കാഠ്മണ്ഡു: നേപ്പാളില് ടേക്ക് ഓഫിനിടെ വിമാനം തകര്ന്നുവീണ് 18 മരണം. കാഠ്മണ്ഡുവിലെ ത്രിഭുവന് അന്താരാഷ്ട്ര വിമാനത്താവളത്തില് നിന്ന് പറന്നുയരുന്നതിനിടെ റണ്വേയില്നിന്ന് തെന്നിമാറിയ വിമാനം താഴ്ചയിലേക്ക് പതിച്ച് കത്തുകയായിരുന്നു. 18 പേരുടെ മൃതദേഹം കണ്ടെത്തിയതായും പൈലറ്റ് ഗുരുതരാവസ്ഥയിലാണെന്നും നേപ്പാളി മാധ്യങ്ങള് റിപ്പോര്ട്ടു ചെയ്തു.
പൊഖാറയിലേക്ക് പുറപ്പെട്ട ശൗര്യ എയര്ലൈന്സിന്റെ വിമാനമാണ് തകര്ന്നത്. കത്തിയമര്ന്ന വിമാനത്തിന്റെ അവശിഷ്ടങ്ങള് ചിതറിക്കിടക്കുന്ന ചിത്രങ്ങളും വീഡിയോകളും മാധ്യങ്ങള് പുറത്തുവിട്ടിട്ടുണ്ട്. ബുധനാഴ്ച രാവിലെ 11 മണിയോടെയാണ് സംഭവം. പരിക്കേറ്റ പൈലറ്റ് എം.ആര്.ശാക്യയെ കാഠ്മണ്ഡു മെഡിക്കല് കോളേജ് ആശുപത്രിയിലേക്ക് മാറ്റിയതായി വാര്ത്താ ഏജന്സിയായ പിടിഐ റിപ്പോര്ട്ട് ചെയ്തു,
ജീവനക്കാരും ടെക്നിക്കല് ഉദ്യോഗസ്ഥരും അടക്കം വിമാനത്തില് 19 പേരാണ് ഉണ്ടായിരുന്നത്. നേപ്പാളിലെ അന്താരാഷ്ട്ര- ആഭ്യന്തര സര്വ്വീസുകള് നടത്തുന്ന പ്രധാന വിമാനത്താവളമാണ് ത്രിഭുവന്.
