കണ്ണുകടി ഉണ്ടായ ചില കുലംകുത്തികള് ഓരിയിട്ടു-കൂവിയവര്ക്കെതിരെ നടി റിനി ആന് ജോര്ജ്
വി ഡി സതീശന്റെ സത്യപ്രതിജ്ഞാ ചടങ്ങില് പങ്കെടുക്കാനെത്തിയ തന്നെ കൂവിയവര്ക്കെതിരെ യുവനടി റിനി ആന് ജോര്ജ്. കണ്ണുകടി ഉണ്ടായ കുലംകുത്തികള് ഓരിയിട്ടുവെന്ന് റിനി ഫേസ്ബുക്കില് കുറിച്ചു. അതിനെ അര്ഹിക്കുന്ന അവജ്ഞയോടെ അപ്പോള് തന്നെ അവഗണിച്ചെന്നും റിനി കൂട്ടിച്ചേര്ത്തു.
റിനിയുടെ ഫേസ്ബുക്ക് കുറിപ്പ്
മെയ് 18 2026
എന്റെ ജീവിതത്തിലെ മനോഹരമായ ഒരു സുദിനം.. ഞാന് MLA എന്ന് സ്നേഹപൂര്വ്വം വിളിച്ചിരുന്ന വ്യക്തി കേരളത്തിന്റെ CM ആയ ദിവസം. എന്റെ സ്വപ്ന സാക്ഷാത്കാരം കൂടി ആയിരുന്നു അദ്ദേഹത്തിന്റെ മുഖ്യമന്ത്രി പദം. വേദിയില് നിന്ന് തന്നെ ആ ചരിത്ര മുഹൂര്ത്തം കണ്ണ് കുളിര്ക്കെ കാണാനുള്ള ഭാഗ്യം എനിക്കുണ്ടായി.. ഒരിക്കലും പ്രതീക്ഷിക്കാത്ത ഒരു നിമിഷം. ഒരുപാട് ദേശിയ നേതാക്കളെ അടുത്ത് കാണാനും സംസാരിക്കാനുമുള്ള അവസരം ലഭിച്ചു. ഇതെല്ലാം കണ്ടു കണ്ണുകടി ഉണ്ടായ ചില കുലംകുത്തികള് ഓരിയിട്ടു... അതിനെ ഞാന് അര്ഹിക്കുന്ന അവജ്ഞയോടെ അപ്പോള് തന്നെ അവഗണിക്കുകയും ചെയ്തു. അവര് കോണ്ഗ്രെസ്സുക്കാര് ആണെന്ന് ഞാന് കരുതുന്നില്ല കാരണം കോണ്ഗ്രെസ്സ്ക്കാര് അത്രയും സ്നേഹവായ്പോടെയാണ് എന്നോട് പെരുമാറിയത്. സത്യപ്രതിജ്ഞക്ക് വന്ന എന്നെ കോണ്ഗ്രെസ്സുക്കാര് ആട്ടി ഓടിച്ചു എന്ന് പറയുന്നവര്ക്കായി ചടങ്ങില് സന്നിഹിതന് ആയിരുന്ന തെലുങ്കാന മുഖ്യമന്ത്രി രേവന്ത് റെഡിക്ക് ഒപ്പമുള്ള എന്റെ ചിത്രം പങ്കു വെക്കുന്നു...
വി ഡി സതീശന്റെ നേതൃത്വത്തിലുള്ള യുഡിഎഫ് സര്ക്കാരിന്റെ സത്യപ്രതിജ്ഞയ്ക്കെത്തിയപ്പോഴാണ് റിനി ആന് ജോര്ജിനെ കൂകിവിളിച്ചത്. തിരുവനന്തപുരം സെന്ട്രല് സ്റ്റേഡിയത്തിലെത്തിയ നടിക്കുനേരെ സ്ത്രീകള് ഉള്പ്പെടെ കൂകിവിളിക്കുകയായിരുന്നു.
ഒരു യുവ നേതാവില് നിന്ന് മോശം അനുഭവം ഉണ്ടായെന്നുള്ള റിനിയുടെ വെളിപ്പെടുത്തലിന് പിന്നാലെയായിരുന്നു രാഹുല് മാങ്കൂട്ടത്തിലിനെതിരെ യുവതികളുടെ കൂടുതല് വെളിപ്പെടുത്തലുകളും പരാതികളും പുറത്തുവന്നത്. ഇതിന് പിന്നാലെ രാഹുല് അനുകൂലികളില്നിന്ന് വധഭീഷണിയടക്കം നേരിട്ടുവെന്ന് റിനി പറഞ്ഞിരുന്നു.
