എന്റെ ജീവിതം വേണമെങ്കില് ഒരു ബുക്ക് ആക്കിമാറ്റാം- ശാലുമേനോന്
സോളാര് തട്ടിപ്പു കേസുമായി കേസുമായി ബന്ധപ്പെട്ട് 49 ദിവസത്തോളം ജയിലില് കിടന്ന ആളാണ് നടി ശാലു മേനോന്. സോളാര് തട്ടിപ്പു കേസിലെ പ്രതിയായ ബിജു രാധാകൃഷ്ണനുമായി ചേര്ന്ന് ആളുകളുടെ പണം തട്ടിയെടുത്തു എന്നായിരുന്നു അന്ന് ശാലു മേനോനെതിരായി എത്തിയ കേസ്. തന്റെ ജയില് കാലഘട്ടത്തെ കുറിച്ച് ശാലു മേനോന് തുറന്നു പറയുന്നുണ്ട് . വിഷമഘട്ടത്തില് ഒപ്പം നിന്നത് അമ്മയും അമ്മൂമ്മയും തന്റെ സ്റ്റുഡന്റ്സും അവരുടെ പാരന്റ്സും മാത്രമാണെന്ന് ശാലു പറയുന്നു. 'സിനിമയില് മാത്രം കണ്ടിട്ടുള്ള കാര്യങ്ങളാണ് ഞാന് എന്റെ ജീവിതത്തില് അനുഭവിച്ചിട്ടുള്ളത്.'
'ജയിലില് കിടന്നുവെന്നതിന്റെ പേരില് പലരും എന്നെ സീരിയലില് നിന്നും ഒഴിവാക്കിയിട്ടുണ്ട്. ഞാന് തെറ്റ് ചെയ്തിട്ടില്ലാത്തയാളാണ്. അതിന്റെ പേരില് ഞാന് വിഷമിച്ചിരിക്കേണ്ട കാര്യമില്ലല്ലോ. പല തരത്തിലുള്ള ആളുകളെ ജയിലില് വച്ച് കണ്ടു. 49 ദിവസം ജയിലില് കിടന്നു. പലരുടെയും വിഷമങ്ങള് മനസിലാക്കി. നടി എന്ന രീതിയിലുള്ള പരിഗണനയൊന്നും ലഭിച്ചിരുന്നില്ല.'
'എല്ലാവരേയും പോലെ തറയില് പാ വിരിച്ചാണ് ഉറങ്ങിയിരുന്നത്. എന്റെ കൂടെ ഒരാളെ താമസിച്ചിരുന്നുള്ളു. ഒരു പ്രായമായ അമ്മയായിരുന്നു. നാല് വര്ഷമായി അവര് ജയിലില് കിടക്കുകയാണ്. മകന് അമ്മയെ വേണ്ട. അതുകൊണ്ടാണ് അവര് ജയിലില് തന്നെ തുടരുന്നത്. അധികം ആരെയും വിശ്വസിക്കരുതെന്ന പാഠം ഞാന് പഠിച്ചു.'
'അറസ്റ്റുണ്ടാകുമെന്ന് ആരും പ്രതീക്ഷിച്ചിരുന്നില്ല. അന്ന് ന്യൂസ് കവര് ചെയ്യാന് വന്ന മീഡിയയ്ക്ക് ഞാന് ചായ വരെ കൊടുത്തിരുന്നു. അറസ്റ്റ് ചെയ്യുമോയെന്ന് പേടിച്ച് കുടുംബക്കാര് വരെ മാറി നിന്നു. എന്റെ ജീവിതം വേണമെങ്കില് ഒരു ബുക്ക് ആക്കിമാറ്റം' എന്നാണ് ശാലു പറയുന്നത്.
