മോട്ടോര് ഇന്ഷുറന്സ് ചെലവുകള് കൈവിട്ട് കുതിക്കുന്നത് തടയാന് നടപടി ഉണ്ടാവുമെന്ന് ട്രാന്സ്പോര്ട്ട് സെക്രട്ടറി. കഴിഞ്ഞ വര്ഷം പ്രീമിയത്തില് 34 ശതമാനത്തോളം വര്ദ്ധനവ് ഉണ്ടായ സാഹചര്യത്തിലാണ് നടപടിയെടുക്കാന് ഗവണ്മെന്റ് തയ്യാറെടുക്കുന്നതെന്ന് ലൂസി ഹെയ്ഗ് പറഞ്ഞു.
യുവാക്കള്ക്കും, പ്രായമായ ഡ്രൈവര്മാര്ക്കുമാണ് പ്രധാനമായും പ്രീമിയം തിരിച്ചടി നേരിടുന്നത്. 'കാര് ഇന്ഷുറന്സ് ഒരു ആഡംബരമല്ല, അതൊരു നിയമപരമായ ആവശ്യകതയാണ്. ലക്ഷക്കണക്കിന് പേര്ക്ക് ഇത് അനിവാര്യമാണ്', ട്രാന്സ്പോര്ട്ട് സെക്രട്ടറി പറഞ്ഞു.
ഈ ഘട്ടത്തില് പ്രീമിയങ്ങള് കുറഞ്ഞ് വരുന്നതായി റിപ്പോര്ട്ടും പുറത്തുവരുന്നുണ്ട്. ഈ സമയത്താണ് ഗവണ്മെന്റ് വിഷയത്തില് ഇടപെടുമെന്ന് വ്യക്തമാക്കുന്നത്. ടോറി ഭരണത്തിന് കീഴില് മാന്യമല്ലാത്ത ഇടപാടുകളും, കുതിച്ചുയര്ന്ന പണപ്പെരുപ്പവും, കുഴികള് നിറഞ്ഞ റോഡുകളും, വര്ദ്ധിച്ച കാര് മോഷണങ്ങളും ചേര്ന്നാണ് കവറേജ് ചെലവ് ഉയര്ന്നതെന്ന് ലൂസി ഹെയ്ഗ് പറയുന്നു.
പ്രീമിയങ്ങളെ നിരവധി ഘടകങ്ങള് ബാധിക്കുന്നതായി എബിഐ ഇന്ഷുറന്സ് സംഘടനയും വ്യക്തമാക്കി. എന്നാല് ആളുകളുടെ വംശം പോലും ഇന്ഷുറന്സ് പ്രീമിയങ്ങളെ ബാധിക്കുന്നതായി റിപ്പോര്ട്ട് പുറത്തുവന്നിരുന്നു. വെള്ളക്കാരെ അപേക്ഷിച്ച് ന്യൂനപക്ഷ വംശങ്ങളില് നിന്നുള്ളവര്ക്ക് പ്രീമിയം കൂടുന്ന പ്രവണത കണ്ടുവരുന്നുണ്ട്.
