കാലിഫോര്‍ണിയ ഇരട്ടക്കൊല: അനില ബേബിക്കെതിരെ രണ്ടാമത്തെ കൊലക്കുറ്റവും ചുമത്തും
യുഎസിലെ കാലിഫോര്‍ണിയയില്‍ രണ്ട് മലയാളി യുവതികളുടെ മരണവുമായി ബന്ധപ്പെട്ട കേസില്‍ കോട്ടയം മൂന്നിലവ് സ്വദേശിനി അനില ബേബിക്കെതിരെ (32) രണ്ടാമത്തെ കൊലക്കുറ്റവും ചുമത്താന്‍ പ്രോസിക്യൂഷന്‍ ഒരുങ്ങുന്നു. സാന്‍ഹൊസെയില്‍ കുത്തേറ്റു മരിച്ച തിരുവനന്തപുരം സ്വദേശിനി ആന്‍ മേരി മാത്യുവിന്റെ മരണത്തിലാണ് പുതിയ കൊലക്കുറ്റം ചുമത്തുക.
നിലവില്‍ തൃശൂര്‍ സ്വദേശിനി അഞ്ജന ഹരിയെ (35) വാഹനം ഇടിപ്പിച്ച് കൊലപ്പെടുത്തിയ കേസിലാണ് അനിലക്കെതിരെ കൊലക്കുറ്റം ചുമത്തിയിട്ടുള്ളത്. ഓഗസ്റ്റ് 28ന് മില്‍പിറ്റാസിലെ മില്‍ ക്രീക്ക് അപാര്‍ട്‌മെന്റ് പാര്‍ക്കിങ് ഏരിയയിലായിരുന്നു സംഭവം. പൊലീസ് അന്വേഷണത്തില്‍ അനില ബോധപൂര്‍വം വാഹനം ഇടിപ്പിച്ചതാണെന്നാണ് കണ്ടെത്തല്‍.
ആന്‍ മേരി മാത്യുവിന്റെ മരണം കൊലപാതകമാണെന്ന് പൊലീസ് നേരത്തെ സ്ഥിരീകരിച്ചിരുന്നെങ്കിലും, ഇതുവരെ അനിലക്കെതിരെ ആ കേസില്‍ ഔദ്യോഗികമായി കൊലക്കുറ്റം ചുമത്തിയിരുന്നില്ല. ഇപ്പോള്‍ രണ്ടാമത്തെ കേസിലും കുറ്റം ചുമത്താനുള്ള നടപടികളാണ് പുരോഗമിക്കുന്നത്.
അനില ഇപ്പോള്‍ സാന്റാ ക്ലാര കൗണ്ടി മെയിന്‍ ജയിലിലാണ്. കേസില്‍ അടുത്ത കോടതി നടപടികള്‍ സെപ്റ്റംബര്‍ 10ന് നടക്കും
സാമ്പത്തികമായി ഏറെ മുന്നില്‍നില്‍ക്കുന്നതും നാട്ടുക്കാര്‍ക്കിടയില്‍ വലിയ തറവാട്ടു മഹിമയുള്ളതുമായ കുടുംബത്തിലാണ് അനില ജനിച്ചു വളര്‍ന്നത്. ഭരണങ്ങാനം എ.ആര്‍.എസ് സ്‌കൂളിലാണ് അനില പഠിച്ചത്. നാലുവര്‍ഷം മുന്‍പാണ് ഉപരിപഠനത്തിനും ജോലിക്കുമായി ഇവര്‍ യു.എസ്സിലേക്ക് പോയത്. എഞ്ചിനീയറിങ് ബിരുദധാരിയായ അനില അവിടെ പ്രമുഖ സ്വകാര്യ കമ്പനിയില്‍ ജോലി ചെയ്തു വരികയായിരുന്നു.
യു.എസ്സില്‍ ഭര്‍ത്താവിനും കുഞ്ഞിനുമൊപ്പം അനില സന്തുഷ്ട കുടുംബജീവിതമാണ് നയിച്ചിരുന്നതെന്നാണ് നാട്ടുകാരുടെ അറിവ്. കഴിഞ്ഞ രണ്ടുമാസമായി അനിലയുടെ മാതാപിതാക്കളും ഇവരുടെ കൂടെ അമേരിക്കയിലുണ്ട്. അനിലയുടെ സഹോദരന്‍ കാനഡയിലാണ് താമസം. അതിനാല്‍ തറവാട്ടുവീട്ടില്‍ നിലവില്‍ ആരുമില്ല.
അടുത്തിടെ അമേരിക്കയിലെ ജോലിസ്ഥലത്ത് ചില പ്രശ്‌നങ്ങള്‍ ഉള്ളതായി വിവരമുണ്ടായിരുന്നെങ്കിലും അതിനെക്കുറിച്ച് കൂടുതല്‍ അറിയുമായിരുന്നില്ലെന്ന് കുടുംബവുമായി അടുത്തബന്ധമുള്ളവര്‍ പറയുന്നു. എന്നാല്‍ ജോലി നഷ്ടപ്പെട്ടതിന്റെ പേരില്‍ ഇത്രയും ക്രൂരമായ ഒരു കടുംകൈക്ക് അനില മുതിരുമെന്ന് വിശ്വസിക്കാന്‍ അവര്‍ക്ക് കഴിയുന്നില്ല. അത്രയേറെ സൗഹൃദമാണ് കൊല്ലപ്പെട്ട അഞ്ജനയും ആനിയുമായി അനിലയ്ക്കുണ്ടായിരുന്നത്.
