ആസിഫ് അലിയെ പരസ്യമായി അപമാനിച്ച് രമേശ് നാരായണന്, പ്രതിഷേധം ശക്തം
എംടി വാസുദേവന്റെ കഥകളെ അടിസ്ഥാനമാക്കി ഒരുങ്ങുന്ന ആന്തോളജി 'മനോരഥങ്ങള്' ട്രെയ്ലര് റിലീസിനിടെ നടന്ന പുരസ്കാര ചടങ്ങില് നടന് ആസിഫ് അലിയില് നിന്നും പുരസ്കാരം സ്വീകരിക്കാന് പരസ്യമായി വിസമ്മതിച്ച് സംഗീതസംവിധായകന് രമേശ് നാരായണന്.
രമേശ് നാരായണന് പുരസ്കാരം സമ്മാനിക്കുന്നതിനായി ആസിഫ് അലിയെ ക്ഷണിച്ചു വേദിയില് എത്തിയപ്പോള് പുരസ്കാരം വാങ്ങാതെ, രമേശ് നാരായണന് ആസിഫില് നിന്നും ട്രോഫി വാങ്ങുകയും ആസിഫിന്റെ മുഖത്ത് പോലും നോക്കാതെ സംവിധായകന് ജയരാജനെ വേദിയിലേക്ക് വിളിപ്പിച്ച് അദ്ദേഹത്തിന്റെ കൈയ്യില് പുരസ്കാരം കൊടുക്കുകയും അത് തനിക്ക് നല്കാന് ആവശ്യപ്പെടുകയുമായിരുന്നു.
ജയരാജന് നല്കിയ പുരസ്കാരം വാങ്ങിക്കൊണ്ട് രമേശ് നാരായണന് ക്യാമറകള്ക്ക് പോസ് ചെയ്യുന്നുമുണ്ട്. ഇതിന് ശേഷം ജയരാജനെ കെട്ടിപ്പിടിച്ച് ഇദ്ദേഹം സന്തോഷം പങ്കുവെക്കുകയും ചെയ്തു. എന്നാല് ആസിഫിന് ഒരു ഷേക്ക് ഹാന്ഡ് നടനെ അഭിവാദ്യം ചെയ്യാനോ ഒന്നും രമേശ് നാരായണന് തയ്യാറായില്ല.
സംഭവത്തിന്റെ വീഡിയോ പുറത്തുവന്നതിന് പിന്നാലെ രൂക്ഷ വിമര്ശനമാണ് രമേശ് നാരായണനെതിരെ സോഷ്യല് മീഡിയയില് ഉയരുന്നത്. മോശം പെരുമാറ്റമാണ് രമേശ് നാരായണില് നിന്ന് ഉണ്ടായതെന്നും രമേശ് നാരായണന് മാപ്പുപറയണമെന്നുമാണ് സോഷ്യല് മീഡിയയില് ഉയരുന്ന പ്രതികരണങ്ങള്.
എന്നാല് ആസിഫ് അലിയെ താന് അപമാനിച്ചിട്ടില്ലെന്ന് സംഗീതസംവിധായകന് രമേഷ് നാരായണ് പ്രതികരിച്ചു. ആസിഫ് അലി തനിക്ക് ആണോ അതോ താന് ആസിഫ് അലിക്ക് ആണോ മൊമന്റോ നല്കേണ്ടത് എന്ന് മനസിലായില്ല, അതുകൊണ്ടാണ് ജയരാജിനെ വിളിച്ച് അത് സ്വീകരിച്ചത് എന്നാണ് രമേശ് നാരായണ് പ്രതികരിച്ചത്.
എംടിയുടെ മകള് അശ്വതി ക്ഷണിച്ചിട്ടാണ് പരിപാടിക്ക് പോയത്. ട്രെയ്ലര് ലോഞ്ചിന് ശേഷം ആന്തോളജിയുമായി സഹകരിച്ച എല്ലാവരെയും വേദിയില് വിളിച്ച് മൊമന്റോ നല്കിയെങ്കിലും തനിക്ക് തന്നില്ല. അതിന്റെ വിഷമം അശ്വതിയോട് പറഞ്ഞിട്ട് തിരുവനന്തപുരത്തേക്ക് പോവുകയായിരുന്നു. എന്നാല് അശ്വതി ക്ഷമ പറഞ്ഞ് മൊമന്റോ തരാനുള്ള അവസരമുണ്ടാക്കി.
രമേഷ് നാരായണന് എന്നല്ല സന്തോഷ് നാരായണന് എന്നായിരുന്നു പേര് അനൗണ്സ് ചെയ്തത്. പിന്നാലെ ആസിഫ് വന്ന് മൊമന്റോ തന്നെ ഏല്പ്പിച്ചിട്ട് പോയി. ആസിഫ് തനിക്കാണോ, താന് ആസിഫിനാണോ മൊമന്റോ നല്കേണ്ടത് എന്ന് പോലും വ്യക്തമായില്ല. മൊമന്റോ തന്നെ ഏല്പ്പിച്ച ആസിഫ് ആശംസ പോലും പറയാതെ പോയി.
അതുകൊണ്ടാണ് താന് ജയരാജിനെ വിളിച്ചത്. ആസിഫിനെ ശ്രദ്ധിച്ചില്ലെന്നത് വാസ്തവമാണ്. എന്നാല് അപമാനിക്കുകയോ വിവേചനം കാണിക്കുകയോ ചെയ്തിട്ടില്ല. വസ്തുത മനസിലാക്കാതെയുള്ള സൈബര് ആക്രമണത്തില് വിഷമമുണ്ട് എന്നാണ് രമേഷ് നാരായണ് പറയുന്നത്.
