മലപ്പുറം മഞ്ചേരി പന്തല്ലൂരിലെ തഹ്ദിലയുടെ ആത്മഹത്യയില് ഭര്തൃപിതാവ് അറസ്റ്റില്. ഭര്തൃപിതാവ് പന്തല്ലൂര് കിഴക്കുപറമ്പ് സ്വദേശി അബൂബക്കറാണ് അറസ്റ്റിലായത്. ആത്മഹത്യ പ്രേരണ കുറ്റം ചുമത്തിയാണ് അറസ്റ്റ്. അബൂബക്കര് യുവതിയെ ഉപദ്രവിച്ചിരുന്നുവെന്നാണ് ബന്ധുക്കളുടെ ആരോപണം.
വ്യാഴാഴ്ച്ച രാത്രി 9 മണിയോടെയാണ് തഹ്ദിലയെ ഭര്ത്താവ് നിസാറിന്റെ പന്തല്ലൂരിലെ വീട്ടില് തൂങ്ങിമരിച്ച നിലയില് കണ്ടെത്തിയത്. പത്ത് വര്ഷം മുമ്പായിരുന്നു തഹ്ദിലയുടേയും നിസാറിന്റെയും വിവാഹം. രണ്ടു വയസുള്ള പെണ്കുട്ടി ഉള്പ്പെടെ നാലു മക്കളാണ് തഹ്ദിലക്കുള്ളത്.
ഭര്തൃപിതാവിന്റെ ഉപദ്രവം മൂലമാണ് യുവതി ജീവനൊടുക്കിയതെന്ന് കാട്ടി ബന്ധുക്കള് പോലീസില് പരാതി നല്കിയിരുന്നു. ഭര്തൃപിതാവ് അബുബക്കര് നിരന്തരം യുവതിയെ ഉപദ്രവിച്ചിരുന്നതായാണ് ബന്ധുക്കള് പറയുന്നത്. ഇക്കാര്യം വിദേശത്തുള്ള ഭര്ത്താവ് നിസാറിന് അറിയുമായിരുന്നുവെന്നും ബന്ധുക്കള് ആരോപിച്ചിരുന്നു. തുടര്ന്നാണ് ഭര്തൃപിതാവിനെ അറസ്റ്റ് ചെയ്തിരിക്കുന്നത്.
