തൃശൂര്: തൃശൂരില് കുപ്രസിദ്ധ ഗുണ്ടാത്തലവന്റെ ' ആവേശം ' സിസിമ മോഡല് പാര്ട്ടി. നാല് കൊലപാതക കേസുകളില് അടക്കം പ്രതിയായ ഗുണ്ടാത്തലവന് അനൂപാണ് പാര്ട്ടി നടത്തിയത്. ജയിലില് നിന്നിറങ്ങിയതിന്റെ ആഹ്ലാദം പങ്കുവയ്ക്കാന് നടത്തിയ പാര്ട്ടിയില് നിരവധി കൊടും ക്രിമിനലുകള് അടക്കം അറുപതോളം പേരാണ്പങ്കെടുത്തത്.
അവണൂര്, വരടിയം, കുറ്റൂര്, കൊട്ടേക്കാട് മേഖലകളില് ഭീതി സൃഷ്ടിച്ച പല ഗുണ്ടാ ആക്രമണക്കേസുകളിലും പങ്കെടുത്ത സംഘത്തിലെ അനൂപിനെ കൊലപാതകക്കേസില് കോടതി വിട്ടയച്ചിരുന്നു. അടുത്തിടെ റിലീസായ ആവേശം സിനിമയിലെ രംഗണ്ണന്റെ ‘എട മോനേ...’ എന്ന ഹിറ്റ് ഡയലോഗിന്റെ അകമ്പടിയോടെ റീലുകളാക്കി സമൂഹമാധ്യമങ്ങളിലൂടെ ഈ പാര്ട്ടിയുടെ ദൃശ്യങ്ങള് ഇവര് പോസ്റ്റ് ചെയ്തിട്ടുണ്ട്. ആഡംബരക്കാറില് കൂളിങ് ഗ്ലാസ് ധരിച്ച് ഇയാള് വന്നിറങ്ങുന്നതും കൂട്ടാളികള് സ്വാഗതം ചെയ്യുന്നതും റീലില് കാണാം. പാര്ട്ടിയിലേക്കു മദ്യക്കുപ്പികള് കൊണ്ടുപോകുന്നത് അടക്കം റീലുകളിലുണ്ട്.
അറുപതിലേറെ പേര് പാടത്ത് തമ്പടിച്ചതറിഞ്ഞ് പോലീസ് വന്നതും സാമുഹ്യമാധ്യങ്ങളില് പ്രചരിപ്പിക്കുന്ന വിഡിയോ ദൃശ്യങ്ങളില് കാണാം. ജില്ലയില് ക്വട്ടേഷന്, ഗുണ്ടാ ആക്രമണങ്ങള് വ്യാപകമായിരുന്നെങ്കിലും ഇടക്കാലത്തു നിലച്ചിരുന്നു. സമീപകാലത്തായി വീണ്ടും ഗുണ്ടാസംഘങ്ങള് വ്യാപകമായിരിക്കുകയാണ്.
