കൊച്ചി: പാലാരിവട്ടം മേല്പ്പാലം അഴിമതിയില് മുന് പൊതുമരാമത്ത് വകുപ്പ് സെക്രട്ടറി ടി.ഒ സൂരജടക്കം നാല് പേര് അറസ്റ്റില്. വിജിലന്സാണ് ഇവരെ അറസ്റ്റ് ചെയ്തത്.വഞ്ചന, അഴിമതി, ഗൂഢാലോചന, ഫണ്ട് ദുര്വിനിയോഗം എന്നീ കുറ്റങ്ങള് ചുമത്തിയാണ് അറസ്റ്റ്. കിറ്റ്കോ മുന് എം.ഡി ബെന്നി പോള്, നിര്മ്മാണ കമ്പനി എം.ഡി സുമിത് ഗോയല് ആര്.ബി.ഡി.സി.കെ അസിസ്റ്റന്റ് ജനറല് മാനേജര് പി.ഡി തങ്കച്ചന് എന്നിവരും അറസ്റ്റിലായിട്ടുണ്ട്.
സൂരജ് പൊതുമരാമത്ത് വകുപ്പ് സെക്രട്ടറി ആയിരിക്കുമ്പോഴാണ് പാലത്തിന് കരാര് നല്കുന്നത്. അന്നത്തെ മന്ത്രിസഭാ തീരുമാന പ്രകാരം ഉത്തരവ് ഇറക്കുക മാത്രമാണ് താന് ചെയ്തതെന്ന് ചോദ്യംചെയ്യലിന് ശേഷം ടി.ഒ സൂരജ് പറഞ്ഞിരുന്നു.
പ്രാഥമിക അന്വേഷണത്തില് ടെന്ഡര് നടപടിക്രമങ്ങളില് വിജിലന്സ് ക്രമക്കേട് കണ്ടെത്തിയിരുന്നു. ഫണ്ട് വിനിയോഗത്തിലും ചട്ടലംഘനം ഉണ്ടെന്നാണ് വിജിലന്സിന്റെ വിലയിരുത്തല് .
പാലാരിവട്ടം മേല്പ്പാലം അഴിമതിക്കേസില് നിര്മാണക്കമ്പനിയായ ആര് ഡി എസ് പ്രൊജക്ട്സ് മാനേജിംഗ് ഡയറക്ടര് സുമിത് ഗോയലിനെയും മുന് പൊതുമരാമത്ത് മന്ത്രി വി. കെ ഇബ്രാഹിം കുഞ്ഞിനെയും നേരത്തെ വിജിലന്സ് ചോദ്യം ചെയ്തിരുന്നു. കൊച്ചിയിലെ വിജിലന്സ് ആസ്ഥാനത്ത് വിളിച്ചു വരുത്തിയായിരുന്നു ചോദ്യം ചെയ്യല് . കേസിലെ ഒന്നാം പ്രതിയാണ് സുമിത് ഗോയല്. സുമിത് ഗോയലിന്റെ ബാങ്ക് അക്കൗണ്ടില് നിന്ന് രാഷ്ട്രീയ നേതാക്കള്ക്കും ഉദ്യോഗസ്ഥര്ക്കും പണം കൈമാറിയോ എന്നതിനെ കുറിച്ച് വിജിലൻസ് അന്വേഷിച്ചിരുന്നു.
ആര്ഡിഎസിന്റെയും സുമിത് ഗോയലിന്റെയും മുഴുവന് ബാങ്ക് അക്കൗണ്ട് രേഖകളും വിജിലന്സ് സംഘം പിടിച്ചെടുത്തിരുന്നു. കോഴ കൈപറ്റിയതായി വിജിലന്സ് സംശയിക്കുന്ന മന്ത്രിമാര് അടക്കമുള്ള രാഷ്ട്രീയനേതാക്കളുടെയും ഉദ്യോഗസ്ഥരുടെയും അക്കൗണ്ട് വിശദാംശങ്ങളും വിജിലന്സിന്റെ പക്കലുണ്ട്.
കഴിഞ്ഞ യുഡിഎഫ് സര്ക്കാരിന്റെ കാലത്ത്, ദേശീയ പാത വിഭാഗത്തെ ഒഴിവാക്കിയാണ് റോഡ്സ് ആന്റ് ബ്രിഡ്ജസ് ഡെവലപ്മെന്റ് കോര്പറേഷന് പാലത്തിന്റെ നിര്മ്മാണ ചുമതല നല്കിയത്. അഴിമതിക്ക് കളമൊരുക്കാനാണ് ഇത്തരം ഒരു തീരുമാനം എടുത്തതെന്ന് ആരോപണം ഉയര്ന്നിരുന്നു. ഇത് സംബന്ധിച്ച വിശദാംശങ്ങളാണ് വിജിലന്സ് സംഘം ഇബ്രാഹിം കുഞ്ഞിനോട് ചോദിച്ചറിഞ്ഞത്. സുമിത് ഗോയല് ഉള്പ്പെടെ 17 പേരെ പ്രതികളാക്കി നേരത്തെ വിജിലന്സ് കേസ് രജിസ്റ്റര് ചെയ്തിരുന്നു.
