സെലിബ്രിറ്റികളുടെ ഡീപ് ഫേക്ക് വീഡിയോകള്‍ പ്രചരിപ്പിക്കുന്നത് സമീപകാലത്ത് വലിയ വാര്‍ത്തകളായിരുന്നു. ഒര്‍ജിനല്‍ വീഡിയോയില്‍ നിന്നും എ ഐ സാങ്കേതികവിദ്യ ഉപയോഗിച്ച് ചെറിയ മാറ്റങ്ങള്‍ വരുത്തിയാണ് ഇത്തരം ഡീപ് ഫേക്ക് വീഡിയോകള്‍ നിര്‍മ്മിക്കുന്നത്. സമീപകാലത്ത് രശ്മിക മന്ദാന, കാജോള്‍, കത്രീന കൈഫ് തുടങ്ങീ നിരവധി താരങ്ങളാണ് ഡീപ് ഫേക്കിന് ഇരയായത്.
ബോളിവുഡ് താരം ആലിയ ഭട്ടും ഡീപ് ഫേക്ക് വീഡിയോക്ക് ഇരയായിരിക്കുകയാണ്. സോഷ്യല്‍ മീഡിയ ഇന്‍ഫ്ലുവന്‍സറായ ഒരു യുവതിയുടെ വീഡിയോ എഡിറ്റ് ചെയ്ത് ആലിയയുടേതാണെന്ന വ്യാജേന സോഷ്യല്‍ മീഡിയയിലൂടെ പ്രചരിക്കുകയാണ് ഇപ്പോള്‍.
ഒരു ലക്ഷം വരെ പിഴയും മൂന്ന് വര്ഷം വരെ തടവും ലഭിക്കാവുന്ന കുറ്റമാണ് ഡീപ് ഫേക്ക് വീഡിയോകള്‍ നിര്‍മ്മിക്കുകയും പ്രചരിപ്പിക്കുകയും ചെയ്യുന്നതിലൂടെ കുറ്റവാളിക്ക് മേല്‍ ചുമത്തുന്നത്.
രശ്മിക മന്ദാനയുടെ ഡീപ് ഫേക്ക് വീഡിയോ പ്രചരിപ്പിച്ചതുമായി ബന്ധപ്പെട്ട് ബീഹാര്‍ യുവാവിനെ ചോദ്യം ചെയ്തെങ്കിലും അന്വേഷണത്തില്‍ കാര്യമായ പുരോഗതിയൊന്നും പിന്നീട് ഉണ്ടായില്ല. എ ഐ സാങ്കേതികവിദ്യയുടെ ദുരുപയോഗമാണ് ഇത്തരത്തില്‍ ഡീപ് ഫേക്ക് വീഡിയോകള്‍ പ്രചരിപ്പിക്കാന്‍ പ്രേരിപ്പിക്കുന്നത്.
