ലാഹോര്: ഇന്ത്യന് പ്രധാനമന്ത്രി നരേന്ദ്രമോദി സൈക്കോയാണെന്ന് പാകിസ്താന് പ്രധാനമന്ത്രി ഇമ്രാന് ഖാന്. മോദി നാസികളെ ആരാധനാപാത്രമായി കാണുന്നയാളാണ്. അഡോള്ഫ് ഹിറ്റ്ലറുടെ നാസി ഭരണകൂടം പാലിച്ചുപോന്ന നയങ്ങളാണ് മോദി കശ്മീരി ജനതയോട് ചെയ്യുന്നതെന്നും ഇമ്രാന് കൂട്ടിച്ചേര്ത്തു.പാകിസ്താന് ദിനപത്രം ഡോണാണ് ഇത് സംബന്ധിച്ച വാര്ത്ത റിപ്പോര്ട്ട് ചെയ്യുന്നത്.
'അദ്ദേഹം (മോദി) ഒരു സാധാരണ മനുഷ്യനെപ്പോലെയല്ല. ഒരു സൈക്കോപാത്താണ്', ഇമ്രാന് പറഞ്ഞു.
2002 ലെ ഗുജറാത്തിലെ മുസ്ലിം വംശഹത്യയോടെ തന്നെ മോദിയുടെ നിലപാടുകള് എങ്ങനെയുള്ളതാണെന്ന വ്യക്തമാക്കുന്നതാണെന്നും അദ്ദേഹം കൂട്ടിച്ചേര്ത്തു. ഇന്ത്യന് മുസ്ലിങ്ങളുടെ രക്തക്കറ പുരണ്ടതാണ് മോദിയുടെ കൈകളെന്നും ഇമ്രാന് പറഞ്ഞു.
ആര്.എസ്.എസ് പ്രത്യയശാസ്ത്രം നാസി തത്വത്തിലാണ് വിശ്വസിക്കുന്നതെന്നും ഹിറ്റ്ലര് ജൂതന്മാരോട് ചെയ്തതാണ് മുസ്ലിങ്ങളോട് അവര് ചെയ്യുന്നതെന്നും ഇമ്രാന് കുറ്റപ്പെടുത്തി. ആര്ട്ടിക്കിള് 370, പൗരത്വ നിയമം എന്നിവയിലൂടെ ഇന്ത്യയിലെ മുസ്ലിങ്ങളെ വംശഹത്യ ചെയ്യാനാണ് ശ്രമിക്കുന്നതെന്നും ഇമ്രാന് ആരോപിച്ചു.
ആര്.എസ്.എസിനെക്കുറിച്ച് ലോകനേതാക്കള്ക്ക് താന് നേരത്തെ മുന്നറിയിപ്പ് നല്കിയിരുന്നെന്നും അദ്ദേഹം പറഞ്ഞു.
