അവശേഷിച്ച എല്ലാ കോവിഡ് നിയന്ത്രണങ്ങളും റദ്ദാക്കി കോവിഡിന് മുമ്പുള്ള ദിനങ്ങളിലേയ്ക്ക് ഇംഗ്ലണ്ട്. പ്രധാനമന്ത്രി ബോറിസ് ജോണ്സണ് തിങ്കളാഴ്ച ഇതുസംബന്ധിച്ച പ്രഖ്യാപനം നടത്തുമെന്നാണ് റിപ്പോര്ട്ട്. ജീവിതങ്ങളെ നിയന്ത്രിച്ച് നിര്ത്തിയിരുന്ന ബാക്കിയുള്ള നിയന്ത്രണങ്ങളാണ് നീക്കുന്നതെന്ന് പ്രധാനമന്ത്രി പാര്ലമെന്റിനെ അറിയിക്കും. തിങ്കളാഴ്ച പ്രധാനമന്ത്രി തന്റെ 'കോവിഡിനൊപ്പം ജീവിക്കാനുള്ള' പദ്ധതി പാര്ലമെന്റില് അവതരിപ്പിക്കും.
ഒമിക്രോണ് കേസുകള് താഴേക്ക് പോകുന്നതിനിടെയാണ് എല്ലാ നിബന്ധനകളും പ്രതീക്ഷിച്ചതിലും ഒരു മാസം മുന്പ് അവസാനിപ്പിക്കാന് ബോറിസ് തയാറാകുന്നത്. രണ്ട് വര്ഷത്തിനിടെ ആദ്യമായി അടുത്ത വ്യാഴാഴ്ച മുതല് ഇംഗ്ലണ്ടില് യാതൊരു നിയന്ത്രണവുമില്ലാതെ, സാധാരണ നിലയിലേക്ക് മടങ്ങാം. വൈറസ് പിടിപെടുന്നവര്ക്കുള്ള സെല്ഫ് ഐസൊലേഷന് നിബന്ധന റദ്ദാക്കുന്നതാണ് പ്രധാന പ്രഖ്യാപനം. ഐസൊലേഷനുമായി ബന്ധപ്പെട്ട എല്ലാ നിയമങ്ങളും ഈ മാസം റദ്ദാകും. രോഗമുണ്ടെന്ന് തോന്നിയാല് സാമാന്യ ബുദ്ധിക്ക് നിരക്കുള്ള തീരുമാനം കൈക്കൊള്ളാനാകും നിര്ദ്ദേശം വരിക.
തല്ക്കാലം മാറ്റങ്ങള് ഇംഗ്ലണ്ടില് മാത്രമാകും ബാധകമാകുക. സ്കോട്ട്ലണ്ട്, വെയില്സ്, നോര്ത്തേണ് അയര്ലണ്ട് എന്നിവിടങ്ങളില് സ്വന്തം നിലയിലാണ് കോവിഡ് നയങ്ങള് രൂപീകരിച്ചിട്ടുള്ളത്. കോവിഡിനൊപ്പം ജീവിക്കാനുള്ള പദ്ധതി പ്രഖ്യാപിക്കുന്ന ആദ്യ പാശ്ചാത്യ രാജ്യമാകാനുള്ള ഒരുക്കത്തിലാണ് യുകെ .
അതേസമയം, കോവിഡില് നിന്നും സ്വാതന്ത്ര്യം പ്രഖ്യാപിക്കുന്നതോടെ സെല്ഫ് ഐസൊലേഷനിലാകുന്ന പാവപ്പെട്ട തൊഴിലാളികള്ക്ക് നല്കി വന്നിരുന്ന 500 പൗണ്ട് ധനസഹായം നിലയ്ക്കും.
