം പോലീസ് പുറത്തുവിട്ടിട്ടുണ്ട്.
സെപ്റ്റംബര്‍ 6 ന് ആയിരുന്നു സംഭവം . സുഹൃത്തുക്കളുമൊത്തുള്ള നൈറ്റ് ഔട്ട് കഴിഞ്ഞ് യുവാവ് തിരികെ മടങ്ങവെ എഡ്ജ്‌വെയര്‍ ട്യുബ് സ്റ്റേഷന് പുറത്ത് വച്ചായിരുന്നു ആക്രമണം. സ്റ്റേഷനടുത്തുള്ള ഒരു കാര്‍ പാര്‍ക്കില്‍ വെച്ചായിരുന്നു ബലാത്സംഗം ചെയ്തത്. ഇര ഉടന്‍ തന്നെ പോലീസില്‍ റിപ്പോര്‍ട്ട് ചെയ്യുകയായിരുന്നു.
അന്വേഷണം തുടരുന്നതിനിടെ പ്രത്യേകം പരിശീലനം സിദ്ധിച്ച ഉദ്യോഗസ്ഥര്‍ ഇരയ്ക്ക് ആവശ്യമായ കൗണ്‍സിലിംഗ് നല്‍കുന്നുണ്ടെന്നും പോലീസ് അറിയിച്ചു. അന്വേഷണത്തിന്റെ ഭാഗമായിട്ടായിരുന്നു പോലീസ് ഇന്നലെ പ്രതിയെന്ന് സംശയിക്കുന്ന വ്യക്തിയുടെ ചിത്രം പുറത്തുവിട്ടത്. ഇരുണ്ട മുടിയും മീശയുമുള്ള അയാള്‍ ഒരു ചിത്രത്തില്‍ വെളുത്ത പോളോ ഷര്‍ട്ടാണ് ധരിച്ചിരിക്കുന്നത്. മറ്റൊരു ചിത്രത്തില്‍ ഇരുണ്ട ജാക്കറ്റും മറ്റൊന്നില്‍ കറുപ്പ്നിറമുള്ള ബാക്ക്പാക്കും നീല ജീന്‍സും ധരിച്ചിട്ടുമുണ്ട്.
ഈ വ്യക്തിയെ തിരിച്ചറിയാവുന്നവരോ, തിരിച്ചറിയാന്‍ സഹായിക്കാന്‍ കഴിയുന്നവരോ 101 എന്ന നമ്പറിലോ ഈ മെയില്‍ വഴിയോ പോലീസിനെ അറിയിക്കാന്‍ ആവശ്യപ്പെട്ടിട്ടുണ്ട്. സി എ ഡി 3688/15എസ് ഇ പി 23 എന്ന റഫറന്‍സ് നമ്പര്‍ പരാമര്‍ശിച്ചിട്ടു വേണം വിശദാംശങ്ങള്‍ പങ്കുവയ്ക്കാന്‍. വിവരം നല്‍കുമ്പോള്‍, നിങ്ങളുടെ ഐഡന്റിറ്റി വെളിപ്പെടുത്താന്‍ ആഗ്രഹിക്കുന്നില്ലെങ്കില്‍ 0800 555 111 എന്ന നമ്പറില്‍ ക്രൈം സ്റ്റോപ്പേഴ്‌സ് എന്ന ചാരിറ്റിയുമായി ബന്ധപ്പെട്ട് വിവരങ്ങള്‍ കൈമാറാം.
