വിദ്യാര്‍ത്ഥിനികളുടെ ചിത്രങ്ങള്‍ അശ്ലീല വെബ്‌സൈറ്റുകളിലും സാമൂഹ്യ മാധ്യമ ഗ്രൂപ്പുകളിലും പ്രചരിപ്പിച്ച സംഭവത്തില്‍ മുന്‍ എസ്എഫ്‌ഐ പ്രവര്‍ത്തകന്‍ അറസ്റ്റില്‍. കാലടി ശ്രീശങ്കര കോളേജിലെ മുന്‍ വിദ്യാര്‍ത്ഥി രോഹിത്തിനെതിരെ കോളേജിലെ ബിരുദ വിദ്യാര്‍ത്ഥിനിയുടെ പരാതിയിലാണ് പൊലീസ് കേസെടുത്തത്.
പഠനകാലത്ത് ക്യാമ്പസില്‍ നിന്ന് പകര്‍ത്തിയ ചിത്രങ്ങളാണ് പ്രതി അശ്ലീല സൈറ്റുകളില്‍ പ്രചരിപ്പിച്ചത്. കഴിഞ്ഞ വര്‍ഷം കോളേജ് യൂണിയന്‍ തിരഞ്ഞെടുപ്പ് കാലത്ത് പകര്‍ത്തിയതാണ് ചിത്രങ്ങള്‍. ഇത്തരത്തില്‍ പകര്‍ത്തിയ ചിത്രങ്ങള്‍ പിന്നീട് അശ്ലീല ചുവയുള്ള ക്യാപ്ഷനുകളോടെയാണ് ഫേസ്ബുക്ക് ഗ്രൂപ്പുകളില്‍ ഉള്‍പ്പെടെ പ്രതി പ്രചരിപ്പിച്ചത്.
ചിത്രങ്ങള്‍ ശ്രദ്ധയില്‍പ്പെട്ട വിദ്യാര്‍ത്ഥിനി ഇയാള്‍ക്കെതിരെ തെളിവുകള്‍ സഹിതം നല്‍കിയാണ് പൊലീസില്‍ പരാതി നല്‍കിയത്. തുടര്‍ന്ന് നടത്തിയ അന്വേഷണത്തിലാണ് പ്രതിയെ പൊലീസ് പിടികൂടിയത്. ഇയാളില്‍ നിന്ന് രണ്ട് മൊബൈല്‍ ഫോണുകളും പൊലീസ് പിടിച്ചെടുത്തു. വ്യാജ ഫേസ്ബുക്ക് പ്രൊഫൈലുകളിലൂടെയാണ് പ്രതി ചിത്രങ്ങള്‍ പ്രചരിപ്പിച്ചത്. നിലവില്‍ ഇയാള്‍ക്കെതിരെ ആറ് പെണ്‍കുട്ടികളാണ് പരാതി നല്‍കിയിരിക്കുന്നത്.
