നടിക്കു കാശ് വാഗ്ദാനം ചെയ്തു വഴങ്ങാന് ആവശ്യപ്പെട്ടതിനെ ചോദ്യം ചെയ്തു; വിലക്കിയെന്ന് സംവിധായിക
കൊച്ചി: നടിക്കു കാശ് വാഗ്ദാനം ചെയ്തു വഴങ്ങാന് ആവശ്യപ്പെട്ടതിനെ ചോദ്യം ചോദ്യം ചെയ്തത്തിന്റെ പേരില് സിനിമയില് നിന്ന് തന്നെ വിലക്കിയെന്ന ഗുരുതര ആരോപണവുമായി സംവിധായിക സൗമ്യ സദാനന്ദന്. നടിക്കു കാശ് വാഗ്ദാനം ചെയ്തു വഴങ്ങാന് ആവശ്യപ്പെട്ടതിനെ താന് ചോദ്യം ചെയ്തതാണു മലയാള സിനിമയില് നിന്നു വിലക്കു നേരിടാന് കാരണമെന്നും സൗമ്യ ആരോപിച്ചു. ഹേമ കമ്മിറ്റിക്കുമുന്നില് നടത്തിയ വെളിപ്പെടുത്തലാണു ഫെയ്സ്ബുക്കിലൂടെ സൗമ്യ സദാനന്ദന് തുറന്നെഴുതിയത്.
സിനിമയിലെ നല്ല ആണ്കുട്ടികള്ക്കു പോലും മറ്റൊരു മുഖമുണ്ടെന്നും തന്റെ ആദ്യ സിനിമ അനുവാദമില്ലാതെ പ്രധാന നടനും സഹനിര്മാതാവും എഡിറ്റ്ചെയ്തു തിയറ്ററുകളില് എത്തിച്ചുവെന്നും സൗമ്യ ഫെയ്സ്ബുക്ക് കുറിപ്പില് ആരോപിച്ചു. ആദ്യ സിനിമയ്ക്കുശേഷം മറ്റു പ്രൊജക്ടുകളുമായി നിര്മാതാക്കള് സഹകരിച്ചില്ല. താന് കലാമൂല്യമുള്ള സിനിമയാണു ചെയ്യുന്നതെന്ന് അവര് കരുതി.
അവര്ക്കു വേണ്ടതു ബ്ലോക്ക് ബസ്റ്ററായിരുന്നു. താന് അടുത്ത അഞ്ജലി മേനോന് ആകുമെന്നു പ്രൊഡ്യൂസേഴ്സ് അസോസിയേഷന് യോഗത്തില് പരാമര്ശമുണ്ടായി. വര്ഷങ്ങള്ക്കുശേഷം തന്റെ പുഞ്ചിരി തിരികെ തന്നതിനു ജസ്റ്റിസ് ഹേമയ്ക്കു നന്ദിയെന്നുമുള്ള കുറിപ്പോടെയാണു സൗമ്യ സിനിമയില്നിന്നു തനിക്കുണ്ടായ ദുരനുഭവം പങ്കുവച്ചത്.
പുതിയ പ്രോജ്കടുകളുമായി വനിതാ നിര്മാതാക്കളെ വരെ സമീപിച്ചെങ്കിലും ഫലമുണ്ടായില്ലെന്നു ഹേമ കമ്മിറ്റിക്കു മുമ്പില് ഇതെല്ലാം വെളിപ്പെടുത്തിയിട്ടുണ്ടെന്നും സൗമ്യ ഫെയ്സ്ബുക്ക് പോസ്റ്റില് വ്യക്തമാക്കി. കുഞ്ചാക്കോ ബോബന് നായകനായ 'മാംഗല്യം തന്തുനാനേന' എന്ന ചിത്രത്തിന്റെ സംവിധായികയാണു സൗമ്യ.
