'ഇപ്പോള് വരുന്ന വെളിപ്പെടുത്തലുകള് ഷോ'; ഹേമ കമ്മറ്റി അംഗം നടി ശാരദ
ഹേമ കമ്മിറ്റി റിപ്പോര്ട്ടിലെ കാര്യങ്ങള് തനിക്ക് ഓര്മയില്ലെന്ന് നടിയും ഹേമ കമ്മിറ്റി അംഗവുമായ ശാരദ. റിപ്പോര്ട്ട് ചര്ച്ചയാക്കുന്നത് എന്തിനാണ്? ഈ വിഷയം വിട്ട് നിങ്ങള് വയനാട്ടിലെ ദുരന്തത്തെ കുറിച്ച് സംസാരിക്കൂവെന്നും ശാരദ പറയുന്നു. ഇപ്പോള് വരുന്ന വെളിപ്പെടുത്തലുകള് ഷോ ആണെന്നും ശാരദ അഭിപ്രായപ്പെടുന്നു.
തെളിവെടുപ്പിനെക്കുറിച്ച് ഓര്മയില്ല. റിപ്പോര്ട്ടിനെ കുറിച്ച് എല്ലാം ജസ്റ്റിസ് ഹേമ പറയട്ടെ എന്നും ശാരദ പറയുന്നു. അഞ്ചാറ് വര്ഷം മുമ്പ് നടന്ന തെളിവെടുപ്പിനെക്കുറിച്ചും റിപ്പോര്ട്ടില് താന് എഴുതിയ കാര്യങ്ങളെ കുറിച്ചു ഓര്മയില്ലെന്നാണ് നടി ശാരദ പറയുന്നത്. കൂടാതെ റിപ്പോര്ട്ടിലെ ശാരദയുടെ വിവാദ പരാമര്ശങ്ങളില് മറുപടി നല്കാനും ശാരദ തയ്യാറായില്ല.
ലൈംഗികാതിക്രമം എല്ലാ കാലത്തും സിനിമയിലുണ്ടായിരുന്നു. തന്റെ കാലത്ത് ആളുകള് മൗനം പാലിച്ചു. അഭിമാനത്തെ കരുതിയും ഭയം കാരണവും അന്ന് ആ വിവരം പുറത്തുപറഞ്ഞിരുന്നില്ല. എന്നാല് വിദ്യാഭ്യാസമുള്ള ഇന്നത്തെ തലമുറയ്ക്കു ദുരനുഭവങ്ങള് തുറന്നുപറയാന് ധൈര്യമുണ്ടായെന്നും ശാരദ വ്യക്തമാക്കി.
2017 നവംബര് 16 ന് ആണ് സര്ക്കാര് ജസ്റ്റിസ് ഹേമ അധ്യക്ഷയായി കമ്മിറ്റി രൂപീകരിച്ചത്. കൊച്ചിയില് നടി അക്രമിക്കപ്പെട്ട സംഭവത്തെ തുടര്ന്ന് മലയാള സിനിമയിലെ സ്ത്രീകളുടെ സംഘടനയായ വിമെന് ഇന് സിനിമാ കളക്ടീവിന്റെ (ഡബ്ല്യുസിസി) ആവശ്യം പരിഗണിച്ചായിരുന്നു ഇത്. വര്ഷങ്ങള് നീണ്ട കാത്തിരിപ്പിനൊടുവില് ആകെ 233 പേജുകളുള്ള റിപ്പോര്ട്ടാണ് പുറത്തുവന്നത്.
സ്വകാര്യതയെ ലംഘിക്കുന്ന വിവരങ്ങള് കൈമാറില്ലെന്ന് നേരത്തെ വ്യക്തമാക്കിയതിനാല് ആളുകളെ തിരിച്ചറിയുന്ന വിവരങ്ങള് ഒഴിവാക്കി. 49-ാം പേജിലെ 96-ാം പാരഗ്രാഫ് പ്രസിദ്ധീകരിച്ചില്ല. 81 മുതല് 100 വരെയുള്ള പേജുകളിലെ ചില ഭാഗങ്ങളും ഒഴിവാക്കി. 165 മുതല് 196 വരെയുള്ള പാരഗ്രാഫുകളും അനുബന്ധവും ഒഴിവാക്കിയിട്ടുണ്ട്.
