കോട്ടയത്ത് പക്ഷിപ്പനി സ്ഥിരീകരിച്ചതിനെ തുടര്ന്ന് വളര്ത്തുപക്ഷികളെ കൊന്നൊടുക്കാന് തീരുമാനം. കോഴി വില്പ്പനയ്ക്കടക്കം നിരോധനം ഏര്പ്പെടുത്തിയിട്ടുണ്ട്. അതേസമയം പക്ഷിപ്പനി സ്ഥിരീകരിച്ച സ്ഥലത്തിന് ഒരു കിലോമീറ്റര് ചുറ്റളവ് പക്ഷിപ്പനി ബാധിതമേഖലയായി പ്രഖ്യാപിച്ചു. ഒരു കിലോമീറ്റര് മുതല് 10 കിലോമീറ്റര് വരെയുള്ള ചുറ്റളവ് നിരീക്ഷണ മേഖലയായും പ്രഖ്യാപിച്ചിട്ടുണ്ട്.
മൃഗസംരക്ഷണവകുപ്പിന്റെ മണര്കാട് പ്രാദേശിക കോഴി വളര്ത്തല് കേന്ദ്രത്തിലാണ് പക്ഷിപ്പനി സ്ഥിരീകരിച്ച വിവരം ജില്ലാ കളക്ടര് വി. വിഗ്നേശ്വരി അറിയിച്ചത്. ഒന്പതിനായിരം കോഴികളെയാണ് ഇവിടെ വളര്ത്തിയിരുന്നത്. കോഴികള് കൂട്ടത്തോടെ ചത്തതിനെത്തുടര്ന്ന് ഭോപ്പാലിലെ നാഷണല് ഇന്സ്റ്റിറ്റ്യൂട്ട് ഓഫ് ഹൈ സെക്യൂരിറ്റി ആനിമല് ഡീസിസസ് ലാബില് നടത്തിയ സാമ്പിള് പരിശോധനയിലാണ് എച്ച്5 എന്1 സ്ഥിരീകരിച്ചത്.
പക്ഷിപ്പനി സ്ഥിരീകരിച്ച സ്ഥലത്തിന് ഒരു കിലോമീറ്റര് ചുറ്റളവിലുള്ള എല്ലാ വളര്ത്തു പക്ഷികളെയും മൃഗസംരക്ഷണവകുപ്പിന്റെ മേല്നോട്ടത്തില് അടിയന്തരമായി കൊന്നൊടുക്കി ശാസ്ത്രീയമായി സംസ്കരിക്കും. ഇവിടെ അണുനശീകരണം നടത്താനുള്ള നടപടി സ്വീകരിക്കും. മൃഗസംരക്ഷണ വകുപ്പിന്റെ ദ്രുതകര്മസംഘമാണ് പക്ഷികളെ ദയാവധം ചെയ്തു ശാസ്ത്രീയമായി സംസ്കരിക്കുക. കേന്ദ്ര സര്ക്കാരിന്റെ 2021ലെ നിര്ദേശങ്ങള് പ്രകാരമാണ് സംസ്ക്കരണനടപടി.
പക്ഷിപ്പനി സ്ഥിരീകരിച്ചതിനെത്തുടര്ന്ന് കളക്ട്രേറ്റില് വിവിധ വകുപ്പ് ഉദ്യോഗസ്ഥരുടെ യോഗം ചേര്ന്ന് അടിയന്തര നടപടിക സ്വീകരിക്കാനും തീരുമാനമായിട്ടുണ്ട്. മൃഗസംരക്ഷവകുപ്പ്, തദ്ദേശസ്വയംഭരണം, റവന്യൂ, പൊലീസ്, വനം, ആരോഗ്യം, അഗ്നിരക്ഷാ സേന, മോട്ടോര്വാഹന വകുപ്പ് എന്നീ വകുപ്പുകളും തദ്ദേശസ്വയംഭരണ സ്ഥാപനങ്ങളും ഏകോപിപ്പിച്ചുള്ള പ്രവര്ത്തനത്തിന് ജില്ലാ കളക്ടര് നിര്ദേശം നല്കി.
അതേസമയം മണര്കാട് പഞ്ചായത്തിലെ 12,13,14 വാര്ഡുകളിലെയും പുതുപ്പള്ളി പഞ്ചായത്തിലെ രണ്ട്, മൂന്ന് വാര്ഡുകളിലെയും കോഴി, താറാവ്, കാട, മറ്റുവളര്ത്തുപക്ഷികള് എന്നിവയുടെ മുട്ട, ഇറച്ചി, വളം തുടങ്ങിയ ഉല്പ്പന്നങ്ങളുടെയും വില്പനയും കടത്തലും ഇനിയൊരു അറിയിപ്പ് ഉണ്ടാകുന്നതുവരെ പൂര്ണമായി നിരോധിച്ചു.
നിരീക്ഷണ മേഖലയില് ഉള്പ്പെടുന്ന മണര്കാട്, പുതുപ്പള്ളി പഞ്ചായത്തുകളിലെ മറ്റുവാര്ഡുകളിലും കോട്ടയം, ഏറ്റുമാനൂര് നഗരസഭകളിലും വിജയപുരം, തിരുവാര്പ്പ്, അയ്മനം, ആര്പ്പൂക്കര, അതിരമ്പുഴ, അയര്ക്കുന്നം, കിടങ്ങൂര്, അകലക്കുന്നം, പള്ളിക്കത്തോട്, പാമ്പാടി, മീനടം, കറുകച്ചാല്, വാകത്താനം, പനച്ചിക്കാട്, കൂരോപ്പട ഗ്രാമപഞ്ചായത്തുകളിലും മെയ് 29 വരെ ഏഴുദിവസത്തേക്ക് കോഴി, താറാവ്, കാട, മറ്റുവളര്ത്തുപക്ഷികള് എന്നിവയുടെ മുട്ട, ഇറച്ചി, വളം തുടങ്ങിയ ഉല്പ്പന്നങ്ങളുടെയും വില്പനയും കടത്തലും നിരോധിച്ചിട്ടുണ്ട്.
