പീഡനവീരന് പ്രജ്വല് രേവണ്ണയെ തേടി കര്ണാടക പൊലീസ് ജര്മനിയിലേക്ക്
മൂവായിരത്തിലേറെ അശ്ലീല വീഡിയോയുമായി പീഡന വിവാദത്തില്പ്പെട്ട കര്ണാടകയിലെ ഹസനിലെ സിറ്റിംഗ് എംപിയും ജെഡിഎസ് സ്ഥാനാര്ത്ഥിയുമായ പ്രജ്വല് രേവണ്ണയെ തേടി കര്ണാടക പൊലീസ് ജര്മനിയിലേക്ക്. ലുക്ക് ഔട്ട് നോട്ടീസ് പുറത്തിറക്കിയിട്ടും രേവണ്ണയെ അറസ്റ്റ് ചെയ്യാന് സാധിക്കാത്തതിനെ തുടര്ന്നാണ് കര്ണാടക പൊലീസിന്റെ പുതിയ നീക്കം.
ഞായറാഴ്ചയോ തിങ്കളാഴ്ചയോ പ്രജ്വല് ജര്മനിയില് നിന്നെത്തി കീഴടങ്ങുമെന്നായിരുന്നു പൊലീസിന്റെ വിലയിരുത്തല്. ഇതേ തുടര്ന്ന് ഞായറാഴ്ച മുതല് പൊലീസ് എയര്പോര്ട്ടുകളില് ശക്തമായ നിരീക്ഷണം ഏര്പ്പെടുത്തിയിരുന്നു. തിരഞ്ഞെടുപ്പിന് പിന്നാലെ അശ്ലീല വീഡിയോ പുറത്തുവന്നതോടെയാണ് നയതന്ത്ര പാസ്പോര്ട്ട് ഉപയോഗിച്ച് രേവണ്ണ ജര്മ്മനിയിലേക്ക് കടന്നത്.
പ്രജ്വല് കീഴടങ്ങാന് കൂട്ടാക്കാത്തതിനെ തുടര്ന്നാണ് ഇന്റര്പോളിന്റെ സഹായത്തോടെ ജര്മ്മനിയില് പോയി അറസ്റ്റ് ചെയ്യാന് ആലോചിക്കുന്നത്. ബ്ലൂ കോര്ണര് നോട്ടീസ് പുറപ്പെടുവിച്ച് ഇന്റര്പോളിന്റെ സഹായത്തോടെ എട്ടംഗ അന്വേഷണ സംഘം ജര്മനിയിലേക്ക് പോകുമെന്നാണ് പുറത്തുവരുന്ന റിപ്പോര്ട്ടുകള്.
ലൈംഗികാതിക്രമക്കേസ് അന്വേഷിക്കുന്ന പ്രത്യേക അന്വേഷണ സംഘമാണ് കഴിഞ്ഞയാഴ്ച ലുക്ക് ഔട്ട് നോട്ടീസ് പുറത്തിറക്കിയത്.
ലൈംഗികാതിക്രമ പരാതിയില് പ്രജ്വല് രേവണ്ണയ്ക്കും പിതാവ് എംഎല്എ രേവണ്ണയ്ക്കും പ്രത്യേകാന്വേഷണ സംഘം സമന്സയച്ചിട്ടുണ്ട്. ഹൊലെനരസിപുര സ്റ്റേഷനില് രജിസ്റ്റര് ചെയ്യപ്പെട്ട ലൈംഗികപീഡനപ്പരാതിയുടെ അടിസ്ഥാനത്തിലാണ് പ്രജ്വല് രേവണ്ണയ്ക്കും അച്ഛന് രേവണ്ണയ്ക്കും പ്രത്യേകാന്വേഷസംഘം സമന്സയച്ചിരിക്കുന്നത്. എത്രയും പെട്ടെന്ന് നേരിട്ട് ഹാജരാകാനാണ് നോട്ടീസില് ആവശ്യപ്പെട്ടിരിക്കുന്നത്. സംസ്ഥാനത്ത് പ്രചരിച്ച ആയിരക്കണക്കിന് അശ്ലീല വീഡിയോകളില് വിശദീകരണം നല്കണമെന്നും സമന്സില് ആവശ്യപ്പെട്ടിട്ടുണ്ട്.
ഗുരുതരമായ കുറ്റകൃത്യങ്ങള് നടത്തിയ ഒരാളെ തിരിച്ച് ഇന്ത്യയിലേക്ക് നാടുകടത്താന് ജര്മന് ഫെഡറല് പൊലീസിനെ വിദേശകാര്യമന്ത്രാലയത്തിന്റെ സഹായത്തോടെ വിവരമറിയിക്കണം. നാടുകടത്തേണ്ട തരം കുറ്റമാണ് പ്രതി ചെയ്തതെന്ന് ഫെഡറല് പൊലീസിന് ബോധ്യപ്പെട്ടാല് ലോക്കല് ഫോറിനര് റജിസ്ട്രേഷന് ഓഫീസിനെ വിവരമറിയിച്ച് പ്രതിയെ ലോക്കല് പൊലീസ് കസ്റ്റഡിയിലെടുക്കും. ഫെഡറല് പൊലീസിന് കൈമാറും. അവിടെ നിന്ന് ഫെഡറല് പൊലീസ് ഉദ്യോഗസ്ഥര് തന്നെ വിമാനമാര്ഗം പ്രതിയെ ഇന്ത്യയിലെത്തിച്ച് തദ്ദേശീയ പൊലീസിന് കൈമാറും.
പ്രജ്വല് രേവണ്ണയുമായി ബന്ധപ്പെട്ട അശ്ലീല വീഡിയോ വിവാദത്തിന് പിന്നാലെയാണ് പ്രജ്വലിന്റെ വീട്ടില് ജോലി ചെയ്തിരുന്ന സ്ത്രീ പരാതിയുമായി രംഗത്തെത്തിയത്. പ്രജ്വലിനും പിതാവ് എച്ച്ഡി രേവണ്ണയ്ക്കുമെതിരെയാണ് ലൈംഗികമായി പീഡിപ്പിച്ചെന്ന പരാതി ജോലിക്കാരി നല്കിയത്. ജെഡിഎസ് ദേശീയ അധ്യക്ഷനും മുന് പ്രധാനമന്ത്രിയുമായ എച്ച്ഡി ദേവഗൗഡയുടെ മകനാണ് മുന്മന്ത്രി എച്ച്ഡി രേവണ്ണ. രേവണ്ണയുടെ മകനാണ് പ്രജ്വല്.
ജോലിക്ക് ചേര്ന്ന് നാലാം മാസം മുതല് പ്രജ്വല് തന്നെ ക്വാര്ട്ടേഴ്സിലേക്ക് വിളിപ്പിക്കാന് തുടങ്ങിയെന്നും എച്ച്ഡി രേവണ്ണയും പ്രജ്വലും വനിതാ ജോലിക്കാരെ വീട്ടില് വെച്ച് ലൈംഗികമായി പീഡിപ്പിച്ചെന്നും അതിജീവിത ആരോപിച്ചു. രേവണ്ണയുടെ ഭാര്യ വീട്ടിലില്ലാത്തപ്പോഴെല്ലാം അയാള് സ്ത്രീകളെ സ്റ്റോര് റൂമിലേക്ക് വിളിപ്പിക്കും. പഴങ്ങള് കൊടുക്കുന്ന സമയത്ത് ശരീരത്തില് സ്പര്ശിക്കും. സാരിയുടെ പിന്നുകള് അഴിച്ച് ലൈംഗികമായി ഉപദ്രവിക്കാന് തുടങ്ങും- അവര് കൂട്ടിച്ചേര്ത്തു. അതേസമയം പ്രജ്വല് രേവണ്ണയുടെ ലൈംഗിക വീഡിയോകളെക്കുറിച്ച് ബിജെപി നേതാക്കള് നേരത്തെ അറിഞ്ഞിരുന്നതായി റിപ്പോര്ട്ട് പുറത്തുവന്നു.
മൂവായിരത്തോളം വീഡിയോകള് അടങ്ങിയ പെന്ഡ്രൈവ് ലഭിച്ചിട്ടുണ്ടെന്നും അതിനാല് ഹാസനില് ജെഡിഎസിന് സീറ്റ് നല്കിയാല് ഇത് തിരിച്ചടിയാകുമെന്നുമാണ് ബിജെപി നേതാവായ ദേവരാജ ഗൗഡ മാസങ്ങള്ക്ക് മുന്പേ പാര്ട്ടി സംസ്ഥാന അധ്യക്ഷന് ബിവൈ വിജയേന്ദ്രയ്ക്ക് കത്ത് നല്കി അറിയിച്ചിരുന്നു. തനിക്ക് ലഭിച്ച പെന്ഡ്രൈവില് ആകെ 2976 വീഡിയോകളുണ്ടെന്നാണ് ദേവരാജ ഗൗഡ കത്തില് അവകാശപ്പെട്ടിരുന്നത്.
സര്ക്കാര് ഉദ്യോഗസ്ഥരായ സ്ത്രീകളടക്കമുള്ളവരുമായി പ്രജ്വല് രേവണ ലൈംഗികവേഴ്ചയിലേര്പ്പെടുന്ന ദൃശ്യങ്ങളാണിത്. ഈ വീഡിയോകള് സൂക്ഷിച്ചുവെച്ച് സ്ത്രീകളെ ഭീഷണിപ്പെടുത്തി വീണ്ടും ഇത്തരം പ്രവൃത്തികളിലേര്പ്പെടാന് പ്രജ്വല് രേവണ്ണ നിര്ബന്ധിച്ചിരുന്നതായും ദേവരാജ ഗൗഡ ആരോപിച്ചിരുന്നു. വീഡിയോകള് പ്രചരിച്ചതോടെ സംഭവത്തില് അന്വേഷണത്തിനായി പ്രത്യേകസംഘത്തെ കര്ണാടക സര്ക്കാര് നിയോഗിച്ചിരുന്നു. ഇതിനുപിന്നാലെയാണ് വീട്ടുജോലിക്കാരിയായ 47കാരി പ്രജ്വല് രേവണ്ണയ്ക്കും പിതാവ് എച്ച്ഡി രേവണ്ണയ്ക്കും എതിരേ പീഡന പരാതി നല്കിയത്.
