കേരള കോണ്ഗ്രസ് എമ്മിന്റെ മുന്നണി മാറ്റം സംബന്ധിച്ചുള്ള അഭ്യൂഹങ്ങള് തള്ളി പാര്ട്ടി ചെയര്മാന് ജോസ് കെ മാണി. തങ്ങളെയോര്ത്ത് ആരും കരയേണ്ടെന്ന് പറഞ്ഞ ജോസ് കെ മാണി ആരാണ് ഈ ചര്ച്ച നടത്തുന്നതെന്നും മാധ്യമങ്ങളോട് ചോദിച്ചു. എല്ഡിഎഫില് ഉറച്ച് നില്ക്കുമെന്നും ജോസ് കെ മാണി പറഞ്ഞു.
പലയിടങ്ങളില് നിന്നും ക്ഷണം വരുന്നുണ്ട്. എല്ലാ ദിവസവും നിലപാട് വിശദീകരിക്കേണ്ടതില്ലെന്നും ജോസ് കെ മാണി പറഞ്ഞു. കേരള കോണ്ഗ്രസ് എവിടെയോ അവിടെ ഭരണമുണ്ടാകുമെന്ന് പറഞ്ഞ ജോസ് കെ മാണി, കേരള കോണ്ഗ്രസില് ഭിന്നതയില്ലെന്ന് വ്യക്തമാക്കി.
പാര്ട്ടിയുടെ രാഷ്ട്രീയ നിലപാട് സംബന്ധിച്ച് ഇപ്പോള് പുറമേ നടക്കുന്ന ചര്ച്ചകള്ക്ക് പാര്ട്ടിയുമായി യാതൊരു ബന്ധവുമില്ലെന്നും കേരള കോണ്ഗ്രസ് എം ഒറ്റക്കെട്ടായി മുന്നോട്ടുപോകുമെന്നും ജോസ് കെ മാണി ഫേസ്ബുക്കില് കുറിച്ചിരുന്നു. പാര്ട്ടിയുടെ രാഷ്ട്രീയ നിലപാട് സംബന്ധിച്ച് ഇപ്പോള് പുറമേ നടക്കുന്ന ചര്ച്ചകള്ക്ക് പാര്ട്ടിയുമായി യാതൊരു ബന്ധവുമില്ലെന്ന് പറഞ്ഞ ജോസ് കെ മാണി സത്യം ഇതായിരിക്കേ ആരെങ്കിലും ഇതുമായി ബന്ധപ്പെട്ട് നടത്തുന്ന അഭിപ്രായപ്രകടനങ്ങള് നടത്തുന്നത് ബോധപൂര്വ്വം പാര്ട്ടി അസ്ഥിരപ്പെടുത്താന് ഉള്ള അജണ്ടയുടെ ഭാഗമാണെന്നും കൂട്ടിച്ചേര്ത്തു.
നേരത്തെ ജോസ് കെ മാണിയും റോഷി അഗസ്റ്റിനും തമ്മില് മുന്നണി മാറ്റം സംബന്ധിച്ച ഭിന്നത ഉണ്ടെന്നും ജോസ് കെ മാണി യുഡിഎഫിലേക്ക് പോകാന് സന്നദ്ധനാണെന്നും എന്നാല് റോഷി അഗസ്റ്റിനെ അനുകൂലിക്കുന്നവര് ഇടതുമുന്നണിയ്ക്കൊപ്പം തുടരാനാണ് ആഗ്രഹിക്കുന്നതെന്നും റിപ്പോര്ട്ടുണ്ടായിരുന്നു.
