ഇന്ധനവിപണിയിലെ ചാഞ്ചാട്ടങ്ങള് ഉപഭോക്താക്കളെ കാര്യമായി ബാധിക്കുന്നതാണ്. റഷ്യ- യുക്രൈന് യുദ്ധം ചെങ്കടലിലെ ഹൂതി ആക്രമണം എന്നിവയൊക്കെ ഇന്ധനവിപണിയെ പ്രതികൂലമായി ബാധിക്കുന്ന ഘടകങ്ങളാണ്. വില കൂടുമ്പോള് മിനിറ്റ് വെച്ച് വ്യത്യാസം വരുമെങ്കിലും വില കുറഞ്ഞാല് ഇതിന്റെ ഗുണം ലഭിക്കാന് ഏറെ കാത്തിരിക്കണം. പലപ്പോഴും ഇത് പൂര്ണ്ണമായി ലഭിക്കാറുമില്ല.
എന്നാല് ഇന്ധന റീട്ടെയിലര്മാരുടെ ഈ ചൂഷണത്തിന് തടയിടാനാണ് യുകെ ഗവണ്മെന്റ് പദ്ധതിയൊരുക്കുന്നത്. പമ്പ് ചെലവുകള് മാന്യമായിരിക്കണമെന്ന് ഉറപ്പാക്കാന് വില മാറ്റങ്ങള് വേഗത്തില് കൈമാറാന് റീട്ടെയിലര്മാരെ നിര്ബന്ധിക്കുന്നതാണ് പുതിയ നീക്കങ്ങള്. പമ്പ് വാച്ച് നിര്ദ്ദേശങ്ങളായി അവതരിപ്പിക്കുന്ന പദ്ധതി ഉപഭോക്താക്കള്ക്ക് ലിറ്ററിന് 3 പെന്സ് ലാഭം നല്കുമെന്ന് ഡിപ്പാര്ട്ട്മെന്റ് ഫോര് എനര്ജി സെക്യൂരിറ്റി & നെറ്റ് സീറോ വ്യക്തമാക്കുന്നു.
പുതിയ സ്കീം ഇപ്പോള് അഭിപ്രായരൂപീകരണത്തിനായി നല്കിയിരിക്കുകയാണ്. ഇത് നടപ്പായാല് വില മാറ്റങ്ങള് 30 മിനിറ്റിനകം പമ്പുകളില് പ്രതിഫലിപ്പിച്ച് ഡ്രൈവര്മാര്ക്ക് ലാഭകരമായ പെട്രോള്, ഡീസല് ലഭ്യമാക്കാന് ഫോര്കോര്ട്ടുകള് നിര്ബന്ധിതമാകും. കഴിഞ്ഞ വര്ഷം കോമ്പറ്റീഷന് & മാര്ക്കറ്റ്സ് അതോറിറ്റി ഇന്ധന വിപണിയെ കുറിച്ച് നടത്തിയ അന്വേഷണമാണ് ഈ സ്കീം നിര്ദ്ദേശിക്കുന്നതിലേക്ക് നയിച്ചത്.
2022-ല് മാത്രം ഡ്രൈവര്മാരില് നിന്നും 900 മില്ല്യണ് പൗണ്ട് അധികമായി ഈടാക്കിയെന്ന് സിഎംഎ കണ്ടെത്തി. കുറയുന്ന ഇന്ധനവില ഉപഭോക്താക്കള്ക്ക് കൈമാറുന്നതില് സൂപ്പര്മാര്ക്കറ്റുകള് വീഴ്ച വരുത്തിയതാണ് ഇതിന് കാരണമായത്.
