ബ്രാഡ് ഫോര്ഡില് വീടിന് തീപിടിച്ച് 10 വയസുകാരിയായ പെണ്കുട്ടി ദാരുണമായി കൊല്ലപ്പെട്ടു. 37 വയസുള്ള ഒരു സ്ത്രീയും പതിനൊന്നും ആറും മൂന്നും പ്രായമുള്ള മൂന്നു കുട്ടികളും പൊള്ളലേറ്റു ആശുപത്രിയിലാണ്. ഇവരുടെ പരുക്ക് ഗുരുതരമല്ലെന്നാണ് പുറത്തുവരുന്ന വിവരങ്ങള്.
പെണ്കുട്ടി സംഭവ സ്ഥലത്തു വച്ചു തന്നെ മരിച്ചിരുന്നു. ഞായറാഴ്ച രാവിലെയാണ് കിങ്സ് ഡെയ്ല് ഡ്രൈവില് വീടിന് ഗുരുതരമായ തീപിടുത്തമുണ്ടായതായി യോര്ക്ക് ഷെയര് പോലീസിന് വിവരം ലഭിച്ചത്. ഇത് തികച്ചും ദാരുണമായ സംഭവമാണെന്നും ദുരന്തം നേരിട്ട കുടുംബത്തിന് എല്ലാവിധ പിന്തുണയും നല്കുന്നതായും ബ്രാഡ്ഫോര്ഡ് ജില്ലാ പോലീസിലെ ഡിറ്റക്റ്റീവ് ചീഫ് ഇന്സ്പെക്ടര് സഹീര് അബ്ബാസ് പറഞ്ഞു.
തീപിടുത്തത്തിന്റെ കാരണത്തെ കുറിച്ച് അഗ്നിശമന സേന നടത്തിയ അന്വേഷണത്തില് സംശയിക്കുന്ന തരത്തില് ഒന്നും കണ്ടെത്തിയിട്ടില്ലെന്നാണ് പുറത്തുവരുന്ന വിവരങ്ങള് .
