ന്യൂഡല്ഹി: ബിജെപി പ്രസ്റ്റീജ് വിഷയമായി കണ്ട മുത്തലാഖ് നിരോധന ബില് രാജ്യസഭയിലും പാസായി. 99 പേര് ബില്ലിനെ അനുകൂലിച്ചപ്പോള് 84 പേരാണ് എതിര്ത്ത് വോട്ട് ചെയ്തത്. ബില് കൂടുതല് സൂക്ഷ്മ നിരീക്ഷണത്തിനായി സെലക്ട് കമ്മിറ്റിക്കു വിടണമെന്നത് അടക്കമുള്ള പ്രതിപക്ഷത്തിന്റെ ആവശ്യങ്ങള് സഭ വോട്ടിനിട്ട് തള്ളി. ഇതോടെ മുത്തലാഖ് ചൊല്ലുന്ന ഭര്ത്താക്കന്മാര്ക്ക് മൂന്നുവര്ഷത്തെ തടവുശിക്ഷ നല്കാനുള്ള നിയമം രൂപീകൃതമാകും.
വോട്ടെടുപ്പിനിടെ എ.ഐ.ഡി.എം.കെ, ജെ.ഡി.യു അംഗങ്ങള് സഭ ബഹിഷ്കരിച്ചു. ബി.എസ്.പി, ടി.ആര്.എസ്, ടി.ഡി.പി പാര്ട്ടി അംഗങ്ങള് ആരുംതന്നെ സഭയിലുണ്ടായില്ല. ഇവരുടെ അഭാവം സര്ക്കാരിന് നേട്ടമായി. 121 വേണ്ടിടത്ത് 92 ആയി ഭൂരിപക്ഷം കുറച്ചുകൊണ്ടുവന്നതിനെ തുടര്ന്നാണ് ബില് പാസ്സാക്കിയത്. നേരത്തേ സെലക്ട് കമ്മിറ്റിക്കു വിടണമെന്ന ആവശ്യത്തെ 100 പേര് എതിര്ത്തപ്പോള് അനുകൂലിച്ചത് 84 പേരാണ്.
നേരത്തെ രണ്ടുതവണ ബില് രാജ്യസഭയില് കൊണ്ടുവന്നപ്പോഴും പാസായിരുന്നില്ല. രാജ്യസഭയില് ബില് പാസാകണമെങ്കില് 121 പേരുടെ പിന്തുണയാണ് സര്ക്കാറിന് ആവശ്യമുള്ളത്. 107 പേര് എന്.ഡി.എയുടേതായി രാജ്യസഭയിലുണ്ട്.
ബില്ലില് ഭേദഗതി വേണമെന്നുള്ളതുകൊണ്ടാണ് അത് സെലക്ട് കമ്മിറ്റിക്കു വിടണമെന്ന ആവശ്യം മുന്നോട്ടുവെച്ചതെന്ന് കോണ്ഗ്രസ് നേതാവ് ഗുലാം നബി ആസാദ് വ്യക്തമാക്കി. ബില്ലിനെതിരെ വോട്ട് ചെയ്യുമെന്നും അദ്ദേഹം അറിയിച്ചിരുന്നു.
നേരത്തെ 78നെതിരെ 302വോട്ടുകള്ക്ക് ലോക്സഭയില് ബില് പാസായിരുന്നു. ഒറ്റയടിക്ക് മൂന്നു തലാഖ് ചൊല്ലി വിവാഹബന്ധം വേര്പെടുത്തുന്നത് ക്രിമിനല് കുറ്റമാക്കുന്നതാണ് ബില്. മുത്തലാഖ് ചൊല്ലുന്ന പുരുഷന് മൂന്നുവര്ഷം വരെ ജയില്ശിക്ഷയും ബില്ലില് വ്യവസ്ഥ ചെയ്യുന്നുണ്ട്. കഴിഞ്ഞവര്ഷം ഓഗസ്റ്റില് മുത്തലാഖ് നിരോധിച്ചുകൊണ്ട് സുപ്രീം കോടതി പുറപ്പെടുവിച്ച ഉത്തരവിനെ തുടര്ന്നാണ് സര്ക്കാര് ബില് കൊണ്ടുവന്നത്. രാഷ്ട്രപതി ഒപ്പിടുന്നതോടെ ബില് നിയമമാകും.
