ഗ്രേറ്റര് മാഞ്ചസ്റ്ററിലെ ലിറ്റില്ബറോയില് എം62 ഹൈവേയ്ക്ക് സമീപമുള്ള കൃഷിയിടത്തില് ലഘുവിമാനം തകര്ന്നു വീണ് രണ്ട് പുരുഷന്മാര് കൊല്ലപ്പെട്ടു. രാവിലെ 11 മണിയോടെയായിരുന്നു അപകടം. ബര്മിങ്ഹാം എയര്പോര്ട്ടില് നിന്ന് രാവിലെ 10 മണിക്ക് പുറപ്പെട്ട സ്വകാര്യവിമാനമാണ് അപകടത്തില്പ്പെട്ടത്.
അപകടത്തെ കുറിച്ച് എയര് ആക്സിഡന്റ്സ് ഇന്വെസ്റ്റിഗേഷന് ബ്രാഞ്ച് (AAIB) പരിശോധന ആരംഭിച്ചിട്ടുണ്ട്. പ്രദേശത്ത് പൊലീസ് നിരോധനം ഏര്പ്പെടുത്തിയിരിക്കുകയാണ്. വിമാനം പാരച്യൂട്ട് സംവിധാനം ഉള്ളതാണെന്നും, സമീപത്ത് പാരച്യൂട്ട് കുടുങ്ങിയ നിലയില് കണ്ടതായും റിപ്പോര്ട്ടുണ്ട്. വിമാനം തകര്ന്നതിനെ തുടര്ന്ന് നിലത്തുണ്ടായ ആളുകള്ക്ക് പരിക്കുകളൊന്നും ഉണ്ടായിട്ടില്ലെന്നും വിമാനത്തില് മറ്റ് യാത്രക്കാരില്ലായിരുന്നുവെന്നും പൊലീസ് വ്യക്തമാക്കി.
ശക്തമായ കാറ്റാണ് പ്രദേശത്ത് ഉണ്ടായിരുന്നതെന്ന് നാട്ടുകാര് പറഞ്ഞു. വലിയ പൊലീസ് സന്നാഹവും അഗ്നിരക്ഷാ സേനയും എയര് ആംബുലന്സും സ്ഥലത്തെത്തി. ഇത് ഏറെ ദാരുണമായ സംഭവമാണെന്നും മരിച്ചവരുടെ കുടുംബങ്ങളോടൊപ്പം ഞങ്ങളുടെ പ്രാര്ത്ഥനകളുണ്ട് എന്നും ഗ്രേറ്റര് മാഞ്ചസ്റ്റര് പൊലീസ് ചീഫ് സൂപ്രണ്ട് പറഞ്ഞു. അപകടത്തെക്കുറിച്ച് എന്തെങ്കിലും വിവരം അറിവുള്ളവര് ബന്ധപ്പെടണമെന്ന് പോലീസ് അഭ്യര്ത്ഥിച്ചു.
