ബര്മിംഗ്ഹാം: ബര്മിംഗ്ഹാമില് പനിബാധിച്ചു ചികിത്സയിലിരിക്കെ അപ്രതീക്ഷിതമായി വിടവാങ്ങിയ അഞ്ചു വയസുകാരി ഹന്ന മേരി കണ്ണീരോര്മ്മ . വൂള്വര്ഹാംപ്ടണിലെ ബില്സെന്റ് ഫിലിപ്പ് - ജെയ്മോള് വര്ക്കി ദമ്പതികളുടെ മകള് ഹന്ന മേരി ഫിലിപ്പ് ആണ് ചികിത്സയിലിരിക്കെ മരിച്ചത്.
പനി വിട്ടു മാറാത്തതിനെ തുടര്ന്ന് കഴിഞ്ഞ ഒരുമാസമായി ചികിത്സയിലായിരുന്നു പെണ്കുട്ടി. വിദഗ്ദ ചികിത്സക്കായി കുട്ടിയെ ബര്മിംഗ്ഹാം വിമണ്സ് ആന്ഡ് ചില്ഡ്രന്സ് എന്എച്ച്എസ് ഹോസ്പിറ്റലില് പ്രവേശിപ്പിപ്പിക്കുകയും ചെയ്തിരുന്നു. എന്നാല് ചികിത്സയില് തുടരവേ ഹൃദയാഘാതം സംഭവിച്ചതു മൂലം ഹന്ന മരണത്തിന് കീഴടങ്ങുകയായിരുന്നു.
മല്ലപ്പള്ളിയിലെ തുരുത്തിക്കാട് സ്വദേശി ബില്സെന്റ് ഫിലിപ്പ് എട്ടു മാസം മുമ്പാണ് ഹന്നയേയും ഇളയ സഹോദന് ആല്ബിനേയും കൂട്ടി യുകെയില് എത്തുന്നത്. ഹന്നയുടെ അമ്മ നഴ്സായ ജെയ്മോള് സ്വകാര്യ കെയര് ഹോമില് ജോലി ചെയ്തുവരികയായിരുന്നു. ബര്മിംഗ്ഹാം ഹെര്മ്മോന് മാര്ത്തോമാ ദേവാലയത്തില് സജീവാംഗങ്ങളായിരുന്നു ഈ കുടുംബം. യുകെയിലെത്തി ജീവിതം കരുപ്പിടിപ്പിക്കാനുള്ള ശ്രമത്തിനിടെയാണ് ഹന്നയ്ക്ക് സുഖമില്ലാതെയായത്.
ഹന്നയുടെ അകാല വേര്പാടില് കുടുംബത്തിന് താങ്ങായി യുകെയില് തന്നെയുള്ള ബന്ധുമിത്രാധികളും സുഹൃത്തുക്കളും ഒപ്പമുണ്ട്. ഹന്നയുടെ മൃതദേഹം തുടര്നടപടികള്ക്ക് ശേഷം നാട്ടില് എത്തിക്കുന്നതിനും കുടുംബത്തെ സഹായിക്കുന്നതിനുമായി യു കെയില് തന്നെയുള്ള പിതൃസഹോദരി ബിന്ദു ഫിലിപ്പ്, കുടുംബ സുഹൃത്തുക്കളായ സാം മാത്യു, ജിബു ചെറിയാന് എന്നിവരുടെ പേരില് ഫണ്ട് ശേഖരണവും ആരംഭിച്ചിട്ടുണ്ട്.
