തദ്ദേശ സ്വയംഭരണ ഉപതിരഞ്ഞെടുപ്പില് എല്ഡിഎഫിന് 3 പഞ്ചായത്തുകള് നഷ്ടം; 17 ഇടത്ത് യുഡിഎഫ്, 11 ഇടത്ത് എല്ഡിഎഫ്, മൂന്നിടത്ത് ബിജെപി
സംസ്ഥാനത്തെ 31 തദ്ദേശ സ്വയംഭരണ വാര്ഡുകളിലേക്ക് നടന്ന ഉപതിരഞ്ഞെടുപ്പിന്റെ ഫലം പുറത്ത്. 17 ഇടത്ത് യുഡിഎഫും 11 ഇടത്ത് എല്ഡിഎഫും മൂന്ന് വാര്ഡില് ബിജെപിയും വിജയിച്ചു. തച്ചമ്പാറക്ക് പുറമേ തൃശൂര് നാട്ടിക, ഇടുക്കി കരിമണ്ണൂര് പഞ്ചായത്തുകളിലാണ് ഭരണമാറ്റം. മൂന്ന് പഞ്ചായത്തുകളിലും യുഡിഎഫ് അട്ടിമറി വിജയം നേടി. മൂന്നുപഞ്ചായത്തുകളും എല്ഡിഎഫില് നിന്ന് യുഡിഎഫ് പിടിച്ചെടുത്തു.
കോട്ടയം അതിരമ്പുഴ പഞ്ചായത്ത് മൂന്നാംവാര്ഡ് കോണ്ഗ്രസില് നിന്ന് കേരള കോണ്ഗ്രസ് എം പിടിച്ചെടുത്തു. കൊല്ലം കുന്നത്തൂര് പഞ്ചായത്ത് അഞ്ചാംവാര്ഡ് ബിജെപിയില് നിന്ന് പിടിച്ച് എല്ഡിഎഫ്. കൊല്ലം ഏരൂര് പഞ്ചായത്തിലെ പതിനേഴാം വാര്ഡ് എല്ഡിഎഫ് നിലനിര്ത്തി. ഈരാറ്റുപേട്ട നഗരസഭ കുഴിവേലി ഡിവിഷനില് യുഡിഎഫിന് വിജയം. കൊല്ലം പടിഞ്ഞാറെ കല്ലടയില് അഞ്ചാം വാര്ഡ് യുഡിഎഫില് നിന്ന് എല്ഡിഎഫ് പിടിച്ചെടുത്തു.
കൊടുങ്ങല്ലൂര് നഗരസഭ 41–ാം വാര്ഡ് എന്ഡിഎ നിലനിര്ത്തി. ആലപ്പുഴ പത്തിയൂര് പഞ്ചായത്ത് ഉപതിരഞ്ഞെടുപ്പില് യുഡിഎഫ് സ്ഥാനാര്ഥി ദീപക് എരുവ വിജയിച്ചു. കോഴിക്കോട് കാരശ്ശേരി ഗ്രാമപഞ്ചായത്തിലെ 18ാം വാര്ഡായ ആനയാംകുന്ന് വെസ്റ്റ് വാര്ഡില് യുഡിഎഫിന് വിജയം. പാലക്കാട് ചാലിശ്ശേരി പഞ്ചായത്ത് ഉപതിരഞ്ഞെടുപ്പില് യുഡിഎഫ് സ്ഥാനാര്ഥി സുജിത 104 വോട്ടിന്റെ ഭൂരിപക്ഷത്തില് വിജയിച്ച് യുഡിഎഫ് ഭരണം നിലനിര്ത്തി.
പാലക്കാട് കൊടുവായൂര് പഞ്ചായത്തിലെ കോളോട് വാര്ഡിലേക്ക് നടന്ന ഉപതിരഞ്ഞെടുപ്പില് എല്ഡിഎഫ് സ്ഥാനാര്ഥി എ മുരളീധരന് 108 വോട്ടിനു വിജയിച്ചു. എല്ഡിഎഫിന്റെ സിറ്റിങ് സീറ്റാണിത്. കണ്ണൂര് കണിച്ചാല് മാടായി പഞ്ചായത്തുകള് എല്ഡിഎഫ് നിലനിര്ത്തി.
