ലണ്ടന്: സാമ്പത്തിക മാന്ദ്യം മൂലം ബ്രിട്ടനിലെ ജനങ്ങളെ മാനസിക സംഘര്ഷവും ഉറക്കമില്ലായ്മയും പിടികൂടിയപ്പോള് രാജ്യത്ത് ഉറക്കഗുളികയുടെ വില്പന കുത്തനെ കൂടിയതായി റിപ്പോര്ട്ട്. മാന്ദ്യം ബ്രിട്ടീഷുകാരെ എത്ര ഭീകരമായി ബാധിച്ചു എന്ന് അറിയണമെങ്കില് കഴിഞ്ഞ വര്ഷം രാജ്യത്ത് വിറ്റഴിച്ച ഉറക്കഗുളികയുടെ കണക്ക് പരിശോധിച്ചാല് മാത്രം മതിയാവുമത്രേ. ബ്രിട്ടീഷുകാര് കഴിഞ്ഞ വര്ഷം മാത്രം വാങ്ങിയത് 50 കോടി പൗണ്ടിന്റെ ഉറക്കഗുളികകളാണ്. നാഷണല് ഹെല്ത്ത് സര്വീസ് പുറത്തുവിട്ട കണക്കുകള് പ്രകാരമാണിത്.
സാമ്പത്തിക മാന്ദ്യവും വര്ധിച്ചുവരുന്ന തൊഴിലില്ലായ്മയുമാണ് ജനങ്ങളുടെ ഉറക്കം കെടുത്തുന്നത്. ഒപ്പം ജോലി സുരക്ഷിതത്വമില്ലായ്മയും മറ്റ് സാമ്പത്തിക പ്രതിസന്ധികളും കൂടിയാവുമ്പോള് ജനങ്ങള്ക്ക് ഉറക്കമില്ലാത്ത രാത്രികളാണ് സമ്മാനിക്കുന്നത്. എല്ലാം മറന്ന് ഉറങ്ങാന് അവര് ആശ്രയിക്കുന്നത് ഉറക്ക ഗുളികകളെയാണ്. എന്നാല് ഉറക്കമില്ലായ്മ ശാരീരികവും മാനസികവുമായ പ്രശ്നങ്ങള്ക്ക് കാരണമാകുന്നു. ഉറക്കഗുളികള് ശീലമാക്കുന്നതും ആരോഗ്യപ്രശ്നങ്ങളിലേക്ക് നയിക്കും എന്ന് ഡോക്ടര്മാര് മുന്നറിയിപ്പ് നല്കുന്നുമുണ്ട്.