ഒരാഴ്ചയിലേറെ യാത്രക്കാരെ ദുരിതത്തിലാഴ്ത്താനായി ഇംഗ്ലണ്ടില് ആറ് ദിവസം നീണ്ടു നില്ക്കുന്ന ട്രെയിന് സമരം ഇന്ന് മുതല്. ജനുവരി 30 ചൊവ്വാഴ്ചയ്ക്കും ഫെബ്രുവരി 5 തിങ്കളാഴ്ചയ്ക്കുമിടയില് വിവിധ റൂട്ടുകളില് സമരത്തിന്റെ ഭാഗമായി ട്രെയിന് ഗതാഗതം തടസ്സപ്പെടുമെന്ന് യൂണിയനായ എഎസ് എല് ഇ എഫ് അറിയിച്ചു.
സമരം ട്രെയിന് യാത്രക്കാരെ കടുത്ത ദുരിതത്തിലാക്കും.
പണിമുടക്ക് കൂടാതെ ഇന്നലെ മുതല് ഫെബ്രുവരി 6 ചൊവ്വാഴ്ച വരെ അധിക സമയം ജോലി ചെയ്യുന്നതില് നിന്ന് ജീവനക്കാര് വിട്ടുനില്ക്കും. പണിമുടക്കിനൊപ്പം ഈ നടപടിയും ട്രെയിന് ഷെഡ്യൂളുകള് താളം തെറ്റിക്കുന്നതിന് ഇടയാക്കും.
വിവിധ റെയില്വേ യൂണിയനുകളുടെ പണിമുടക്കുകള് മൂലം രാജ്യത്തെ ട്രെയിന് ഗതാഗതം പലപ്പോഴും വന് പ്രതിസന്ധിയെയാണ് അഭിമുഖീകരിക്കുന്നത്. പണിമുടക്ക് ദിവസം നേരത്തെ ടിക്കറ്റ് ബുക്ക് ചെയ്ത ട്രെയിന് യാത്രക്കാര്ക്ക് അവര് ബുക്ക് ചെയ്ത ട്രെയിന് റദ്ദാക്കുകയോ, വൈകുകയോ, റീഷെഡ്യൂള് ചെയ്യുകയോ ചെയ്താല് ടിക്കറ്റ് ചാര്ജ് തിരികെ ലഭിക്കും. സമരമൂലം യാത്ര ചെയ്യാന് കഴിയാത്ത ടിക്കറ്റ് ഉടമകള്ക്ക് സമര ദിവസങ്ങളില് 100% നഷ്ടപരിഹാരത്തിനും അര്ഹതയുണ്ട്.
സമരം പ്രധാനമായും ബാധിക്കുന്ന സര്വീസുകള്
ജനുവരി 30 ചൊവ്വാഴ്ച: തെക്കുകിഴക്കന്, തെക്കന്, ഗാറ്റ് വിക്ക് എക്സ്പ്രസ്, ഗ്രേറ്റ് നോര്ത്തേണ്, തേംസ്ലിങ്ക്, സൗത്ത് വെസ്റ്റേണ് റെയില്വേ, എസ്ഡബ്ല്യുആര് ഐലന്ഡ് ലൈന്
ജനുവരി 31 ബുധനാഴ്ച: നോര്ത്തേണ് ട്രെയിനുകള്, ട്രാന്സ്പെനൈന് എക്സ്പ്രസ്
ഫെബ്രുവരി 2 വെള്ളിയാഴ്ച: ഗ്രേറ്റര് ആംഗ്ലിയ, C2C, LNER
ഫെബ്രുവരി 3 ശനിയാഴ്ച: വെസ്റ്റ് മിഡ്ലാന്ഡ്സ് ട്രെയിനുകള്, അവന്തി വെസ്റ്റ് കോസ്റ്റ്, ഈസ്റ്റ് മിഡ്ലാന്ഡ്സ് റെയില്വേ
ഫെബ്രുവരി 5 തിങ്കള്: ഗ്രേറ്റ് വെസ്റ്റേണ്, ക്രോസ് കണ്ട്രി, ചില്ട്ടേണ്
ഫെബ്രുവരി 1 വ്യാഴാഴ്ചയും 4 ഞായറാഴ്ചയും സമരം ഉണ്ടായിരിക്കില്ലെന്നാണ് അറിയിച്ചിരിക്കുന്നത്.
