യുകെയില് വീടു വിലയില് കുതിപ്പ്. കഴിഞ്ഞ മാസം വച്ചു നോക്കുമ്പോള് 0.8 ശതമാനം വര്ധനവാണുള്ളത്. ഇതോടെ ശരാശരി വില 375131 പൗണ്ടിലെത്തി. വീട് വില കുറയുമെന്നായിരുന്നു പ്രവചനം. പലിശ നിരക്ക് കുറക്കാത്തതും മോര്ട്ട്ഗേജ് കൂടി നില്ക്കുന്നതും മൂലം ആളുകള് വീടു വാങ്ങുന്നത് മാറ്റിവയ്ക്കുമെന്നും വീടുകളുടെ വില്പ്പന കാര്യമായി നടക്കില്ലെന്നുമായിരുന്നു വിലയിരുത്തല്. എന്നാല് പ്രോപ്പര്ട്ടി വെബ്സൈറ്റുകളുടെ റിപ്പോര്ട്ട് പ്രകാരം ആളുകള് വീടു വാങ്ങാന് കൂടുതലായി ആഗ്രഹിക്കുന്നുവെന്നു വ്യക്തമാക്കുന്നു.
നിലവിലെ വീട് മാറ്റി പുതിയ വീട് വാങ്ങുന്നവരുടെ എണ്ണം കൂടിയതായി വിദഗ്ധര് പറയുന്നു. ഈ വര്ഷം ജനുവരി മുതല് ഏപ്രില് വരെയുള്ള കാലയളവില് കഴിഞ്ഞ വര്ഷത്തെ അപേക്ഷിച്ച് കൊടുക്കല് വാങ്ങലുകള് 17 ശതമാനം കൂടുതലാണ്. മേയില് വീടുവില കുതിക്കുന്ന രീതിയാണ് പൊതുവേ കാണാറുള്ളത്.
വീടിന്റെ വില മാത്രമല്ല വാടകയിലും വര്ധനവുണ്ട്. വാടകയില് 8.3 ശതമാനമാണ് ഉയര്ന്നിരിക്കുന്നത്. ലണ്ടന് ഉള്പ്പെടെ പ്രദേശങ്ങളില് വീടുവില വളരെ കൂടുതലായതിനാല് പലരും വില കുറഞ്ഞ പ്രദേശങ്ങളില് വീടു വാങ്ങാന് താല്പര്യപ്പെടുന്നതായി മുമ്പ് റിപ്പോര്ട്ടുകളുണ്ടായിരുന്നു.
അടുത്ത അഞ്ച് വര്ഷത്തില് ശരാശരി ഭവനവിലയില് 61,500 പൗണ്ട് വര്ധനവ് ഉണ്ടാകുമെന്നാണ് എസ്റ്റേറ്റ് ഏജന്റ് സാവില്സിന്റെ പ്രവചനം. 2028 അവസാനത്തോടെ ബ്രിട്ടനിലെ ശരാശരി വീടിന്റെ മൂല്യം 21.6 ശതമാനം വര്ധിക്കുമെന്നാണ് ഇവര് കണക്കാക്കുന്നത്.
കഴിഞ്ഞ വര്ഷം നവംബറില് 17.9% വര്ദ്ധന പ്രവചിച്ച ഇടത്താണ് എസ്റ്റേറ്റ് ഏജന്റ് നിരക്ക് പുതുക്കിയിരിക്കുന്നത്. വാര്ഷിക വര്ദ്ധന 2024 വര്ഷത്തില് 2.5 ശതമാനം ഉയരുമെന്നും സാവില്സ് പ്രവചിക്കുന്നു. ഈ വര്ഷം 3 ശതമാനം ഭവനവില താഴുമെന്നാണ് ഇവര് നേരത്തെ പ്രതീക്ഷിച്ചിരുന്നത്. എന്നാല് മോര്ട്ട്ഗേജ് കടമെടുപ്പിന്റെ ചെലവുകള് പുനര്നിര്ണ്ണയിക്കപ്പെട്ട സാഹചര്യത്തില് ഈ പ്രവചനം പുതുക്കുകയായിരുന്നു.
ഈ വര്ഷം ഭവന ഇടപാടുകളുടെ എണ്ണം 1.05 മില്ല്യണ് എത്തിച്ചേരുമെന്നും സാവില്സ് പറയുന്നു. അതേസമയം കടമെടുപ്പ് ചെലവ്, രാഷ്ട്രീയ അനിശ്ചിതത്വം എന്നിങ്ങനെ ബാഹ്യമായ വിഷയങ്ങള് മൂലം ഹൗസിംഗ് വിപണിയില് ചാഞ്ചാട്ടം നേരിടുമെന്ന് ഇവര് കൂട്ടിച്ചേര്ത്തു. മോര്ട്ട്ഗേജ് ചെലവുകളില് നിലവില് സംഭവിച്ച ചെറിയ ഇടിവാണ് ഭവനവില ഉയരുന്നതിലേക്ക് സംഭാവന ചെയ്യുന്നതെന്നാണ് സാവില്സ് വിശദീകരണം.
