ഇന്ത്യന് യുവതിയെ ഓസ്ട്രേലിയയില് കൊന്ന് വേസ്റ്റ് ബിന്നിലിട്ട് ഭര്ത്താവ്; നാട്ടിലെത്തി മകനെ ഭാര്യവീട്ടില് ഏല്പ്പിച്ചു കുറ്റം ഏറ്റുപറഞ്ഞു
ഹൈദരാബാദ് സ്വദേശിയായ യുവതിയെ കൊന്ന് റോഡരികിലെ വേസ്റ്റ് ബിന്നില് തള്ളി ഭര്ത്താവ്. ഓസ്ട്രേലിയയിലെ വിക്ടോറിയ സംസ്ഥാനത്തെ ബക്ക്ലെയ്യിലാണ് സംഭവം. തെലങ്കാനയിലെ കിഴക്കന് ഹൈദരാബാദിലുള്ള ഉപ്പല് സ്വദേശിനി ചൈതന്യ മന്ദാഗനി (36) ആണ് കൊല്ലപ്പെട്ടത്.
കൊലയ്ക്കുശേഷം നാട്ടിലേക്ക് മടങ്ങിയ ഭര്ത്താവ് കുട്ടിയെ ചൈതന്യയുടെ മാതാപിതാക്കളെ ഏല്പ്പിച്ചു. തുടര്ന്ന് ചൈതന്യയെ താന് കൊന്നുവെന്ന് അവരോട് ഏറ്റുപറഞ്ഞു. തുടര്ന്ന് ചൈതന്യയുടെ മാതാപിതാക്കള് ഉപ്പല് എംഎല്എ ബന്ദാരി ലക്ഷ്മണ റെഡ്ഡിയെ അറിയിച്ചതോടെയാണ് കൊലപാതക വാര്ത്ത പുറംലോകം അറിയുന്നത്.
മാതാപിതാക്കളുടെ അഭ്യര്ഥന പ്രകാരം ചൈതന്യയുടെ മൃതദേഹം നാട്ടിലെത്തിക്കാന് ഇടപെടണമെന്നാവശ്യപ്പെട്ട് എംഎല്എ കേന്ദ്രമന്ത്രി ജി കിഷന് റെഡ്ഡിക്ക് കത്തയച്ചു. സംഭവത്തില് വിക്ടോറിയ പൊലീസ് അന്വേഷണം നടത്തുന്നുണ്ട്. വീട്ടില് വച്ചാണ് കൊല നടന്നത് എന്ന നിഗമനത്തിലാണ് പൊലീസ്.
