സൗത്ത് ലണ്ടനിലെ ല്യുഷാമില് 30 കാരനെ അക്രമി വെടിവച്ചുകൊന്നു. തെക്കന് ലണ്ടനിലെ ല്യുഷാമില് കാറ്റ്ഫൊര്ഡ് ബ്രോഡ്വേക്ക് സമീപം രാവിലെ 4.30ന് ആണ് സംഭവം. വെടിയേറ്റ് വീണയാള്ക്ക് രണ്ട് വഴിപോക്കര് പ്രഥമ ശുശ്രൂഷ നല്കിയെങ്കിലും അയാളെ രക്ഷിക്കാനായില്ല. വെടിയുതിര്ത്ത ശേഷം ഓടിമറഞ്ഞ അക്രമിക്കായി പോലീസ് തിരച്ചില് തുടരുകയാണ്.
മെറ്റ് പോലീസിന്റെ സൗത്ത് ഈസ്റ്റ് ഏരിയയുടെ പോലീസിംഗ് ചുമതലയുള്ള ചീഫ് സുപ്രണ്ട് ട്രെവര് ലോറി സംഭവത്തില് ഖേദം രേഖപ്പെടുത്തി. തികച്ചും സങ്കടകരമായ രീതിയില് മരണമടഞ്ഞ യുവാവിന്റെ കുടുംബത്തോടും സുഹൃത്തുക്കളോടും അനുശോചനം രേഖപ്പെടുത്തുന്നതായും ലോറി പറഞ്ഞു.
തെക്കന് ലണ്ടനിലെ ഏറ്റവും തിരക്കേറിയ ഭാഗത്താണ് സംഭവം നടന്നതെന്നും അതുകൊണ്ടു തന്നെ സംഭവത്തിന് നിരവധി ദൃക്സാക്ഷികള് ഉണ്ടാകാന് ഇടയുണ്ടെന്നും പറഞ്ഞ ലോറി, സംഭവത്തെ കുറിച്ച് അറിയാവുന്നവരും സംഭവത്തിന് ദൃക്സാക്ഷികളായവരും വിവരങ്ങള് പോലീസുമായി പങ്കുവയ്ക്കാന് മുന്പോട്ട് വരണമെന്നും ആവശ്യപ്പെട്ടു. ഇത്തരത്തിലുള്ള സംഭവങ്ങള് സമൂഹ മനസാക്ഷിയെ നടുക്കുമെന്ന് അറിയാമെന്നും, എന്നാല്, അത്തരത്തിലുള്ള ആശങ്കകള് ദൂരീകരിക്കാനുള്ള നടപടികള് കൈക്കൊണ്ടിട്ടുണ്ടെന്നും ലോറി കൂട്ടിച്ചേര്ത്തു.
നഗരത്തിലെ ഒരു തീയറ്ററിന് മുന്പിലായിരുന്നു വെടിയേറ്റ നിലയില് ഇയാളെ കണ്ടെത്തിയത്. ഈ ഭാഗം സാധാരണയായി തിരക്കുള്ള ഒരു പ്രദേശമാണെന്നാണ് പ്രദേശവാസികള് പറയുന്നത്. സമൂഹമാധ്യമങ്ങളില് പ്രചരിക്കുന്ന വീഡിയോ ദൃശ്യങ്ങളില് ഒരു സ്ത്രീ, ഇയാളുടെ നെഞ്ചമര്ത്തി പ്രഥമശുശ്രൂഷ നല്കുന്നത് കാണാം. അധികം വൈകാതെ പാരാമെഡിക്സ് സംഭവസ്ഥലത്ത് എത്തുകയും ചെയ്തു. സംഭവസ്ഥലം ഇപ്പോള് പോലീസ് കസ്റ്റഡിയിലാണ്. .
