ആദിത്യ-എല്1നിശ്ചിത ഭ്രമണപഥത്തില്; വിജയവാര്ത്ത അറിയിച്ച് പ്രധാനമന്ത്രി
ഐഎസ്ആര്ഒ വിക്ഷേപിച്ച ഇന്ത്യയുടെ ആദ്യ സൂര്യ പര്യവേക്ഷണ ദൗത്യമായ ആദിത്യ-എല് വണ് പൂര്ണ വിജയം. 127 ദിവസത്തെ യാത്രയ്ക്ക് ശേഷം ആദിത്യ എല് വണ് ഹാലോ ഓര്ബിറ്റില് എത്തി. പ്രധാനമന്ത്രി നരേന്ദ്രമോദിയാണ് വിജയവാര്ത്ത ലോകത്തെ അറിയിച്ചത്. അതുല്യ നേട്ടത്തില് രാജ്യത്തിനൊപ്പം താനും ആഹ്ലാദിക്കുന്നുവെന്ന് പ്രധാനമന്ത്രി പറഞ്ഞു. ശാസ്ത്രജ്ഞരുടെ അര്പ്പണബോധത്തിന്റെ ഫലമാണ് ഈ വിജയത്തിന് പിന്നിലെന്നും അദ്ദേഹം ആശംസിച്ചു.
ഭാരതം മറ്റൊരു നാഴികക്കല്ല് സൃഷ്ടിച്ചിരിക്കുന്നു. രാജ്യത്തിന്റെ ആദ്യത്തെ സോളാര് ഒബ്സര്വേറ്ററി ആദിത്യ-എല്1 ലക്ഷ്യസ്ഥാനത്ത് എത്തി. ഏറ്റവും സങ്കീര്ണ്ണമായ ബഹിരാകാശ ദൗത്യങ്ങള് സാക്ഷാത്കരിക്കുന്നതില് നമ്മുടെ ശാസ്ത്രജ്ഞരുടെ അക്ഷീണമായ അര്പ്പണബോധത്തിന്റെ തെളിവാണിത്. മനുഷ്യരാശിയുടെ പ്രയോജനത്തിനായി ഞങ്ങള് ശാസ്ത്രത്തിന്റെ പുതിയ അതിര്ത്തികള് പിന്തുടരുന്നത് തുടരുമെന്നായിരുന്നു അദ്ദേഹത്തിന്റെ കുറിപ്പ്.
അടുത്ത അഞ്ചുവര്ഷക്കാലത്തേക്ക് ലഗ്രാഞ്ച് പോയിന്റില് നിന്നു കൊണ്ട് ആദിത്യ എല്1 എന്ന ഇന്ത്യന് ബഹിരാകാശ പേടകം സൂര്യനെ നേര്ക്കുനേര് കണ്ടുകൊണ്ടിരിക്കും. 2023 സെപ്റ്റംബര് രണ്ടിന് വിക്ഷേപിച്ച പേടകം സെപ്റ്റംബര് 19 നാണ് ഭൂമിയെ ചുറ്റുന്ന ഭ്രമണപഥം വിട്ട് ലഗ്രാഞ്ച് പോയിന്റിലേക്കുള്ള യാത്ര തുടങ്ങിയത്. ഏകദേശം 37 ലക്ഷം കിലോമീറ്റര് ദൂരം സഞ്ചരിച്ചായിരുന്നു ഈ യാത്ര.
ബെംഗളുരൂവിലെ ഐഎസ്ആര്ഒ ട്രാക്കിംഗ് ആന്ഡ് ടെലിമെട്രി നെറ്റ് വര്ക്കില് നിന്നാണ് പേടകത്തെ നിയന്ത്രിക്കുന്നത്. ദൗത്യം വിജയിച്ചതോടേ ഒന്നാം ലഗ്രാഞ്ച് പോയിന്റില് ഉപഗ്രഹമെത്തിക്കുന്ന നാലാമത്തെ ബഹിരാകാശ ഏജന്സിയായി ഐഎസ്ആര്ഒ മാറി.
