തെരഞ്ഞെടുക്കപ്പെട്ട് ഒരു വര്ഷത്തിനകം സ്കോട്ട് ലന്ഡിന്റെ ഫസ്റ്റ് മിനിസ്റ്റര് സ്ഥാനം ഒഴിഞ്ഞു ഹംസ യൂസഫ് . ഹംസ യൂസഫിന്റെ രാജിയോടെ കടുത്ത നേതൃത്വ പ്രതിസന്ധിയാണ് സ്കോട്ടിഷ് നാഷണല് പാര്ട്ടി നേരിടുന്നത്.
നിക്കോള സ്റ്റര്ജന് രാജി വച്ചതിനെ തുടര്ന്നാണ് ഹംസ യൂസഫ് നേതൃത്വ പദവിയിലെത്തിയത്.
പുതിയ നേതാവിനെ തിരഞ്ഞെടുക്കുന്നതു വരെ താന് പ്രഥമ മന്ത്രി സ്ഥാനത്ത് തുടരുമെന്ന് അദ്ദേഹം പറഞ്ഞു. എത്രയും പെട്ടെന്ന് നേതൃത്വ തിരഞ്ഞെടുപ്പ് ആരംഭിക്കാന് എസ്എന്പിയുടെ ദേശീയ സെക്രട്ടറിയോട് ആവശ്യപ്പെട്ടതായി അദ്ദേഹം അറിയിച്ചു.
യൂസഫിന്റെ രാജി വാര്ത്തയ്ക്ക് പിന്നാലെ ഈ ആഴ്ച അവസാനത്തോടെ നേതൃത്വ തിരഞ്ഞെടുപ്പിന്റെ സമയക്രമം തീരുമാനിക്കാന് ദേശീയ എക്സിക്യൂട്ടീവ് കമ്മിറ്റി യോഗം ചേരുമെന്ന് പാര്ട്ടി സ്ഥിരീകരിച്ചു. എസ്എന് പിയുടെ ഭരണഘടന അനുസരിച്ച് നേതൃസ്ഥാനത്തേയ്ക്ക് വരുന്ന ആള്ക്ക് കുറഞ്ഞത് നൂറു പേരുടെയെങ്കിലും നാമനിര്ദ്ദേശങ്ങള് ഉണ്ടായിരിക്കണം. ഇതോടൊപ്പം കുറഞ്ഞത് 20 ബ്രാഞ്ചുകളില് നിന്ന് എങ്കിലും പിന്തുണയും ലഭിക്കണം. ഇതിനു പുറമെ നാമനിര്ദ്ദേശം പാര്ട്ടിയുടെ ദേശീയ എക്സിക്യൂട്ടീവ് കമ്മിറ്റി അംഗീകരിക്കുകയും ചെയ്യണം
