ഹരിയാന നിയമസഭാ തിരഞ്ഞെടുപ്പ് ആസന്നമായിരിക്കെ ബിജെപിയ്ക്ക് വെല്ലുവിളിയുമായി ഗുസ്തി സൂപ്പര്താരങ്ങളായ വിനേഷ് ഫോഗട്ടും ബജ്രംഗ് പുനിയയും കോണ്ഗ്രസില്. എഐസിസി ആസ്ഥാനത്തെത്തി കെസി വേണുഗോപാല് ഉള്പ്പെടെയുള്ള നേതാക്കളുമായി വാര്ത്താ സമ്മേളനം നടത്തിയ ശേഷമാണ് ഇരുവരും കോണ്ഗ്രസ് അംഗത്വമെടുത്തത്. കോണ്ഗ്രസിന്റെ ചരിത്രത്തിലെ വലിയ ദിനമാണിതെന്ന് വേണുഗോപാല് പറഞ്ഞു. ഇരുവരും നേതാക്കളായത് പോരാട്ടത്തിലൂടെയാണെന്നും കെസി പറഞ്ഞു.
തെരുവില് നിന്ന് നിയമസഭ വരെ പോരാടാന് തയാറാണെന്ന് വിനേഷ് ഫോഗാട്ട് പ്രതികരിച്ചു. കോണ്ഗ്രസില് ചേരുന്നതിനു മുന്നോടിയായി പാര്ട്ടി അധ്യക്ഷന് മല്ലികാര്ജുന് ഖര്ഗെയുടെ വസതിയില് ഇരുവരും കൂടിക്കാഴ്ച നടത്തിയിരുന്നു.
ഇരുവരും റെയില്വേയിലെ ജോലി രാജിവെച്ചു. ഹരിയാന നിയമസഭാ തിരഞ്ഞെടുപ്പില് മത്സരിക്കുന്നതിനു മുന്നോടിയായാണു ജോലി രാജിവെച്ചത്. സെപ്റ്റംബര് 4ന് ന്യൂഡല്ഹിയില് കോണ്ഗ്രസ് നേതാവ് രാഹുല് ഗാന്ധിയുമായി ഗുസ്തി താരങ്ങളായ വിനേഷ് ഫോഗട്ടും ബജ്രംഗ് പുനിയയും കൂടിക്കാഴ്ച നടത്തിയിരുന്നു.
കോണ്ഗ്രസ് പാര്ട്ടിയുടെ ഭാഗമാകുന്നതില് അഭിമാനമുണ്ടെന്ന് അംഗത്വം സ്വീകരിച്ചശേഷം വിനേഷ് ഫോഗട്ട് പറഞ്ഞു. 'ഗുസ്തിയിലെ യാത്രയില് പിന്തുണച്ചതിന് രാജ്യത്തെ ജനങ്ങളോട് നന്ദി പറയാന് ഞാന് ആഗ്രഹിക്കുകയാണ്. കോണ്ഗ്രസ് പാര്ട്ടിയോടും നന്ദി പറയുകയാണ്. ഞങ്ങള് തെരുവില് വലിച്ചിഴയ്ക്കപ്പെട്ടപ്പോള് ബി.ജെ.പി. ഒഴികെ മറ്റെല്ലാ രാഷ്ട്രീയ പാര്ട്ടികളും ഞങ്ങള്ക്കൊപ്പം നിന്നു. ഞങ്ങളുടെ കണ്ണീരും വേദനയും അവള്ക്ക് മനസിലായി. സ്ത്രീകളോടുള്ള അതിക്രമങ്ങള്ക്കെതിരെ പോരാടാന് സന്നദ്ധമായ കോണ്ഗ്രസ് പോലൊരു പാര്ട്ടിയുടെ ഭാഗമാകുന്നതില് എനിക്ക് ഏറെ അഭിമാനം തോന്നുന്നു. തെരുവ് മുതല് പാര്ലമെന്റ് വരെ പോരാടാന് ഈ പാര്ട്ടി തയ്യാറാണ്.' -വിനേഷ് ഫോഗട്ട് പറഞ്ഞു. ഗുസ്തി താരങ്ങളുടെ ബ്രിജ് ഭൂഷണിനെതിരെയുള്ള പോരാട്ടം ദേശീയ ശ്രദ്ധ നേടിയിരുന്നു.
അതേസമയം, ഇരുവരുടെയും രാഷ്ട്രീയ പ്രവേശനത്തില് ഗുസ്തി താരങ്ങള്ക്കിടയില് ഭിന്നതയുണ്ടെന്നാണു വിവരം. ഇരുവരും കോണ്ഗ്രസില് ചേരാനുള്ള തീരുമാനം വ്യക്തിപരമാണെന്നാണ് സാക്ഷി മാലിക്കിന്റെ പ്രതികരണം. പല വാഗ്ദാനങ്ങളും രാഷ്ട്രീയ പാര്ട്ടികളില് നിന്നും ലഭിക്കും. തനിക്കും ഇത്തരത്തില് വാഗ്ദാനങ്ങള് ലഭിച്ചിരുന്നു. തുടങ്ങിവച്ച ദൗത്യം അവസാനിപ്പിക്കരുത്. വിനേഷ് ഫോഗട്ടും ബജ്രംഗ് പുനിയയും എടുത്ത തീരുമാനം വ്യക്തിപരമാണെന്നും സാക്ഷി മാലിക്ക് പറഞ്ഞു.
