റിപ്പബ്ലിക് ദിനാഘോഷത്തില് കേന്ദ്രത്തിനെ പൊക്കി ഗവര്ണര്; മുഖം കറുപ്പിച്ചു മുഖ്യമന്ത്രിയും
തിരുവനന്തപുരം : ഗവര്ണര് - മുഖ്യമന്ത്രി പോര് വലിയ കോമഡിയായി മാറുന്നതിനിടെ ഇരുവരും വീണ്ടും വേദിപങ്കിട്ടു. 75-ാമത് റിപ്പബ്ലിക് ദിനാഘോഷത്തിന്റെ ഭാഗമായി തിരുവനന്തപുരം സെന്ട്രല് സ്റ്റേഡിയത്തില് പതാക ഉയര്ത്തി റിപ്പബ്ലിക് ദിന സന്ദേശം നല്കിയ ഗവര്ണര് ആരിഫ് മുഹമ്മദ് ഖാന് കേന്ദ്രത്തിനെ നേട്ടങ്ങളാണ് പ്രധാനമായും പറഞ്ഞ് . പതാക ഉയര്ത്തിയ ശേഷം മലയാളത്തില് കവി ജി ശങ്കരക്കുറുപ്പിന്റെ അഴിമുഖത്ത് എന്ന കവിതയിലെ 'ഹാ! വരും വരും നൂനമാദ്ദിനമെന് നാടിന്റെ നാവനങ്ങിയാല് ലോകം ശ്രദ്ധിക്കും കാലം വരും'' എന്ന വരികളോടെയാണ് സന്ദേശം ആരംഭിച്ചത്. കവി സ്വപ്നം കണ്ട 'ആ സുവര്ണ കാലമാണ് ഇപ്പോള് കേന്ദ്രസര്ക്കാര് സഫലമാക്കുന്നതെന്നും അദ്ദേഹം പറഞ്ഞു. ചടങ്ങില് മുഖ്യമന്ത്രിക്ക് അടുത്താണ് ഇരുന്നതെങ്കിലും ഇരുവരും പരസ്പരം മുഖത്തുനോക്കിയില്ല. ഇന്നലെ നിയമസഭയിലും ഇരുവരും പരസ്പരം മുഖത്തുനോക്കിയിരുന്നില്ല. മടങ്ങുമ്പോള് ഗവര്ണര് തൊഴുതെങ്കിലും മുഖ്യമന്ത്രി ഗൗനിച്ചില്ല.
പ്രധാനമന്ത്രി നരേന്ദ്രമോദിയെ പ്രശംസിച്ചും കേന്ദ്ര സര്ക്കാരിന്റെ നേട്ടങ്ങള് വിവരിച്ചുമാണ് സന്ദേശം. പ്രധാനമന്ത്രി നരേന്ദ്രമോദി ഇന്ത്യയെ സൂപ്പര് പവര് ആക്കാനുള്ള പരിശ്രമത്തിലാണ്. മേക്ക് ഇന് ഇന്ത്യയിലൂടെ വന്ദേ ഭാരതും, കൊച്ചി വാട്ടര് മെട്രോയും യാഥാര്ത്ഥ്യമായി. വികസിത് സങ്കല്പ് യാത്ര കേന്ദ്ര സര്ക്കാറിന്റെ വികസന നേട്ടങ്ങള് ജനങ്ങളിലേക്ക് എത്തിച്ചുവെന്നും അദ്ദേഹം പറഞ്ഞു.
അതേ സമയം റിപ്പബ്ലിക് ദിന സന്ദേശത്തില് സംസ്ഥാന സര്ക്കാരിനെതിരെ ഗവര്ണര് വിമര്ശനമുയര്ത്തി. ഉന്നത വിദ്യാഭ്യാസരംഗത്തെ ബാഹ്യ ഇടപെടലുകള്, അക്കാദമിക മേഖലയെ മലിനമാക്കുന്നു. ബാഹ്യ ഇടപെടലുകള് ഇല്ലാത്ത സ്വതന്ത്ര വിദ്യാഭ്യാസ സ്ഥാപനങ്ങള് കേരളത്തിന് അനിവാര്യമെന്ന് അദ്ദേഹം പറഞ്ഞു. വിയോജിപ്പുകള് അക്രമത്തിലേക്ക് പോകുന്നത് ജനാധിപത്യത്തെ വഞ്ചിക്കലാണെന്നും കേരളം ആരോഗ്യകരമായ ജനാധിപത്യത്തെ പ്രോത്സാഹിപ്പിക്കണമെന്നും ഗവര്ണര് പറഞ്ഞു.
അശ്വാരുഢ സേന, എന്.സി.സി, സ്കൗട്സ്, ഗൈഡ്സ്, സ്റ്റുഡന്സ് പോലീസ് കേഡറ്റുകള് തുടങ്ങിയ വിഭാഗങ്ങളുടെയും അഭിവാദ്യം ഗവര്ണര് സ്വീകരിച്ചു. തിരുവനന്തപുരം നഗരത്തിലെ വിവിധ സ്കൂളുകളില് നിന്നുളള വിദ്യാര്ത്ഥികള് ദേശഭക്തിഗാനങ്ങള് ആലപിച്ചു.
