വീണ വിജയനുമായി ബന്ധപ്പെട്ട മാസപ്പടി കേസില് മിന്നല് നീക്കവുമായി കേന്ദ്ര ഏജന്സി സീരിയസ് ഫ്രോഡ് ഇന്വെസ്റ്റിഗേഷന് ഓഫീസ് (എസ്എഫ്ഐഒ). ആലുവയിലെ സിഎംആര്എല് ആസ്ഥാനത്ത് എസ്എഫ്ഐഒ സംഘം മിന്നല് റെയ്ഡിനെത്തി. എസ്ഐഒ ഡെപ്യൂട്ടി ഡയറക്ടര് എം അരുണ് പ്രസാദിന്റെ നേതൃത്വത്തിലുള്ള സംഘമാണ് ഇന്ന് രാവിലെ ഒന്പതിന് സിഎംആര്എല് ഓഫീസിലെത്തിയത്.
നേരത്തെ അറിയിക്കാതെ എത്തിയ സംഘം ഉദ്യോഗസ്ഥര് എത്തിയതിനു പിന്നാലെ റെയ്ഡ് ആരംഭിച്ചു. കമ്പനി ഉദ്യോഗസ്ഥരോട് മൊബൈല് ഫോണോ ലാന്ഡ് ഫോണോ ഉപയോഗിക്കരുതെന്ന് നിര്ദേശം നല്കിയശേഷമാണ് പരിശോധന ആരംഭിച്ചത്. പരിശോധനയില് ക്രമക്കേട് കണ്ടെത്തിക്കഴിഞ്ഞാല് അന്വേഷണം ഇഡിയ്ക്കും സിബിഐയ്ക്കും കൈമാറാന് എസ്എഫ്ഐഒയ്ക്ക് കഴിയും.
മുഖ്യമന്ത്രി പിണറായി വിജയന്റെ മകള് വീണ വിജയന്റെ ഉടമസ്ഥതയിലുള്ള എക്സാലോജിക് സൊല്യൂഷന്സിന് 1.72 കോടി രൂപ മാസപ്പടിയായി നല്കിയെന്ന പരാതിയില് കഴിഞ്ഞ ആഴ്ചയാണ് കേന്ദ്ര കമ്പനികാര്യ മന്ത്രാലയം എസ്എഫ്ഐഒയിലെ ആറ് ഓഫീസര്മാരുടെ സംഘത്തെ നിയോഗിക്കുന്നത്.
പിസി ജോര്ജിന്റെ മകന് അഡ്വ.ഷോണ് ജോര്ജ് നല്കിയ പരാതിയിലാണ് അന്വേഷണം. അന്വേഷണത്തിന് ഹൈക്കോടതി മേല്നോട്ടം ആവശ്യപ്പെട്ട് ഷോണ് നല്കിയ പരാതി അടുത്തയാഴ്ച കോടതി വീണ്ടും പരിഗണിക്കും.
അതേസമയം, ലോക്സഭാ തെരഞ്ഞെടുപ്പ് അടുത്ത് വരുന്ന സാഹചര്യത്തില് അന്വേഷണത്തെ നിയമപരമായും രാഷ്ട്രീയമായും നേരിടാനാണ് സിപിഎം സെക്രട്ടറിയേറ്റ് തീരുമാനം. സിഎംആര്എല് ഉടമ ശശിധരന് കര്ത്ത സംസ്ഥാന സര്ക്കാരില് നിന്ന് നിയമവിരുദ്ധമായി ധാതുമണല് ഖനനം ചെയ്യല് അനുമതി നേടാനായി മുഖ്യമന്ത്രിയുടെ മകള്ക്ക് ചെയ്യാത്ത ജോലിക്ക് മാസാമാസം പ്രതിഫലം നല്കിയെന്നാണ് പരാതി. രാഷ്ട്രീയ പാര്ട്ടികള്ക്കും നേതാക്കള്ക്കും മാധ്യമങ്ങള്ക്കും 95 കോടി രൂപ മതിയായ രേഖകളില്ലാതെ നല്കിയെന്ന പരാതിയും അന്വേഷണ പരിധിയിലുണ്ട്. ആരോപണം നേരിടുന്ന നേതാക്കളില് പിണറായി വിജയന്, രമേഷ് ചെന്നിത്തല, അന്തരിച്ച ഉമ്മന് ചാണ്ടി, പി കെ കുഞ്ഞാലിക്കുട്ടി എന്നിവരും ഉള്പ്പെടുന്നു.
