സാലിസ്ബറിയിലെ ആദ്യകാല മലയാളിയും സാലിസ്ബറി മലയാളി സമൂഹത്തിലെ സജീവ പ്രവര്ത്തകയുമായ ബീന വിന്നി (54)യ്ക്ക് അന്ത്യയാത്രയേകാന് ഒരുങ്ങി യുകെ മലയാളി സമൂഹം. ഫെബ്രുവരി മൂന്നിന് ഉച്ചയ്ക്ക് രണ്ടു മണി മുതല് സാലിസ്ബറിയിലെ ഹോളി റെഡീമര് ചര്ച്ചില് ആണ് പൊതുദര്ശനവും ശുശ്രൂഷകളും നടക്കുക. ബീനയുടെയും കുടുംബത്തിന്റെയും സുഹൃത്തുക്കളടക്കം നൂറുകണക്കിന് പേരാണ് ചടങ്ങില് പങ്കെടുക്കുവാനായി എത്തുക.
ചടങ്ങില് പങ്കുചേരാന് എത്തുന്നവര് പ്രതീക്ഷിച്ചതിലും അധികമായാല് പാര്ക്ക് ആന്റ് റൈഡ് ബിഷപ്പ്ഡൗണില് പാര്ക്കിംഗ് സൗകര്യവും ഒരുക്കിയിട്ടുണ്ട്. ജനുവരി 23-ാം തീയതി രാത്രിയാണ് സാലിസ്ബറി ജനറല് ഹോസ്പിറ്റലില് വച്ച് ബീന മരണത്തിനു കീഴടങ്ങിയത്. ഏതാനും നാളുകളായി ചികിത്സയിലായിരുന്നുവെങ്കിലും അസുഖം മൂര്ച്ഛിച്ചതിനെ തുടര്ന്ന് ഹോസ്പിറ്റലില് എത്തിക്കുകയും അവിടെ വച്ച് മരണം സംഭവിക്കുകയും ആയിരുന്നു.
സാലിസ്ബറി മലയാളി കമ്മ്യൂണിറ്റി അംഗമായ ബീന ഗ്രേറ്റ് ബ്രിട്ടന് സീറോ മലബാര് രൂപതയിലെ സൗത്താംപ്ടണ് റീജിയണിലെ സാലിസ്ബറി സെന്റ് തോമസ് മിഷന് അംഗവും കൂടിയാണ്. സാലിസ്ബറി മലയാളി കമ്മ്യൂണിറ്റി സെക്രട്ടറി, എക്സിക്യൂട്ടീവ് മെമ്പര്, പ്രോഗ്രാം കോ ഓര്ഡിനേറ്റര് എന്നീ നിലകളില് പ്രവര്ത്തിച്ചിട്ടുള്ള ബീന ചേച്ചി സാലിസ്ബറിയിലെ മതധ്യാപക കൂടിയായിരുന്നു.
റോസ്മോള് വിന്നി, റിച്ചാര്ഡ് വിന്നി എന്നിവര് മക്കളും വിന്നി ജോണ് ഭര്ത്താവുമാണ്.
