ബംഗളൂരു കെംപെഗൗഡ അന്താരാഷ്ട്ര വിമാനത്താവളത്തില്‍ നിന്ന് ലണ്ടനിലേക്ക് പുറപ്പെട്ട വിര്‍ജിന്‍ അറ്റ്‌ലാന്റിക് വിമാനം സാങ്കേതിക തകരാറിനെ തുടര്‍ന്ന് അടിയന്തരമായി തിരിച്ചിറക്കി. 270 യാത്രക്കാരുമായി ഞായറാഴ്ച രാവിലെ 8.20-ഓടെയാണ് വിഎസ്317 വിമാനം യാത്ര തിരിച്ചത്. വിമാനം ടേക്ക് ഓഫ് ചെയ്ത ഉടന്‍ തന്നെ സാങ്കേതിക തകരാര്‍ ശ്രദ്ധയില്‍പ്പെടുകയായിരുന്നു. തുടര്‍ന്ന് തുമാകുരുവിന് മുകളില്‍ അരമണിക്കൂറിലധികം വട്ടമിട്ടു പറന്ന ശേഷമാണ് വിമാനം സുരക്ഷിതമായി ബംഗളൂരുവില്‍ തന്നെ അടിയന്തര ലാന്‍ഡിംഗ് നടത്തിയത്.
മുന്‍കരുതല്‍ നടപടിയുടെ ഭാഗമായാണ് വിമാനം തിരിച്ചിറക്കിയതെന്നും യാത്രക്കാരും ജീവനക്കാരും പൂര്‍ണ്ണ സുരക്ഷിതരാണെന്നും ബംഗളൂരു അന്താരാഷ്ട്ര വിമാനത്താവള ലിമിറ്റഡ് അധികൃതര്‍ അറിയിച്ചു. തുടര്‍ന്ന് ഈ സര്‍വീസ് റദ്ദാക്കിയതായി വിര്‍ജിന്‍ അറ്റ്‌ലാന്റിക് വക്താവ് വ്യക്തമാക്കി. യാത്രക്കാര്‍ക്കുണ്ടായ ബുദ്ധിമുട്ടില്‍ ഖേദം പ്രകടിപ്പിച്ച എയര്‍ലൈന്‍ കമ്പനി, അവര്‍ക്ക് പകരം യാത്രാസൗകര്യം വേഗത്തില്‍ ലഭ്യമാക്കാനുള്ള നടപടികള്‍ സ്വീകരിച്ചു വരികയാണെന്നും അറിയിച്ചു. സാങ്കേതിക തകരാറിന്റെ കൃത്യമായ കാരണം കണ്ടെത്താന്‍ അധികൃതര്‍ അന്വേഷണം ആരംഭിച്ചിട്ടുണ്ട്.
