ബോണ്മൗത്തിലെ കോളേജിന് സമീപം നടന്ന അക്രമത്തില് അഞ്ച് പേര്ക്ക് പരുക്കേറ്റു. ഗുരുതരമായി പരുക്കേറ്റ ഒരാളുടെ നില ഗുരുതരമാണ്. സംഭവവുമായി ബന്ധപ്പെട്ട് നിരവധി ആളുകളെ അറസ്റ്റ് ചെയ്തിട്ടുള്ളതായി പോലീസ് പറഞ്ഞു. ഒട്ടനവധി പേര്ക്ക് പരുക്കേറ്റതോടെ ഇവിടെ സായുധ പോലീസിനെ നിയോഗിച്ചു.
ഗുരുതരമായി പരുക്കേറ്റ ആളുടെ ജീവന് അപകടമില്ലെന്ന് പോലീസ് വ്യക്തമാക്കി. മറ്റൊരു വ്യക്തിക്ക് സംഭവസ്ഥലത്ത് വെച്ച് ചികിത്സ നല്കി വിട്ടയച്ചു. മേയ്റിക്ക് റോഡിലെ ബോണ്മൗത്തിനും, പൂള് കോളേജ് ക്യാംപസിനും അടുത്തായാണ് സംഭവം നടന്നത്. അക്രമം തങ്ങളുടെ പരിധിക്ക് അകത്ത് വെച്ചല്ലെന്ന് കോളേജ് പറഞ്ഞു.
മനഃപ്പൂര്വ്വം പരുക്കേല്പ്പിച്ച രണ്ട് പേരെ അറസ്റ്റ് ചെയ്തതായി ഡോര്സെറ്റ് പോലീസ് പറഞ്ഞു. മൂന്നാമതൊരു വ്യക്തിയെ മര്ദ്ദനത്തിനാണ് അറസ്റ്റ് ചെയ്തത്. രണ്ട് ഗ്രൂപ്പുകളില് പെട്ട 20 പേരാണ് ടൗണ് സെന്ററില് പരസ്പരം പോരാടാനായി സംഘടിച്ചതെന്ന് ദൃക്സാക്ഷികള് പറഞ്ഞു. ഇതില് ഏതാനും പേര്ക്ക് കുത്തേറ്റതായും റിപ്പോര്ട്ട് പറയുന്നു.
10 പേര് വീതമുള്ള ഗ്രൂപ്പുകളാണ് ഏറ്റമുട്ടിയതെന്ന് ദൃക്സാക്ഷി വെളിപ്പെടുത്തുന്നു. ഇവര് കോളേജ് വിദ്യാര്ത്ഥികള് തന്നെയാണെന്നാണ് കരുതുന്നത്. കുട്ടികളെ വിളിക്കാനായി കോളേജിന് പുറത്ത് എത്തിയ മാതാപിതാക്കളെ ഞെട്ടിച്ച് കൊണ്ടായിരുന്നു അക്രമം . സംഭവം തങ്ങളുടെ ഗ്രൗണ്ടിന് പുറത്താണ് നടന്നതെന്ന് ബോണ്മൗത്ത് & പൂള് കോളേജ് പറഞ്ഞു.
സംഭവസ്ഥലത്ത് പോലീസ് തമ്പടിച്ചിരിക്കുകയാണ്. വ്യാഴാഴ്ച ഉച്ചതിരിഞ്ഞാണ് അക്രമണം ആരംഭിച്ചതെന്ന് ഡോര്സെറ്റ് പോലീസ് വക്താവ് വിശദമാക്കി. പരുക്കേറ്റവര് ആശുപത്രിയില് ചികിത്സയിലാണ്.
