പ്രധാനമന്ത്രി റിഷി സുനാകിന്റെ വസതിയില് അതിക്രമിച്ചു കടന്നതിന് 4 പേരെ അറസ്റ്റ് ചെയ്തതായി പോലീസ് സ്ഥിരീകരിച്ചു. ജപ്പാന്റെ നയതന്ത്ര പ്രതിനിധികളുടെ സന്ദര്ശനത്തെ തുടര്ന്ന് പ്രധാനമന്ത്രി ലണ്ടനില് ആയിരുന്നപ്പോഴാണ് സംഭവം നടന്നത്.
നോര്ത്ത് യോര്ക്ക് ഷെയറിലെ കിര്ബി സിഗ്സ്റ്റണിലെ പ്രധാനമന്ത്രിയുടെ വസതിയിലാണ് 4 പേര് അതിക്രമിച്ച് കയറിയത്. വീടിനുള്ളില് പ്രവേശിച്ച് അധികം താമസിയാതെ തന്നെ ഇവരെ പിടികൂടിയതായാണ് പോലീസ് അറിയിച്ചത്.
അറസ്റ്റിലായവര് പാലസ്തീന് അനുകൂല യൂത്ത് ഡിമാന്ഡ് എന്ന സംഘടനയുടെ പ്രവര്ത്തകരാണ്. കണ്സര്വേറ്റീവ് പാര്ട്ടിയും ലേബര് പാര്ട്ടിയും ഇസ്രയേല് അനുകൂല പ്രവര്ത്തനങ്ങള് നിര്ത്തണമെന്ന ആവശ്യമാണ് സംഘടന പ്രധാനമായും ഉന്നയിക്കുന്നത്. അറസ്റ്റിലായ മൂന്ന് പേര് സംഘടനയുടെ സജീവ പ്രവര്ത്തകരും നാലാമന് ഫോട്ടോഗ്രാഫറും ആണ്. ലണ്ടന്, ബോള്ട്ടണ്, മാഞ്ചസ്റ്റര്, ചീചെസ്റ്റര് എന്നിവിടങ്ങളില് നിന്നുള്ളവരാണ് അറസ്റ്റിലായത്.
കഴിഞ്ഞവര്ഷം സമാനമായ ഒരു സംഭവത്തില് പ്രധാനമന്ത്രിയും കുടുംബവും അവധി ആഘോഷിക്കാന് കാലിഫോര്ണിയയില് ആയിരുന്ന സമയത്ത് പ്രതിഷേധക്കാര് വസതിയില് കയറി ബാനര് ഉയര്ത്തിയത് വാര്ത്തകളില് ഇടം നേടിയിരുന്നു.
