|
||||||||||||||||
|
||||||||||||||||
|
||||||||||||||||
  |
||||||||||||||||
|
സ്പിരിച്വല്മാഞ്ചസ്റ്റര് തിരുന്നാളിന് കൊടിയേറി; ഒരാഴ്ചക്കാലം മാഞ്ചസ്റ്റര് തിരുന്നാളാഘോഷ ലഹരിയില്
മാഞ്ചസ്റ്റര് : യുകെയിലെ ഏറ്റവും പ്രശസ്തമായ മാഞ്ചസ്റ്റര് തിരുനാളിന് ഭക്തി നിര്ഭരമായ അന്തരീക്ഷത്തില് ഷ്രൂസ്ബറി രൂപതാ വികാരി ജനറാള് ഫാ.മൈക്കള് ഗാനന് നൂറ് കണക്കിന് വിശ്വാസികളെ സാക്ഷിയാക്കി കൊടിയേറ്റി. ഇന്നലെ വൈകുന്നേരം മൂന്നിന് വിഥിന്ഷോ സെന്റ്.ആന്റണീസ് ദേവാലയത്തില് വൈദികരെയും പ്രസുദേന്തിമാരെയും സ്വീകരിച്ചാനയിച്ചതോടെ തിരുക്കര്മ്മങ്ങള്ക്ക് തുടക്കമായി. തുടര്ന്ന് ഇടവക വികാരി ഫാ. ജോസ് അഞ്ചാനിക്കല് കൊടിയേറ്റത്തിനോടനുബന്ധിച്ചുള്ള പ്രാര്ത്ഥനാ ശുശ്രൂഷകളെ തുടര്ന്നാണ് കെടിയേറ്റം നടന്നത്. കെടിയേറ്റത്തിന് ശേഷം ഫാ. മൈക്കള് ഗാനന് ലത്തീന് റീത്തില് ദിവ്യബലി അര്പ്പിച്ചു. ഫാ.ജോസ് അഞ്ചാനിക്കല് വി.അല്ഫോന്സാമ്മ യുടെ നൊവേന അര്പ്പിച്ചു. പ്രസുദേന്തി വാഴ്ചയും ഉണ്ടായിരുന്നു. പൗരോഹൃത്തിന്റെ നാല്പത് വര്ഷം പിന്നിടുന്ന ഫാ.മൈക്കള് ഗാനന് സീറോ മലബാര് കമ്യൂണിറ്റിയുടെ ഉപഹാരം വികാരി ഫാ.ജോസ് അഞ്ചാനിക്കല് കൈമാറി.
ശനിയാഴ്ച വൈകുന്നേരം തിരുന്നാളിനോടനുബന്ധിച്ചുള്ള സ്റ്റേജ് ഷോ വിഥിന്ഷോ ഫോറം സെന്റില് അരങ്ങേറി. വിഥിന്ഷോ ഫോറം സെന്ററിലെ കാണികളെ ഇളക്കിമറിച്ച് അത്യുഗ്രന് പെര്ഫോര്മന്സുമായി താരങ്ങള് വേദിയും മനസ്സും കീഴടക്കി. അറാഫത്ത് കടവില് നേതൃത്വം കൊടുത്ത കൊച്ചിന് ഗോള്ഡന് ഹിറ്റ്സ് ടീമില് പ്രശസ്ത പിന്നണി ഗായകരായ സാം ശിവ, സുമി അരവിന്ദ് എന്നിവര് മലയാളം തമിഴ് ഗാനങ്ങളാലപിച്ച് കാണികളുടെ മനം കവര്ന്നപ്പോള് സ്വിസ്വര്ലാന്ഡില് നിന്നുമുള്ള അനുഗ്രഹീത ഗായകന് ബെന്നി മുക്കാടന് മലയാളഗാനങ്ങളാലപിച്ച് വേദി കീഴടക്കി. കോമഡിയും വണ് മാന് ഷോയുമായി ടി വി താരങ്ങളായ റെജി രാമപുരം, ഷിനോ പോള് എന്നിവരും അണിചേര്ന്നപ്പോള് മാഞ്ചസ്റ്റര് അടുത്ത് കണ്ട ഏറ്റവും മനോഹരമായതും, മാഞ്ചസ്റ്റര് തിരുന്നാളില് ഇതുവരെ നടത്തിയതില് ഏറ്റവും മികച്ചതും കാണികളെ ആവേശത്തിന്റെ കൊടുമുടിയില് എത്തിച്ചതുമായ സ്റ്റേജ് ഷോ ആയി ഇന്നലെ നടന്ന പ്രോഗ്രാം. ഫോറം സെന്ററില് ട്രസ്റ്റി ബിജോയ് കലാകാരന്മാരെയും കാണികളെയും സ്വാഗതം ചെയ്തതോടെയാണ് പരിപാടികള് ആരംഭിച്ചത്. തുടര്ന്ന് ഫാ. മൈക്കള് ഗാനന്, ഇടവക വികാരി ഫാ ജോസ് അഞ്ചാനിക്കല്, ട്രസ്റ്റിമാരായ സിബി ജെയിംസ്, ജോബി തോമസ്, ബിജോയ് മാത്യു, കലാകാരന്മാര് എന്നിവര് ചേര്ന്ന് നിലവിളക്ക് കൊളുത്തി ആഘോഷത്തിന് തുടക്കം കുറിച്ചു. റാഫിള് ടിക്കറ്റ് നറുക്കെടുപ്പില് യഥാക്രമം സിമി, ബിജു ആന്റണി, സേവ്യര് തോമസ് ഒന്ന് മുതല് മൂന്ന് വരെ സമ്മാനങ്ങള് നേടി. പരിപാടിക്കൊടുവില് സിബി ജെയിംസ് ഏവര്ക്കും നന്ദി രേഖപ്പെടുത്തി.
ജൂലൈ മൂന്നിന് ഗ്രേറ്റ് ബ്രിട്ടന് രൂപതാ വികാരി ജനറാള്ഫാ. സജി മലയില് പുത്തന് പുരയില് ദിവ്യബലിക്ക് മുഖ്യകാര്മികനാകും. ജൂലൈ നാലിന് സീറോ മലങ്കര റീത്തില് ഫാ രഞ്ജിത്ത് മടത്തിറമ്പില് ദിവ്യബലി അര്പ്പിക്കും. ജൂലൈ 5 ന് ഗ്രേറ്റ് ബ്രിട്ടന് രൂപതാ വികാരി ജനറാള് ഫാ.ആന്റണി ചൂണ്ടെലിക്കാട്ട് ദിവ്യബലി അര്പ്പിക്കും. എല്ലാ ദിവസവും നൊവേനയും പ്രത്യേക മധ്യസ്ഥ പ്രാര്ത്ഥനയും ഉണ്ടായിരിക്കും.
അത്യാഘോഷപൂര്വ്വമായ തിരുനാള് ദിവ്യബലിക്ക് തുടക്കമാകും. മാഞ്ചസ്റ്ററിലെ ഗായക സംഘം റെക്സ് ജോസ് മിന്റോ ആന്റണി എന്നിവരുടെ നേതൃത്വത്തില് ദിവ്യബലി ഭക്തി സാന്ദ്രമാക്കും. ദിവ്യബലിക്ക് ശേഷം മാഞ്ചസ്റ്ററിലെ സ്വദേശിയരും മറ്റ് മതസ്ഥരുമെല്ലാം ആകാംക്ഷയോടെ കാത്തിരിക്കുന്ന ഭക്തി നിര്ഭരമായ തിരുനാള് പ്രദക്ഷിണം മാഞ്ചസ്റ്ററിന്റെ തെരുവീഥികളില് നടക്കും. പ്രദക്ഷിണത്തില് മാര്.തോമാശ്ലീഹായുടെയും, വി.അല്ഫോന്സയുടെയും തിരുസ്വരൂപങ്ങളും വഹിച്ചുകൊണ്ട്, പൊന് വെള്ളി കുരിശുകളുടെയും മുത്തുക്കുടകളുടെയും വാദ്യമേളങ്ങളുടെയും അകമ്പടിയോടെ നടക്കുന്ന പ്രദക്ഷിണം നാട്ടിലെ തിരുനാളാഘോഷങ്ങളെ അനുസ്മരിപ്പിക്കും. പ്രദക്ഷിണത്തിന് റിഥം ഓഫ് വാറിംഗ്ടണ് ടീമിന്റെ ചെണ്ടമേളം, ഐറിഷ് ബാന്റ് എന്നിവ അകമ്പടിയേകും. പ്രദക്ഷിണം തിരികെ ദേവാലയത്തില് പ്രവേശിച്ച ശേഷം സമാപന ആശീര്വാദവും ഉണ്ടായിരിക്കും. തുടര്ന്ന് സ്നേഹ വിരുന്നോടെയാണ് ഒരാഴ്ച നീണ്ടു നിന്ന തിരുന്നാളാഘോഷങ്ങള് സമാപിക്കുന്നത്.
സിബി ജെയിംസ് 07886670128 ജോബി തോമസ് 07985234361 ബിജോയി മാത്യു 07710675575
ST .ANTONY'S CHURCH, DUNKERY ROAD, PORTWAY, M22 0WR
|
|
| © 2022 ukmalayalamnews.com All rights reserved. Powered by PI Digi-Logical Solutions |